Облыстық ардагерлер кеңесінің ұйымдастыруымен Қызылорда қаласының астана болғанына 100 жыл және қазақ вальсінің королі Шәмші Қалдаяқовтың туғанына 95 жыл толуына орай А.Тоқмағамбетов атындағы қалалық мәдениет үйінде «Қазақ вальсінің королі – Шәмші» тақырыбында ардагерлер арасында облыстық ән байқауы өтті.
Байқаудың ашылуында сөз сөйлеген облыстық ардагерлер кеңесінің жауапты хатшысы Мақсұт Баекеев жыл сайын дәстүрлі түрде өтетін ардагерлер арасындағы ән байқауының жас ұрпақ үшін тәрбиелік мәні зор, жалпы көрерменнің ықыласы ерекше екенін атап өтті.
Байқауға 20 ардагер қатысты. Олар екі бөлім бойынша өнер көрсетті. Алғашқысы – Ш.Қалдаяқов әндерін, екіншісі – Сыр елі, Қызылорда туралы әндерді орындау.
Ән байқауының қорытындысымен Саракүл Асанбаева (Шиелі ауданы) бас жүлде, Тәжімбет Болатбек (Арал ауданы) І орын, Керекжан Құлмырзаев (Қармақшы ауданы), Роза Тұрмағамбетқызы (Сырдария ауданы) ІІ орын, Сұлтан Назаров (Қызылорда қаласы), Дәріқұл Махамбетов (Байқоңыр қаласы), Маржанкүл Ахай (Қазалы ауданы) ІІІ орын иеленді.
Ардагерлердің ән байқауына Қазақстанның еңбек сіңірген қайраткері, «Құрмет» орденінің иегері Рамазан Тайманов, Мәдениет саласының үздігі Ләйла Нәсімханова, «Мәдениет қайраткері» төсбелгісінің иегері Сәбит Ұлықпан қазылық етті.
«СБ» ақпарат
