Бірнеше күннен бері Түркияда өтіп жатқан World Robot Olympiad – 2024 халықаралық олимпиадасы мәресіне жетті. Әлемнің 90 елінен 3500 жас инженер қатысқан додада Қазақстан намысын қорғаған командалар екі санат бойынша жүлдегер атанды.
Қызылордадағы Зияткерлік мектеп оқушылары Ернұр Сәду мен Алдияр Аппаз «Future Engineers» санатында ІІ орынды еншілесе, Талдықорғандағы NIS шәкірттері Іңкәр Құрманбаева мен Айым Бауыржанқызы «Future Іnnovators Senior» санатында ІІІ орын алды.
Сондай-ақ «RoboSports» санатында Семейдегі NIS оқушылары Ілияс Махатов пен Амир Берекенов үздік 5-ке енді, ал Қызылорда NIS оқушылары Дінмұхаммед Әбдиев пен Максим Усольцев «Robomission» категориясында үздік ондыққа табан тіреп, ұпай сандары бойынша 7-орынға тұрақтады.
Бұдан бөлек Талдықорғандағы Зияткерлік мектептің оқушылары Сержан Қадылбек пен Ақниет Молдакеримов «Technical solution award» номинациясымен марапатталды. Айта кетейік, беделді байқауға еліміздің атынан 13 команда қатысқан болатын.
>>> Біздің Facebook, Instagram парақшаларымыз бен Telegram каналымызға жазылыңыз! <<<
