Қанттың интернеттегі жарнамасы жер жарып тұр. Жұрт дүкеннен таппай жүрген қант интернетте тонналап сатылып жатыр. Кім қанша алғысы келсе де шектеу жоқ, – деп хабарлайды Экспресс К. Еліміздің бірнеше өңірінде құмшекердің тапшылығы қарапайым көпшілікті сарсаңға салып қойды. Тіпті, Ақтөбе тұрғындары қант сатып алу үшін сауда нысандарында түнгі сағат 3-тен бастап кезекке тұрады. Тәтті өнімге талас бұдан басқа да аймақтарда байқалады. Сондай-ақ қанттың бағасы да шарықтап кеткен. Министр Бақыт Сұлтанов қазір Ресейден өнім келмегендіктен, осы мәселенің туындағанын айтқан.
Әйтсе де, жұрт дүкен сөрелерінен таппай жүрген қанттың интернеттегі жарнамасы жер жарып тұр. Тілші жарнамадағы нөмірлерге хабарласып, сатушылардың қантты қайдан алып жатқанын сұрап көрді.
«Бізге Ресейден келді. Қаппен сатпаймыз. Тек тонналап ала аласыз. Келісі 650 теңгеден. Бірақ келесі келгенде, қымбат болуы мүмкін», – деді интернет сатушысы.
Ал кейбір жарнамаларда қанттың бір келісі 330 теңге деп жазылған. Олар өнімді қайдан әкеліп, сатып жатқанын айтпады.
«Біз қайдан әкелетінімізді айта алмаймыз. Аламын деушілерге шектеу жоқ, қанша алғысы келсе де», – деді арзан қант сатушы.
Айта кететін жағдай, интернеттен арзан қант іздеген Тараз тұрғыны алаяққа алданып қалған болатын.
>>> Біздің Facebook, Instagram парақшаларымыз бен Telegram каналымызға жазылыңыз! <<<
