Әлеуметтік сала реформаларының басты мақсаты – халықтың тұрмыс жағдайын, өмір сүру сапасын арттыру. Оның жұмыс нәтижесі де халықтың әл-ауқаты мен әлеуметтік жағдайының тұрақталуымен өлшенеді. Аймақта бұл бағытта жүргізіліп жатқан жұмыстар мен жобалар аз емес. Атқарылған істердің нәтижесінде халықты тұрақты жұмысқа орналастыру бойынша республикада алдыңғы орындардан көрініп келеді.
Кейінгі жылдары облыста «Өңірлік жұмыспен қамту» картасы шеңберінде 124758 адам жұмыспен қамтылды. Соның ішінде «10 мың халыққа 100 жаңа жұмыс орнын құру» Мемлекет басшысының тапсырмасына сәйкес 50347 адам тұрақты жұмысқа орналасты.
Кейінгі уақытта жұмыссыздық деңгейі жұмыс күшіне қарағанда 4,9-дан 4,5 пайызға дейін, жастар арасындағы жұмыссыздық 4-тен 3,4 пайызға дейін төмендеді. Сонымен қатар 8065 осал топтағыларға «мемлекеттік қайтарымсыз грант» беріліп, олар жеке кәсібін ашты. Жастарға да кәсіп ашуға мүмкіндік көп. Мәселен, 2023 жылы жеңілдетілген 2,5 пайызбен несие беріліп, 492 жас өз кәсібін ашуға мүмкіндік алған.
Қазір атаулы әлеуметтік көмек шын мұқтаждарға ғана беріледі. Мемлекет басшысы биыл да Үкіметтің кеңейтілген отырысында мемлекет тарапынан берілетін әлеуметтік көмек шын мұқтаждарға жетуін баса айтқан еді. Соның нәтижесінде кейінгі төрт жылда көмек алушының саны 13747 отбасынан 4468 отбасыға немесе 3 есеге азайды.
2022 жылдан бастап мүгедектігі бар адамдар мен балаларды әлеуметтік қолдауға арналған, оның ішінде олардың қатысуымен спорт жарыстары, фестиваль, кино, музей, театр әлеміне, тарихи орындарға саяхат жасау, «3 желтоқсан Халықаралық мүгедектер күнін» атап өту шараларына бағытталған әлеуметтік маңызы бар жоба іске асырылуда. Ал 2023 жылдан бастап санаторий-курорттық емделу қызметіне оңалтудың жеке бағдарламасы әзірленген бірінші топтағы мүгедектігі бар адамдарды әлеуметтік қорғау саласында жағдай жасау мақсатында жылына бір рет оларға ілесіп жүрушінің шығындары өтелетін болды. 2024 жылы алғаш рет облыс бойынша барлық санаттағы мүгедектігі бар адамдар мен мүгедектігі бар балаларға әрқайсысына 3 айлық есептік көрсеткіш мөлшерінде Ұлттық мереке – 25 қазан Республика күніне орай бір реттік әлеуметтік көмек берілуде.
2024 жылы «Халық банк» акционерлік қоғамы тарапынан банктің жүз жылдығына арналған «100 игі іс» науқаны аясында Қызылорда және Байқоңыр қалаларына мүгедектігі бар адамдарды тасымалдауға әрқайсысының құны 23,0 млн теңге тұратын арнайы 2 инватакси көлігі сыйға тартылды. 2025 жылы «INTERTASCO» ЖШС Қызылорда қаласына мүгедектігі бар адамдарды тасымалдауға арнайы инватакси көлігін сыйға тартты.
«Үй жағдайында мүгедектігі бар балаларды оңалту» жобасы облыста 2024 жылдан бастап арнаулы әлеуметтік қызметтер көрсету балалар орталығы базасында іске қосылды. Жоба аясында «Қазақстан халқына» қоғамдық қоры тарапынан 283 млн теңгеге 95 дана оңалту құралы алынды. Кейінгі төрт жылда 10,4 млрд теңге бюджет қаражаты үнемделді.
Айсәуле ҚАРАПАЕВА,
«Сыр бойы»
