Сурет: freepik
Мәдениет және ақпарат министрлігі ҚР президентінің өкімінің жобасын дайындады. Онда ҚР мемлекеттік наградаларын тапсыру және тапсыру тәртібі туралы нұсқаулыққа, мемлекеттік наградаларға арналған құжаттардың үлгілеріне толықтырулар енгізілді, деп хабарлайды Zakon.kz.
«Қазақстан Республикасының мемлекеттік наградаларымен наградтауға ұсынудың және оларды тапсырудың тәртібі туралы нұсқаулықты, Қазақстан Республикасының мемлекеттік наградалары құжаттарының үлгілерін және Қазақстан Республикасының мемлекеттік наградалары белгілерінің сипаттамасын бекіту туралы» Қазақстан Республикасы Президентінің 1999 жылғы 8 қарашадағы № 90 өкіміне мынадай толықтырулар енгізілсін:
1) жоғарыда көрсетілген өкіммен бекітілген Қазақстан Республикасының мемлекеттік наградаларымен наградтауға ұсынудың және оларды тапсырудың тәртібі туралы нұсқаулықта 3-тармақ мынадай мазмұндағы төртінші бөлiгiмен толықтырылсын:
«Қазақстанның халық жазушысы» – Қазақстан Республикасының әдебиетін дамытуға ерекше үлес қосқан, бұрын «Қазақстанның еңбек сіңірген қайраткері» және (немесе) әдебиет саласындағы Қазақстан Республикасы мемлекеттік сыйлығының лауреаты атанған тұлғаларға берiледi.»;
2) «ҚАЗАҚСТАННЫҢ ХАЛЫҚ ӘРТІСІ» құрметті атағы төсбелгісінің сипаттамасынан кейін «Қазақстанның халық жазушысы» құрметті атағы төсбелгісінің сипаттамасымен толықтырылсын.
Құрметті атаққа «Қазақстанның халық жазушысы» төсбелгісі де қоса беріледі.
«Жарлық жобасы ұлттық әдебиетті биікке көтерген әдеби-шығармашылық орта жұмысының жоғары деңгейін тануға бағытталған және тиісті мемлекеттік награда тағайындау шарасын қабылдауды көздейді», – делінген негіздемеде.
Құжат 20 қазанға дейін қоғамдық талқылау үшін «Ашық НҚА» сайтына жарияланған.
>>> Біздің Facebook, Instagram парақшаларымыз бен Telegram каналымызға жазылыңыз! <<<
