Өзінің үш жылдық жұмысында Ұлттық құрылтай қоғамды нығайтуға бағытталған идеяларды ұсынумен ерекшеленді. Сол арқылы стратегиялық қадамдарды әзірлейтін негізгі институт ретінде қалыптасты. Оның дамуы мен нақты бастамаларды жүзеге асыруы өзектілігін дәлелдеді.
Алдағы уақытта Ұлттық құрылтайдың бесінші отырысы Алаш баласы үшін қасиетті мекен – Сыр өңірінде өтетін болып шешілді. Мемлекет басшысы Қасым-Жомарт Тоқаев кеше Көкшетауда болған төртінші отырысында Қызылорданың қазақ халқының тарихында айрықша орны бар екенін атап өтті. Жүз жыл бұрын ел астанасы мәртебесін иеленіп, ұлт атауының қайта оралуына ұйытқы болған Қызылорда биыл сол атаулы оқиғаның ғасырлық тойын атап өткелі отыр.
Қай кезде де Сыр өңірі байыпты бастама, жарқын жобалар, іргелі істерімен ерекшеленеді. Облыстың дамуында инфрақұрылымдық бастамалардың маңызы зор. Бұл бағытта бізде жасалып жатқан жұмыстар аз емес. Мәселен, «Акса Энерджи» түрік компаниясының инвестициясы есебінен қуаттылығы 240 мегаваттық жаңа жылу-электр орталығының құрылысы қарқынды жүруде.
Сондай-ақ өңірде «Қызылорда-Жезқазған» тас жолының басым бөлігі пайдалануға берілді. Алдағы уақытта «Батыс Еуропа – Батыс Қытай» халықаралық дәлізінің Қызылорда мен Ақтөбе облысы аралығындағы бөлігін төрт жолақты етіп кеңейту қолға алынбақ. Былтыр облыс орталығындағы «Қорқыт ата әуежайында» жаңа жолаушылар терминалы ел игілігіне айналды. Ал облыста халықтың 80 пайызға жуығы «көгілдір отынмен» қамтамасыз етілген. Қысқасы, мұндай тарихи шешімнің қабылдануы өңірдің дамуын жаңа сатыға көтереді.
Жорабек НҰРЫМБЕТОВ,
облыстық мәслихат депутаты
>>> Біздің Facebook, Instagram парақшаларымыз бен Telegram каналымызға жазылыңыз! <<<
