Былтыр Қызылорда қаласының сол жағалауында қазығы қағылып, енді екі күнде елдің игілігіне айналатын «Қайсар-арена» стадионының ашылуы Қазақстан футболы тарихындағы ерекше оқиғаның біріне айналғалы тұр. Тәуелсіз Қазақстанда бұл спорттық нысан жаңадан бой көтерген үшінші стадион болады. Мемлекет басшысы Қасым-Жомарт Тоқаевтың тапсырмасы бойынша елімізде жаңа стадиондар салу мәселесін Сыр өңірі алғашқы болып жүзеге асырды. Бұл – биыл Қазақ елінің алғашқы астанасы мәртебесіне ие болғанына 100 жыл толған Қызылорда қаласының мерейтойына айрықша тарту.
Кейінгі жылдары ел футболы тарихында ерекше оқиғалар болып жатыр. Биыл алматылық «Қайрат» UEFA Чемпиондар лигасы негізгі кезеңіне дейін жетті. Күні кеше жарыстың осы сатысында әлемге әйгілі «Реал Мадрид» секілді алпауыт клубпен өз алаңында шеберлік байқасты. Алдағы уақытта дәл осындай биіктіктен қызылордалық «Қайсар» да көрінеді деген сенімдеміз.
Кейінгі жылдары ел футболы тарихында ерекше оқиғалар болып жатыр. Биыл алматылық «Қайрат» UEFA Чемпиондар лигасы негізгі кезеңіне дейін жетті. Күні кеше жарыстың осы сатысында әлемге әйгілі «Реал Мадрид» секілді алпауыт клубпен өз алаңында шеберлік байқасты. Алдағы уақытта дәл осындай биіктіктен қызылордалық «Қайсар» да көрінеді деген сенімдеміз.
Жергілікті «Қайсар» командасының құрылғанына алпыс жылға жуықтады. Қай кезде де облыс басшылығы тарапынан клубқа қолдау көрсетіледі. Қазірге дейін елдің игілігіне айналып жүрген «Локомотив» және Ғ.Мұратбаев атындағы орталық стадион өз қызметін атқарып келеді. Дегенмен заман талабына сай жаңа стадион салу мәселесі күн тәртібіне шығып, жанкүйерлердің ұсынысы облыс басшылығынан қолдау тапты. Осылайша облыс әкімі Нұрлыбек Нәлібаевтың табандылығымен былтыр жаңа аренаның іргетасы қаланды.
Алғашқыда 7 мың адамға арналған спорттық нысан қайта талқылау барысында тағы 4 мың адамға ұлғайтылды. Осылайша жобаға түзету енгізіліп, спорттық нысан 11 мың адамды қабылдауға мүмкіндік туды. Бұрын жанкүйерлер стадионның екі жағында отырады деп жоспарланған еді. Енді екі қақпаның артында да екі мыңнан жанкүйерге арналған орындар орналасты.
Жаңа стадион үлкен мүмкіндіктерге жол ашады. Ендігі мақсат – онда халықаралық деңгейде ойындар өткізу. Оған толықтай сай келеді. Ғимараттың ішкі бөлігінде тоғыз спорт залы, түрлі үйірмелер орналасады. Ол орындар жас өрендердің тыңғылықты дайындық жасауына үлкен мүмкіндік.
Жанкүйерге арналған орындардың төбесі металл шатырмен жабылған. Бұл жөнінен стадионды салған «Нұрлы тау» компаниясының мол тәжірибесі бар. Көп жылдан бері металл құрылғыларын жасаумен айналысқан олар бұл жұмысты өз деңгейінде атқарып шықты. Трибунаның биіктігі мен жанкүйер орны еуропалық стандартқа сай келеді. Стадионға келген әрбір адам еш кедергісіз ойынды тамашалай алады. Бұрынғы стадиондағы секілді шатыр тіреулері жоқ. Бұл адамға жайлы. Металл құрылғының барлығы жергілікті жерде дайындалған. Жанкүйерге қолайлы болу үшін екі табло қойылады. Сол арқылы стадионға келушілер көбірек ақпарат алады. Оған қоса әрбір орындыққа нөмір жазылады.
UEFA талабы бойынша стадион айналасында 1000 автокөлікке арналған тұрақтың болуы ескерілген. Ал солтүстік трибуна жағынан серуендеуге арналған аллея іске қосылады. Онда түрлі ағаш пен гүлдер егіледі. Бұл көпшілік үшін жайлы орынның бірі болмақ. Оңтүстік және солтүстік трибуна аралығында кафе мен жеңіл тамақтар сататын орындар бар.
Алғашқыда стадион UEFA-ның үшінші санатына сай салынатыны айтылған. Десе де онда жанкүйерлер отыратын орындықтар саны артып, алаң, жарықтандыру және өзге де талаптар халықаралық стандарттарға сәйкестендірілді. Облыстық денешынықтыру, спорт және туризм басқармасының хабарлауынша, спорттық нысан төртінші санатқа сәйкес сертификатталды. Енді онда UEFA-ның жоғары деңгейдегі барлық ойынын өткізуге мүмкіндік бар.
Сонымен 4 қазанда жаңа стадион Қазақстан кубогы финалындағы «Ордабасы» және «Тобыл» кездесуімен ашылады. Ол алғашқы әрі ірі спорттық шараның бірі болмақ.
Бет қатталып жатқанда сүйінші хабар келіп жетті. Жаңа стадион FIFA тестілеуінен өтіп, жоғары деңгейлі «QUALITY PRO» сертификатына ие болды. Заманауи үлгіде салынған спорттық нысанда енді жоғары деңгейдегі матчтар өткізуге толық мүмкіндік бар.
Әділжан ҮМБЕТ,
«Сыр бойы»
