Ә.Тәжібаев атындағы облыстық әмбебап ғылыми кітапханасында 3 наурыз – Дүниежүзілік Жазушылар күні аясында ақын, Қазақстанның құрметті журналисі, Қазақстан Телерадио академиясының «Алтын жұлдыз» иегері, Халықаралық «Алаш» әдеби сыйлығының лауреаты, «Тұран» сыйлығының иегері, Қазақстан Жазушылар одағының облыстағы өкілі Қаршыға Есімсейітованың шығармашылығына 50 жыл толуына орай «Орындалған арман» атты кездесу кеші өтті.
Кеште «AMANAT» партиясы облыстық филиалының төрағасы Жандос Базартай, облыстық мәдениет, архивтер және құжаттама басқарма басшысының орынбасары Қуаныш Жанұзақов, «Қазақстан» РТРК АҚ Қызылорда облыстық филиалының директоры Нұрбек Әмиша, Қорқыт ата атындағы Қызылорда университетінің аға оқытушысы, филология ғылымдарының кандидаты Айман Айтбаева қалам иесінің шығармашылығы жөнінде айта келіп, қоғамдағы, қазақ журналистикасындағы еңбегін жоғары бағалады.
Осы кеште Қуаныш Жанұзақов атаулы күнге орай аймақ руханиятын дамытуға атсалысып жүрген ақын-жазушыларға басқарма басшысының Алғыс хатын табыс етті.
Ақын, Халықаралық «Алаш» әдеби сыйлығының иегері Қатира Жәленова, техника ғылымдарының докторы, профессор С.Қошқаров, Қазақстан Жазушылар және Журналистер одағының мүшесі, тарих және қоғамдық ғылымдар академиясының мүшесі, ғалым-публицист Қ.Омаров, Қазақстан Жазушылар одағының мүшесі, сатирик жазушы Н.Елтай, Шиелі аудандық әйелдер кеңесінің төрайымы Н.Палымбет құттықтау сөз сөйлеп, мерейтой иесіне сый-сияпат көрсетті. Шиелі аудандық мәдениет және тілдерді дамыту бөлімінің басшысы А.Әзімхан аудан әкімінің құттықтауын табыс етті.
Кеш барысында ақын өлеңдері оқылып, Бүкілодақтық халық шығармашылығы фестивалінің лауреаты, ҚР Білім беру ісінің үздігі, Ы.Алтынсарин төсбелгісінің және «Құрмет» орденінің иегері Кенже Мусаева ақын сөзіне жазылған Ділдахан Торғаеваның «Жырыммен бірге демеңдер!» атты әнін орындап, көрермен қауымның ықыласына бөленді. Қызылорда Жастар театрының өнерпаздары ақын шығармашылығынан «Анаға тағзым» қойылымын сахналады. Сондай-ақ кеш иесі Қ.Есімсейітованың жаңадан жарық көрген «Шешім» кітабының тұсауы кесіліп, «Менің әлемім» тақырыбындағы кітап көрмесі таныстырылды.
Іс-шараға облыстың зиялы қауымы, ардагерлер, бұқаралық ақпарат құралдары өкілдері қатысты.
«СБ» ақпарат
