ліміздегі мәслихат депутаттары қоғамның дамуына үн қосып, аймақтардағы тың мәселелердің шешілуіне тікелей атсалысып келеді. Олар өз өкілеттіліктеріне, білімі мен кәсіби дағдыларына сәйкес қоғамды одан әрі демократияландыруға, халық пен билік арасындағы байланысты нығайтуға, түрлі реформалар мен бағдарламалардың жемісті жүзеге асуына жұмыс жасауда. Олардың қатарында Райхан Ысқақова да бар. Оның әр күні, әр минуты есептеулі: жиналыстар, мәслихат сессиялары, тұрғындармен кездесулер, комиссия отырыстары. Осыған қарамастан барлығына үлгіруге тырысады. Ал облыстық мәслихат депутатының сайлаушылар алдындағы жауапкершілігі тіпті жоғары. Ол – № 26 «Бекежанов» сайлау округі бойынша сайланған.
– Соңғы жылдары мемлекет индустриалды аймақтарды дамытуға ерекше көңіл бөліп отыр. Бұл аймақтардың экономикалық өсуіне, жаңа жұмыс орындарының ашылуына, тұрғын үй құрылысының дамуына, халықтың әлеуметтік жағдайының жақсаруына ықпал етеді. Мұндағы мақсат – адамдарға түрлі қызметтер саласында нақты пайда әкелетін инвестициялар тарту, агроөнеркәсіп кешенінің кірісін арттыру, шағын және орта бизнестің дамуын қамтамасыз ететін жобаларды әзірлеу және іске асыру. Осы тұрғыда өзім сайланған Шиелі ауданында халықтың әл-ауқатын көтеруге жұмыс жасап келемін, – дейді Райхан Құсайынқызы.
Алматы халық шаруашылық институтын бітірген ол еңбек жолын облыстық қаржы басқармасында бюджеттік бөлімнің аға ревизор-инспекторы, онан жоғарылап, басқарма бастығының орынбасарлығына дейін көтерілді. 2005 жылдан бастап облыстың экономика және бюджеттік жоспарлау басқармасы басшысының орынбасары қызметін атқарды. Бюджетті жоспарлау, мақсатты пайдалану, сондай-ақ, республикалық бюджеттен трансферттер қалыптастыру бойынша жұмыстар жүргізді. Бірнеше рет бюджеттік заң жобаларын қалыптастыру жөніндегі жұмыс тобының мүшесі болды. Осындай ауқымды жұмыстардың басы-қасында жүргендіктен болар, Р.Ысқақова облыстық мәслихаттың экономика, қаржы және жергілікті өзін-өзі басқару мәселелері жөніндегі тұрақты комиссиясының төрағасы болып сайланды. Сонымен бірге «Nur Otan» партиясының мүшесі болып, онда мемлекеттік қызметтер жөніндегі комиссияны басқарды.
Қазіргі таңда ақпараттық-насихаттық топтардың құрамында жүріп, негізгі бағдарламалық құжаттарды түсіндіруде халықпен кездесулерге белсенді қатысып келеді. Халық қалаулысы аудандарға жиі барып, тұрғындардың ұсыныстары мен тілектерін тыңдауды, оларға көмек беруді әдетке айналдырған. Алдына келген әрбір азаматтың өтінішін орындауға, түйткілді мәселенің шешімін табуда күш-жігерін аянып қалған емес.
Азаматтарға қабылдау өткізгенде тұрғындар тарапынан жолдарды жөндеу, сумен жабдықтау, газдандыру, санитария, сауда ережелері, абаттандыру және көгалдандыру, жұмыспен қамту, әлеуметтік қорғау және тағы басқа мәселелер жиі көтерілетін көрінеді. Жұмыс орнында да кезектен тыс азаматтарды қабылдап, олардың өтініштерінің мүмкіндігінше орындалуына дәнекер болып отыр.
– Халыққа жақын болу, олардың қажеттіліктерін сезіну және келелі мәселелерді жергілікті атқарушы органдар өкілдеріне жеткізу – депутаттың басты ұстанымы. Менің түсінігімде депутат саналы, әділ, адал, жауапты болуы керек. Негізгі жұмыс пен депутаттық міндеттерді үйлестіру үшін көп күш-жігер қажет. Депутат болу – абырой ғана емес, бұл сайлаушылар алдындағы үлкен жауапкершілік, – дейді ол.
Айта кетейік, Р.Ысқақова көп жылдық адал еңбегінің арқасында құрметке де ие болып келеді. ҚР Қаржы министрлігінің «Қаржы саласының үздігі», ҚР Мемлекеттік қызмет істері және сыбайлас жемқорлыққа қарсы күрес агенттігінің «Үздік мемлекеттік қызметші» төсбелгісімен, «Ерен еңбегі үшін» мемлекеттік медалімен және ҚР Премьер-министрі, Парламент Сенаты төрағасының алғыс хаттарымен марапатталған.
>>> Біздің Facebook, Instagram парақшаларымыз бен Telegram каналымызға жазылыңыз! <<<
