Қызылордада «Қазақ зағиптар қоғамы» облыстық филиалының ұйымдастыруымен «Шексіз әлем – шектеусіз мүмкіндік» атты зағип және нашар көретін жандар арасында өткен республикалық өнер байқауының қортынды кезеңі өтті.
Аталған өнер додасы ерекше жандарға мәдени және рухани қолдау көрсетіп, жаңа талант иелерін анықтау, өнерпаздардың шығармашылық байланыстары мен достық қарым-қатынастарын нығайту, олар үшін кедергісіз орта қалыптастыру мақсатында ұйымдастырылды.
Байқауға еліміздің 9 облысынан он ұжым қатысты.
Қызылорда қаласы әкімінің орынбасары Дархан Тұрсынбаев шараның шымылдығын ашып, қатысушыларға сәттілік тіледі.
Ерекше жандар арасында өткен өнер байқауының бас жүлдесі мен 500 мың теңге жүлде Түркістан облысының өнерпаздарына бұйырса, бірінші орынды (жүлде қоры 400 мың теңге) Батыс Қазақстан облысы иеленді. Ал Атырау облысының қатысушылары екінші орын мен 300 мың теңгелік сертификатқа ие болды. Сондай-ақ, Жетісу мен Қызылорда облыстары үшінші орын және 150 мың теңгеден сыйақы еншіледі. Барлық қатысушыларға Қызылорда қаласы әкімінің Алғыс хатты мен 100 мың теңге ақшалай сыйлық табысталды.
Осы республикалық байқауға Қызылорда өнерпаздары ұжымының құрамында көркемсөз жанры бойынша қатысқан қазалылық өнерпаз, Серікбол Шайхов өзінің мәнерлеп оқу ерекшелігімен көрермендердің арнайы ықыласына ие болды.
Әлімжан ҚИЯС,
Қазақстан Журналистер одағының мүшесі.
Қазалы ауданы
>>> Біздің Facebook, Instagram парақшаларымыз бен Telegram каналымызға жазылыңыз! <<<
