Қасиетті Құрбан Айт мейрамының құрметіне орай, айттың екінші күнінде Қызылорда облысында жаңа мешіттің ашылу салтанаты болды.Өңірдегі Шиелі ауданына қарасты Досбол би ауылында жаңа құлшылық үйі бой көтеріп, қасиетті мерекеде ауыл тұрғындарына арналған ерекше сый-тарту болды.
Жергілікті кәсіпкерлер мен ауыл тұрғындарының жинаған қаражатына салынған жаңа мешітке «Досбол Датқа» атауы берілді. Сыйымдылығы бір мезетте 150 адамға дейін құлшылық етуге мүмкіншілік береді.
Ашылу салтанатында облыстық «Ақмешіт-Сырдария» орталық мешітінің ұстазы, қари Ш.Садуов Құран Кәрім аяттарын оқыған соң, ҚМДБ-ның Қызылорда облысы бойынша Өкіл имамы Болатбек қажы Ұласқанұлы сөз алып, аймақ халқын мерейлі мереке күнінде еселенген қуаныштарымен құттықтады.
Мешіттің лентасы қиылған соң, жамағат намаз оқып, Аллаға шүкіршілік айтып, дұға қылды. Бұдан кейін аулада құрылған қазақы үйлерде қуанышқа арналып ас беріліп, келген қонақтарға мерекелік дәм ұсынылды.
ҚМДБ-ның Қызылорда облысы бойынша өкілдігінің баспасөз қызметі
>>> Біздің Facebook, Instagram парақшаларымыз бен Telegram каналымызға жазылыңыз! <<<
