Өздеріңізге белгілі, 2022 жылдың 1 қыркүйегіне дейін шетелден әкелінген көліктерді биылғы жылдың 23 қаңтарынан бастап заңдастыру басталды.
Дәл осы уақытқа дейін 56 шетелдік көлік заңдастырылды (РФ-44, Армения-8, Грузия-4).
Айта кету керек, шетелдік көліктерді алдын ала egov.kz порталы немесе egovmobile, halyk мобильді қосымшаларының бірі арқылы тексеруге өтініш жолдау қажет. Егер өзі жібере алмайтын болса кез келген халыққа қызмет көрсету орталықтарындағы өзіне-өзі қызмет көрсету секторларындағы мамандар көмегіне жүгіне алады.
Жолданған өтініштеріне оң шешім қабылданса, яғни тексеруден сәтті өтсе, мамандандырылған бөлімдегі автокөліктің агрегатын салыстыру пунктіне криминалистке тексеруге бронь арқылы жолданады. Бүгінгі күні криминалистерден 118 көлік сәтті өтіп шықты.
Ең алдымен азаматтардан сұралатын құжаттар:
– мемлекеттік өтінім;
– өтінім берушінің жеке басын куәландыратын құжат;
– көлік құралының паспорты немесе тіркеу туралы куәлік;
– көлік құралына меншік құқығын растайтын құжат.
Ал, қойылатын басты талаптар:
– автокөлік Қазақстанға 2022 жылдың 1 қыркүйегіне дейін әкелінген болуы керек;
– криминалдық есепте болмауы керек;
– басқа мемлекетте бұрынғы тіркелген жері бойынша есептен шығарылуы тиіс;
– еуразиялық экономикалық одаққа кірмейтін елдерден әкелінген автокөлік кедендік тазартудан өтуі қажет.
Заңдастыру талаптарына сай, құжат тапсырған соң нәтижесі арнайы базаға тіркеледі және көлік иесінің телефонына 1414 нөмірінен SMS жіберіледі. Онда қабылданған шешім нақты жазылады. Заңдастыруға рұқсат етілсе, мемлекеттік алымдар төлеу қажет.
Алғашқы тіркеу үшін – 200 000 теңге;
Техпаспорт үшін мемлекеттік БАЖ – 4 313 теңге;
Мемлекеттік нөмір – 9 660 теңге.
Одан соң көлік иесі шетелдік техпаспорт, меншік құқығын растайтын құжатты ХҚКО мамандарына тапсырады. Тіркеу бекітілгеннен кейін автокөлік иесіне ҚР тіркеу құжаты, мемлекеттік нөмір беріледі.
Шетелдік автокөліктердің заңдастыру үшін өтінім беру 2023 жылдың 1 шілдесіне дейін жалғасады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
