«Бердібек Сапарбаевтың феномені қандай?» деген сұраққа мен былай деп жауап берер едім. Бердібек Машбекұлының бойында біріншіден, мемлекетшіл, ұлтжанды, білімді, қарапайымдылық қасиеттерін айтуға болады.
Соған қарамастан талапшылдығы да бар еді. Мен бұл қасиеттерін бірге қызмет жасаған уақыттары байқадым. Ол кісі тек талапшыл басшы емес, сонымен бірге адаммен жақсы сөйлесе алатын, әрбір жанды түсіне алатын қарапайым азамат болатын. Осындай біліктілігінің арқасында 95-ші жылдардың аяғында экономикасы құлдырап тұрған Қызылорда облысына келіп, 1-2 жылда жақсы деңгейге көтерді.
Мемлекет басшылары қай аймақта қиын мәселе болса, сол жерге жіберетін. Ол кісі бес аймақты басқарды, қазіргі кезеңмен салыстырғанда жеті аймақ десе де болады. Сол облыстардағы ел-халықтың тұрмыстық жағдайын көтере білді. Халықтың мұң-мұқтажына құлақ түріп, ризашылығын алды.
Қызмет ауыстырған кездері жұртшылық қимастықпен шығарып салатын. Сондай қасиеттерінің арқасында мемлекеттен де лайықты бағасын алды. Дегенмен, Бекеңнің еліне бергенінен берері көп еді. Әттең, уақыт бір орнында тұрмайды. Оның соңында өнегелі ісі, елінің алғаусыз ризашылығы, еңбегінің үлгісі қалды. Сондықтан арда азаматтың елі барда есімі ешуақытта ұмытылмайды деп ойлаймын.
Бекмырза ЕЛАМАНОВ,
мемлекет және қоғам қайраткері
