Облыстық ардагерлер кеңесінің ұйымдастыруымен «Анаға тағзым» орталығында ұлттық құндылықтарды дәріптеуге бағытталған «Ұршық үстіндегі ұлағат» сайысы өтті. Іс-шараны облыстық ардагерлер кеңесінің төрағасы С.Дүйсенбаев ашып, ұлт мұрасын ұлықтап, дәстүрімізді дәріптеудің бүгінгі ұрпақ үшін ерекше маңызды екенін атап өтті.
Сайыста ұлттық салт-дәстүрді кеңінен таныстырумен қатар, қолөнерді насихаттау, әже мен немере арасындағы рухани байланысты нығайту тақырыбы тарқатылды. Қазақтың мақал-мәтелдері, халық әндері арқылы жанға жылылық ұялата отырып, жас ұрпақты тәлім-тәрбиеге баулуға мән берілді. Тағылымды іс-шараға қаладан, аудандардан іріктелген 20 әже немерелерімен бірге қатысты. Бүлдіршіндер әжелерімен бірге сахнаға шығып, өнер көрсетті.
Үш кезеңнен тұратын сайыстың алғашқысы – «Таныстыру» кезеңінде әжелер немерелерімен бірге туған жері, ата-бабасы туралы көркем сөзбен кестелеп, өлең жолдарымен әсерлеп жеткізді. Бірі отбасының жетістігін мақтаныш етсе, енді бірі туған өңірінің ерекшелігін жырға қосты.
Қолөнер шеберлігі кезеңінде әжелер сырмақ сырып, ұршық иіріп, тоқыма тоқып, ұлтымыздың керемет бай дәстүрін көпшілік назарына ұсынды. Қариялардың көз алдында кешегі күндердің естелігі жаңғырып өтіп, көңілдерін толқытты. Үлкендіктің ізімен немерелеріне ұлағатты сөздер айтып, халық әндерін әуелете шырқаған әжелерге зал толы көрермен ыстық ықыласын білдіріп, зор қошемет көрсетті.
Ұлттық салт-дәстүр кезеңінде қазылар алқасы қазақтың тұрмыс-салтына қатысты сұрақтар қойды. Әжелер бұл сұрақтарға немерелеріне бағыттап жауап беріп, тұсау кесу, бесікке салу, қыз ұзату сияқты ғұрыптардың мәнін түсіндірді. Айта кетейік, байқауға Рая Ділімбетова, Разия Қалжанова, Феруза Оңталап сынды мәдениет саласының ардагерлері қазылық етті.
Сайыс қорытындысымен, жүлделі I орынды Сырдария ауданынан Рахима Досжанова немересімен иеленсе, ІІ орынды Жалағаш ауданынан Қайыпкүл Отарова, ІІІ орынды Жаңақорған ауданынан Назия Опабекова алды. Барлық қатысушыларға алғыс хат табысталып, өнерпаздарға ынталандыру сыйлықтары берілді.
Бір сөзбен айтқанда, «Ұршық үстіндегі ұлағат» сайысы ұлттық дәстүрді ұрпақ санасына сіңіріп, көненің көзінен ғибрат алудың айқын үлгісі болды. Әжелердің өнегесі мен немерелердің ізденісі арқылы халқымыздың бай мұрасы қайта жаңғырып, жас буынға аманат ретінде жол тартты.
Ғазиза ӘБІЛДА,
«Сыр бойы»
