Өткен аптада инвестиция тартуда толымды табыстарға жеткен біздің өңірдегі өндірістің өркендеуіне қызмет ететін тағы бір келісім жасалды. Кейінгі үш жылда аймақ экономикасына 1 триллион 600 млрд теңге инвестиция тартылғаны белгілі. Биылғы меже 720 млрд теңгеден асады.
Ел Үкіметі атынан Өнеркәсіп және құрылыс министрі Ерсайын Нағаспаев пен облыс әкімі Нұрлыбек Нәлібаев, екінші тараптан испаниялық Roca Group компаниясының еншілес кәсіпорны «Рока Қазақстан» ЖШС бас директоры Даниэль Эрнандес «Қызылорда облысында заманауи сантехникалық бұйымдарды өндіру және құрастыру зауытының құрылысы» жөніндегі жоғары технологиялық жобаны жүзеге асыруға бағытталған инвестициялық келісімдерге қол қойды.
Жоба Мемлекет басшысының өңдеуші өнеркәсіпке инвестициялар тарту және импортты алмастыру жөніндегі мақсаттарға қол жеткізу міндеттеріне сәйкес жүзеге асырылуда.
Бұл – испан компаниясының Қызылорда облысында заманауи санитарлық-техникалық өнім өндіру және құрастыру зауытын салуға 44 млрд теңге инвестиция салатынын растайтын маңызды құжат.
Өңірге келетін инвестор Roca Group туралы айтсақ, компанияның 100 жылдан астам тарихы бар, сантехникалық жабдықтарды өндіру саласындағы әлемдік көшбасшылардың бірі. Бүкіл әлемдегі 78 өндірістік алаңын басқарады, онда 20 мыңнан астам қызметкер жұмыс істейді. Өнімдері 170-тен астам елге тарайды және жоғары сапалы, инновациялық шешімдер мен еуропалық стандарттарға сәйкес болғаны үшін кеңінен танымал.
Қол қою рәсімінде аймақ басшысы бұл келісім Қазақстан мен Испания арасындағы серіктестік қарым-қатынастардың дамуы үшін маңызды кезең екенін атап өтті.
Инвестициялық келісім аясында Қызылорда облысында заманауи өнеркәсіптік кәсіпорын салу жоспарланған. Жаңа зауыт керамикалық санитарлық бұйымдарды, ванна бөлмесіне арналған жиһаздарды, кірістірілген субұрқақтарын және басқа да өнімдерді өндіру мен жинауға маманданады. Кәсіпорынға Roca Group компаниясының озық өндірістік технологиялары мен стандарттары енгізіліп, өндіріс автоматтандырылады, энергия тиімділігі және экологиялық қауіпсіздігі ескеріледі.
Жобаның өндірістік қуаты жылына 500 мың дана бұйым, өндірілетін өнімдер Қазақстанның ішкі нарығына ғана емес, Орталық Азия елдеріне де экспортталады, 300-ден астам тұрақты жұмыс орны құрылады. Сонымен қатар, қазақстандық мамандарды халықаралық тәжірибені қолданып оқыту және біліктілігін арттыру қарастырылған.
Инвестициялық келісімде мемлекеттік қолдаудың кешенді шаралары да қамтылған. Оған салықтық преференциялар беру, технологиялық жабдықтарды, бөлшектерді, қосалқы бөлшектерді, сондай-ақ шикізат пен материалдарды импорттаған кезде кедендік баждардан босату кіреді. Қызылорда облысының әкімдігі жер учаскесін беріп, қажетті инженерлік инфрақұрылымды жеткізеді.
Инвестициялық келісімнің мерзімі – қол қойылған күннен бастап 25 жыл. Roca Group компаниясының өкілі Қазақстанды стратегиялық маңызды нарық ретінде қарастыратынын, себебі оның географиялық жағынан тиімді орналасқанын, қолайлы инвестициялық климат қалыптасқанын, мемлекеттік қолдау шаралары бар екенін атап өтті.
Бұл жоба өңдеуші өнеркәсіпті дамыту, импортқа тәуелділікті азайту және жоғары қосылған құны бар өнімдерді экспорттау бойынша мемлекеттік саясаттың басым бағыттарына сәйкес келеді. Құрылыс жұмыстары 2026 жылдың бірінші тоқсанында басталады деп жоспарлануда.
Кәсіпорын әлемдік стандарттарға сәйкес келетін санитарлық-техникалық өнімдер шығаратын Қазақстандағы алғашқы өндіріс болмақ. Зауыт қосылған құны жоғары өнім өндірісін ұлғайтуға және Қазақстанның экспорттық әлеуетін кеңейтуге мүмкіндік береді.
Айта кету керек, инвестициялар туралы келісім жасау жоспары Премьер-министр Олжас Бектенов пен Roca Group директорлар кеңесінің төрағасы Сантьяго де Гомар Роктың осы жылдың маусым айындағы кездесуі барысында талқыланған болатын. Құжатқа қол қойылуы және жұмыстың басталуы ел экономикасының инвестициялық тартымдылығын арттыру жөніндегі жүйелі шаралардың нәтижесін және инвестор сенімін көрсетеді.
Г.ТЕЛЬМАНҚЫЗЫ
