Облыс әкімінің орынбасары Бахыт Жаханов, қала әкімі Нұржан Ахатов, жауапты сала басшылары құрылыс алаңдарындағы жұмыс барысын бақылады.
Алдымен сол жағалаудағы 9 қабатты 120 пәтерлік екі тұрғын үйдің құрылысын көрді. Жалпы ауданы 7011 шаршы метр болатын үйлерде бір бөлмелі 18, екі бөлмелі 66, үш бөлмелі 36 пәтер бар.
Келесі нысан – денешынықтыру-сауықтыру кешені. Құрылысына 2,9 млрд теңге қаралған нысан «Қазақстан халқына» қорының қолдауымен салынуда. Онда бір мезетте 131 спортшы жаттыға алады. Бірінші қабатта волейбол, екінші қабатта күрес және басқа да залдар орналасады.
Әрі қарай Титов шағын ауданындағы әлеуметтік осал топтағы азаматтар үшін бой көтерген бес қабатты 135 пәтерлік тұрғын үйдің құрылыс алаңына барды. Жаңа тұрғын үйде 35 бір бөлмелі, 80 екі бөлмелі, 20 үш бөлмелі пәтер бар.
***
Құрылыс нысандарындағы жұмыс барысын бақылау «Достық үйінің» жаңа ғимаратында жалғасты. Нысан жақын арада пайдалануға беріледі. Бейбарыс сұлтан көшесіндегі сәулетті ғимараттар қатарын толықтырған нысанның сырты күннен қорғайтын сәндік панельдермен қапталған. Екінші және үшінші қабаттарда кеңселер, сондай-ақ холл, фойе, ресепшн, гардероб, 200 орындық үлкен зал, 60 орындық кофейня орналасады. Конференц-зал заманауи техникалармен жабдықталады.
Цокольді қабатта би студиясы, музыка және вокал кабинеттері, клуб, қоймалар, архив және қосалқы бөлмелер қарастырылған. Бүгінде ішкі әрлеу және дизайнерлік безендіру, сондай-ақ сыртқы абаттандыру жүргізілуде. Жұмыстың 95%-ы біткен. Құрылыс алаңында 7 техника және 135 жұмысшы еңбек етуде.
Ал Президент саябағында бас мердігер «Bi Global» ЖШС ауқымды абаттандыру жобасын жүзеге асыруда. Саябаққа 3 аллея, 6 субұрқақ, 5 амфитеатр, 7 балалар ойын алаңын, 4 спорт және 4 workout, 7 демалыс аймағын, 4 фудкорт, теннис үстелдерін, биіктігі 50 метр болатын айналмалы дөңгелек аттракцион, би алаңын, стритбол, вело және жүгіру жолақтарын, сахна, сарқырама каналдары мен көпірлер, шахмат, баскетбол және футбол алаңдарын, арқан саябағы мен модульдік санитарлық нысандар салу жоспарланған. Мұнда жыл он екі ай жұмыс істейтін 300 орындық заманауи балалар тынығу лагері мен Ботаникалық білім беру орталығы (қысқы бақ) бой көтеріп келеді. Бас мердігер «Alem Qurylys AQ» ЖШС жобаға сәйкес спорт блогын, іс-шараларға арналған event-аймақ, тұрғын корпустар, қонақүй үлгісіндегі шағын ғимараттар, дәстүрлі киіз үйлер, ашық бассейн, стадион, футбол алаңы және сахна салады.
«АУЫЛ АМАНАТЫНЫҢ» ЖЕМІСІ
«Жақсының жақсылығын айт» деген. Нұршайық Қуанышбаев – Арал ауданына қарасты Құмбазар елді мекенінің өміріне серпін әкелген жас кәсіпкер. Оның негізгі мамандығы мұғалім, ауыл шаруашылығы саласында жұмыс істеп көрмесе де ізденгіштігі мен еңбекқорлығының арқасында табысты еңбек етуге болатынын дәлелдеп отыр.
Жоспары мығым жас жігіт 2023 жылы «Ауыл аманаты» бағдарламасы арқылы 2,5 пайызбен 5 жыл мерзімге 8,6 млн теңге көлемінде жеңілдетілген несие алып, жеке кәсіпкер атанды. Бағдарлама аясында иеленген қаражатқа тіркемесімен трактор, пресс-подборщик және жатка сатып алып, шаруашылыққа қажетті техникалық құралдарды жасақтады. Өткен жылдың көктемінде алғаш шөп шабу науқанын бастаған Нұршайық бұл кәсіпке бірінші рет кіріскеніне қарамастан маусымның алғашқы жылында 10 000 дана пресс шөп дайындады. Бұл ауыл шаруашылығы саласына жаңа келген адам үшін үлкен жетістік, жақсы көрсеткіш еді.
Биыл бұл межеден асып, 12 000 дана пресс шөп басып шығарды. Бұл кәсібінің дұрыс жолға қойылғанын және ауыл азаматтары тарапынан сенім артқанының арқасында деп ойлайды жас кәсіпкер.
Нұршайық ауыл тұрғындарының бөліске түскен жерінің шөбін орып, елге қолжетімді әрі тиімді бағамен ұсынып келеді. Осы арқылы кәсіп иесі тұрғындардың шығынын азайтуға үлес қосып отыр. Сондай-ақ ол ауылдың бір тұрғынын тұрақты жұмыспен қамтып, еңбек нарығына да оң әсер етуде.
Мұғалім бола жүріп, ауыл шаруашылығынан кәсіп бастау – үлкен батылдық. Нұршайық Қуанышбаевтың бұл еңбегі – мемлекеттік қолдаудың игілігін тиімді пайдалану үлгісі әрі ауылдағы жастарға жігер беретін бастама. Алдағы уақытта кәсібін дамытып, ауылдың өркендеуіне одан әрі үлес қосады деген сенімдеміз.
Төребек ТӨРЕМҰРАТОВ.
Арал ауданы
Құмбазар елді мекенінің тұрғыны
