Трагедияда кешегі ХVІІІ-ХІХ ғасырда өмір сүрген қоғам зиялысы, ағартушы, ақын Абай Құнанбайұлының болмысы сомдалған. Айналасындағы әділетсіздіктен, қарама-қайшылықтардан жаны байыз таппаған ақынның басынан кешкен тартысты тағдыры толғандырып, әсіресе, ақын өмірінің соңғы сәттері көрерменді ауыр ойға жетелейді.
Айта кетейік, фестиваль аясында театр өнерінің дамуына серпін беру және шығармашылық ұжымдардың кәсіби тәжірибе алмасуына жағдай жасау басты ұстаным болып отыр. Бұл туралы алдын ала БАҚ өкілдерінің қатысуымен өткен брифингте айтылды.
Баспасөз алаңында сұхбат берген Н.Бекежанов атындағы қазақ академиялық музыкалық-драма театрының басшысы Мұхтар Ниязов, Қазақстанның еңбек сіңірген қайраткері, режиссер Хұсейін Әмір-Темір, өнертану докторы, профессор Бақыт Нұрпейіс, өнертану кандидаты, профессор Зухра Исламбаева, театр сыншылары театрішілік фестивальдің өтуі іргелі өнер ұжымының рухани тынысын ашып, ізденісін арттыра түсетінін атап өтті. Сондай-ақ пікір айтушылар бағдарламада ұсынылып отырған мистикалық триллер, трагедия, буффонада ертегі, психологиялық және деректі драмалар, моноспектакль, қуыршақ театры сынды түрлі жанрдағы қойылымдарды тамашалау арқылы көрермен айрықша шығармашылық атмосфераны сезінетініне сенім білдірді.
Режиссер Хұсейін Әмір-Темірдің айтуынша, Н.Бекежанов атындағы қазақ академиялық музыкалық-драма театрында театрішілік фестиваль бірінші рет ұйымдастырылып отыр.
–Театр жанындағы көркемдік кеңестің ұйғарымымен фестиваль бағдарламасында түрлі жанрдағы тоғыз спектакль көрермен назарына ұсынылады. Әр спектакльден кейін талдау жасалып, артық-кем тұсы сарапталып, актерлерге бағыт-бағдар беріледі. Ол үшін Алматы қаласындағы Т.Жүргенов атындағы Өнер академиясынан театр сыншылары шақырылды. Бір сөзбен айтқанда, бұл фестиваль театрдың шығармашылық деңгейін көтеру арқылы жаңа ізденістерге жол ашып, бәсекелестікті арттырады, – дейді ол.
Өнертану докторы, профессор Бақыт Нұрпейіс театрішілік фестиваль өткізу тәжірибесі алғаш рет М.Әуезов атындағы қазақ драма театрынан бастау алғанын, қазір де еліміздің бірқатар театрында ұйымдастырылып, соған сәйкес нәтижелі жұмыстар атқарылып келе жатқанына тоқталды.
Ел өнерін алыс-жақын шетелдерге танытып жүрген Н.Бекежанов атындағы қазақ академиялық музыкалық-драма театры да осындай театрішілік талдаулар арқылы шығармашылық ұжымның деңгейін көтеріп, актерлердің ізденісіне зор мүмкіндік беретінін айтты.
– Бұл театрды бұрыннан жақсы білеміз. Осыған дейін де премьераларға келіп, қатысып жүрміз. Бүгінде өтіп жатқан театрішілік фестивальде әртүрлі жанрдағы пьесалар қамтылған екен. Осының өзі шығармашылық ортада ізденістің бар екенін, театр жұмысы дұрыс жолға қойылғанын аңғартады. Дегенмен бағдарламадағы спектакльдерді көріп болған соң, лайықты баға беріледі, – дейді театр сыншысы, Т.Жүргенов атындағы Өнер академиясының профессоры Зухра Исламбаева.
Жоғарыда айтып өткеніміздей, фестиваль барысында, яғни, 16-20 наурыз аралығында Э.Распенің «Мюнхгаузеннің әлемі» буффонада ертегісі, А.Елгезектің «Болмаған балалық шақ» драмасы, Х.К.Андерсеннің «Ұсқынсыз үйрек» қуыршақ қойылымы, А.Володиннің «Кездесу мен қоштасу» психологиялық драмасы, сонымен қатар А.Ахметтің «Шырмауық» моноспектаклі мен М.Омарованың «Шанель №5» деректі драмасы көрермен назарына ұсынылады. Фестиваль 20 наурыз күні Д.Исабековтің «Құстар фестивалі» музыкалық қойылымымен қорытындыланады.
Фестивальді ұйымдастырушылар «Nartai Theatre Fest – 2026» театр өнерінің шығармашылық әлеуетін танытып, көрермен мен сахна арасындағы рухани байланысты нығайтатын мәдени алаң ретінде актерлердің жаңа қырын ашуға оң ықпал ететініне сенімді.
Ғазиза ӘБІЛДА,
«Сыр бойы»
