«Қазақстан халқына» қоры су тасқынынан зардап шеккендерге көмек мөлшерін 10 млрд теңгеге дейін ұлғайтады, деп хабарлады Қазақпарат.
«Бұған дейін қор ауылдық жерлерде 200 үй салу үшін 5 млрд теңге бөлу туралы жариялаған болатын. Апаттың ауқымы мен оның салдарын ескере отырып, қамқоршылық кеңесі осы мақсаттарға барлығы 10 млрд теңге бөлу туралы шешім қабылдады», – делінген қордың хабарламасында.
Ақпаратта айтылғандай, 1-30 сәуір аралығында заңды және жеке тұлғалардан қордың шоттарына түскен барлық қайырымдылық қаражаты зардап шеккендерге үй салуға аударылады. 9 сәуірдегі жағдай бойынша қор шотына 970 млн теңге түсті.
«Қор жиналған ақша есебінен 430-дан астам үй салуға болады. Жиналған қаржы артқан жағдайда салынатын үйлер саны артады деп күтілуде. Су тасқыны салдарынан қираған тұрғын үйді қалпына келтіру қажеттілігі анағұрлым жоғары екенін ескере отырып, «Қазақстан халқына» қоры жанашыр азаматтар мен заңды тұлғаларды Мемлекет басшысының зардап шеккендерге көмек көрсету үшін қаражат жинау жөніндегі бастамасын қолдауға шақырады», – дейді Қазақстан халқы қорынан.
Қайырымдылық жасау үшін https://qazaqstanhalqyna.kz/kk/donors.html ресми сайтында көрсетілген шоттар мен деректерді пайдалануға болады.
Сонымен қатар жеке тұлғалар үшін аударым банктердің мобильді қосымшасындағы «қайырымдылық» бөлімінде қолжетімді.
Қорға түскен қаржы мөлшері туралы егжей-тегжейлі есеп, сондай-ақ құрылыс барысы туралы ақпарат ресми веб-сайтта орналастырылады.
«Қор түсткен қаражаттың мақсатты жұмсалуын бақылауды қамтамасыз етеді. Елді мекендерді, құрылыс орнын таңдау және жер учаскелерін беру, құрылыс компаниялары атынан мердігерлерді айқындау жөніндегі жұмыс құрылысқа тапсырыс беруші ретінде әрекет ететін жергілікті атқарушы органдармен бірлесіп жүргізіледі», – деп жазылған ақпаратта.
Еске сала кетейік, бұған дейін «Қазақстан халқына» қоры су тасқынынан зардап шеккен 200 үйдің құрылысын қаржыландыратыны туралы хабарлаған едік.
>>> Біздің Facebook, Instagram парақшаларымыз бен Telegram каналымызға жазылыңыз! <<<
