«Қаламгерлер» аллеясында бұқаралық ақпарат құралдары қызметкерлерінің мерейлі мерекесіне арналған салтанатты шара өтті. Оған қала әкімінің орынбасары Бақытжан Омаров, БАҚ саласы мен зиялы қауым өкілдері, жауапты сала мамандары қатысты.
Сыр бойы әдебиетінің үш алыбы ескерткішінің жанына жиылған қаламгерлер ең әуелі жергілікті өнерпаздардың өнерін тамашалады.
Қала әкімінің орынбасары журналистердің қоғамдағы орны мен беделі туралы айтып, жылы лебізін білдірді.
– Елдiң алдында тұрған саяси, экономикалық және әлеуметтiк мiндеттердi табысты орындау көп жағдайда қоғамның әлеуметтiк белсендiлiгiне байланысты, ал оған ықпал етуде бұқаралық ақпарат құралдарының қызметі орасан. Осы ретте, ұлтты бірлікке ұйыстырып, ел ертеңі үшін атқарылатын байыпты бастамаларға белсене атсалысып, қолдап келесіздер, – деді ол.
Шарада шаһардың тыныс-тіршілігін, өзекті мәселелері мен жарқын жетістіктерін ақпараттандырып, халық пен билік арасында алтын көпір бола білген бірқатар сала үздіктеріне қала әкімінің арнайы Алғыс хаты табысталып, сый-құрмет көрсетілді.
Сондай-ақ Қызылорда қаласының құрметті азаматы, Қазақстан Журналистер одағының мүшесі, бірнеше кітаптың авторы Жүзбай Ибрагимұлының мерейлі 75 жасқа толуына орай сый-сияпат көрсетілсе, ақын, белгілі журналист, Қазақстан Жазушылар және Журналистер одағының мүшесі Дүйсенбек Аяшұлы Қызылорда қаласының ең жоғарғы марапаты «Құрмет грамотасымен» марапатталды.
Сала өкілдерінің мерейін үстем ету үшін мереке қарсаңында іс-шаралар ұйымдастырылды. Атап айтар болсақ, қала әкімдігінің ұйытқы болуымен, журналистер арасында спорттық шаралар өтті. Бильярд, боулинг сайысында жеңімпаздар арнайы қаржылай сыйлыққа ие болды.
«СБ» ақпарат
