Биыл И.Әбдікәрімов атындағы Қызылорда аграрлық-техникалық жоғары колледжінің ашылғанына 95 жыл толды. Тарихы терең білім ордасының негізі 1930 жылы қаланған. Бүгінде колледж өңірдегі кәсіби мамандар даярлайтын іргелі оқу орнына айналды.
Кеше колледждің 95 жылдығы жоғары деңгейде аталып өтті. Оған Парламент Мәжілісінің депутаты М.Жайымбетов, облыстық білім басқармасының қызметкерлері, сала ардагерлері, колледжді басқарған азаматтар, түлектер, оқытушылар мен студенттер қатысты.
Алдымен шараға қатысушылар мемлекет және қоғам қайраткері, Социалистік Еңбек ері И.Әбдікәрімовтің ескерткішіне гүл шоқтарын қойды. Мұнан кейін колледж музейімен танысты. Онда оқу орнының тарихы, тынысы, жеткен жетістігі жайында және әр кезеңде басқарған басшылары жайлы тың ақпарат ұсынылған.
Бұдан кейін оқу ғимаратының екінші қабатында орналасқан Мәжит Өтемұратов атындағы виртуалды зертхананың ашылуы өтті. Колледждің 95 жылдығымен қатар оны 2007-2015 жылдары басқарған іскер басшы Мәжит Өтемұратовтың туғанына 80 жыл толды. Осы орайда оның ұрпақтары арнайы виртуалды тренажер оқу зертханасының ашылуына қатысты. Зертхана Б.Өтемұратов қорының демеушілігімен заман талабына сай жабдықталған.
Шарада Парламент Мәжілісінің депутаты, колледж түлегі Мархабат Жайымбетов оқу ордасы, бар ғұмырын білім саласының дамуына арнаған М.Өтемұратов жайында естелік айтты. Колледж директоры Абайбек Жүнісов еліміздегі арнаулы оқу орындары халықаралық салалық аккредиттеуден өту талабымен жұмыс жасап жатқанына тоқталды. Облыста алғашқы болып И.Әбдікәрімов атындағы Қызылорда аграрлық-техникалық жоғары колледжі энергетика мамандықтары бойынша АҚШ-тың Флорида штатындағы NCCER агенттігі арқылы халықаралық салалық аккредиттеуден сәтті өткенін жеткізді. Нәтижесінде агенттік жоғары бағасын беріп, куәлігін тапсырған. Сондай-ақ М.Өтемұратов басқарған жылдары колледждің жеткен жетістігіне тоқталып, жарыққа шыққан жаңа кітаппен таныстырды. Білікті әрі іскер басшы туралы медицина ғылымдарының докторы, профессор М.Шайдаров, сала ардагерлері естеліктерін бөлісті.
Колледждің материалдық-техникалық базасымен танысқан қонақтар акт залында өткен «Кәсіптік білім беру: өзекті мәселелер мен жаңа дәуір талаптары» атты ғылыми-практикалық конференцияға қатысты. Онда облыстық білім басқармасы басшысының орынбасары Әзизбек Ізімбетов облыс әкімі Н. Нәлібаевтың құттықтау хатын табыстады. Конференцияда колледж директоры А.Жүнісов «Erasmus+» бағдарламасы және ТжКБ саласындағы халықаралық ынтымақтастық», Германиядан келген инженер Ульрих Шперлинг «Германияның кәсіптік білім беру тәжірибесі және техникалық, кәсіптік білім беру жүйесіне ықпалы», «Apec Training Center» ЖШС директоры Бөгенбай Татаев «Болашақтағы кәсіби мамандарды даярлаудың маңыздылығы және әлеуметтік серіктестіктермен оқу орындарының тығыз байланысы», облыстық кәсіпкерлер палатасының директоры П.Сыздық «Кадрлық әлеует – кәсіпкерлік пен инвестициялық дамудың негізгі факторы» атты тақырыпта баяндама жасады.
Бүгінде колледжді бітірген түлектер сан тарапта, түрлі салада абыройлы еңбек етіп жүр. Олар өздері білім алған оқу ордасымен мақтанады. Солардың бірқатары демеушілік есебінен колледждің материалдық-техникалық базасын нығайту мақсатында кабинеттерді соңғы технологиямен жабдықтап, студенттердің сапалы білім алуына үлес қосып келеді.
Шараның соңы «Достық үйіндегі» «Тарихта айқын таңбасы, іргелі білім ордасы» атты мерекелік кешпен қорытындыланды. Онда іргелі білім ордасының өркендеуіне, дамуына елеулі үлес қосып жүрген ұстаздар облыстық білім басқармасының Құрмет грамотасымен, Алғыс хатымен марапатталды. Сондай-ақ білім беру ісіне сіңірген еңбегі үшін бірқатар азамат И.Әбдікәрімов атындағы Қызылорда аграрлық-техникалық жоғары колледжі медалін иеленді. Салтанатты шарада жергілікті өнерпаздар ән-жырдан шашу шашты.
Сара АДАЙБАЕВА,
«Сыр бойы»
