Ғылым және жоғары білім министрі Саясат Нұрбек бірыңғай уақыт белдеуінің ел халқына әсері туралы зерттеуге қатысты түсінік берді.
Оның айтуынша, осы мәселеге қатысты алдағы уақытта зерттеу ұйымдастырылады. Бұл тұрғыда жетекші институттарды, соның ішінде география институтын, сондай-ақ зерттеудің физиологиялық және медициналық аспектілерімен айналысатын Денсаулық сақтау министрлігінің институттарын тарту жоспарланған.
«Жоғары ғылыми-техникалық комиссия жақын арада өзінің отырысын өткізеді және оның барысында осы тақырып қаралады. Егер бұл бастамаға қолдау жасалса, онда бірден конкурс жариялап, зерттеуге кірісеміз», – деді С.Нұрбек Сенатта тілшілер сұрағына жауап бере отырып.
Еске сала кетейік, 1 наурыздан бастап Қазақстанда уақыт бір сағат артқа жылжыды.
Осыдан кейін өзгеріске қарсы шыққан қазақстандықтар бұрын қолданыста болған уақыт белдеуін қайтару жөніндегі петиция жариялады.
Биыл қыркүйек айында Шығыс Қазақстан облысының әкімі Ермек Көшербаев жаңа уақыт белдеуінің облыс тұрғындарының тұрмысына қалай әсер еткені туралы пікір білдірді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
