Азық-түлік қауіпсіздігін қамтамасыз ету – ҚР АШМ Агроөнеркәсіптік кешендегі мемлекеттік инспекция комитетінің қызметіндегі басты бағыттардың бірі.
Комитеттің облыстық аумақтық инспекциясы өткен жылы сауда базарларына жүргізілген бақылау және қадағалау жұмысының нәтижесінде 147 заңбұзушылықты анықтап, базар иелеріне 12 млн теңгеден астам айыппұл салды. Ал биыл 9 айыппұл салынып, 865 мың теңге өндірілді. Аталған құрылым тарапынан былтыр 2895 фитосанитариялық сертификат беріліп, шетелдерге 127 мың тоннаға жуық және 922 мыңдай картон қорап, жүк түпқоймасы экспортталды. Жыл басынан бері 304 фитосанитариялық сертификат пен 1 есепке алу нөмірі табысталды.
Инспекция жұмысының тағы бір тармағы ауыл шаруашылығы алқаптарының фитосанитариялық жай-күйін жақсартуға бағытталған. Ауыл шаруашылығында өсімдіктерді қорғау, зиянды, аса қауіпті зиянды жәндіктер мен карантиндік объектілерді бақылау әртүрлі әдіске негізделген іс-шаралар кешені арқылы жүзеге асырылады. Оның ішінде егінді таптап өтетін шегірткемен күрес жүйелі түрде жолға қойылған. Өңірде зиянкестің дәл осы үш түрі кеңінен тараған. Биыл Қызылорда облысында азиялық шегірткеге қарсы 33 350 гектар, италиялық прусқа қарсы 31 830 гектар, саяқ шегірткеге қарсы 55 540 гектар жер өңделеді.
– Өткен жылы мұндай жұмыс Арал, Қазалы аудандарында қарқынды жүргізілді. Ақтөбе облысымен шекаралас тұста жылдар бойы химиялық өңдеу көрмеген аумақтар болды. 33 мың гектар жерден өзіміз болжағандай италиялық прус шықты. Желді күндері жерді улау тиімсіз екен. Пестицид сумен араласып, кеуіп кетеді. Сондықтан авиация қызметіне жүгіну қажет болды. Химиялық өңдеуден өткен жерде зиянкес мүлдем жойылып кетпейді, 15 пайызынан дернәсіл өсіп шығады. Облыстағы өңделетін жердің негізгі бөлігі солтүстіктегі екі ауданда. Ал азиялық шегірткеге қарсы күрес іс-шаралары негізінен күріш шаруашылығына бейімделген Жаңақорған, Шиелі, Сырдария, Жалағаш аудандары мен Қызылорда қаласында атқарылады, – деді инспекция басшысы Мұхтар Оразбаев.
Өткен жылы азиялық шегірткеге қарсы 35 322 гектар, италиялық прусқа қарсы 35 360 гектар, саяқ шегірткеге қарсы 55 394 гектар жер уланды. Ерте көктемнен бас көтеретін қауіпті жәндіктен құтылуға қазірден қам жасалып жатыр. Осы бағытта облыс әкімі орынбасарының жетекшілігімен өңірлік штаб құрылды.
Былтыр облыс аумағында карантиндік объектілер жатаған у кекіреге қарсы 91 гектар, қауын шыбынына қарсы 1750 гектар жерде республикалық бюджет қаражаты есебінен химиялық өңдеу жұмысы жүргізілді. Калифорниялық қалқанша сымырына қарсы 29,5 гектар, арамсояуға қарсы 526,15 гектар, жатаған у кекіреге қарсы 6,5 гектар жер толық залалсыздандырылды. Зерттеу нәтижесінде биыл да бұл бағыттағы жұмыс жалғасады.
Назерке САНИЯЗОВА,
«Сыр бойы»
