Сурет: Zakon.kz
ҚР Бас прокурорының орынбасары Ғабит Садырбеков ел аумағынан заңсыз шығарылған активтерді қайтару жұмысы туралы айтты, деп хабарлайды Zakon.kz.
Ғабит Садырбеков «Хабар 24» телеарнасының эфирінде мемлекет басшысының тапсырмасы бойынша құқық қорғау органдары 2023 жылдың басынан бері тиісті жұмысты атқарып жатқанын айтты.
«Бүгінде мемлекетке 1 триллион теңгеге жуық активтер қайтарылды. Оның 600 миллионға жуығы – басқа юрисдикциялардан қайтарылған активтер. Мысалы, БАӘ-ден 15 миллионға жуық доллар, Австриядан 82 миллион, Лихтенштейннен 260 миллион, Гонконгтан 2 миллион доллар қайтарылды», – дейді Ғабит Садырбеков.
Сонымен қатар оның айтуынша, қолма-қол ақшадан бөлек, ірі компаниялардың акциялары мен үлестері, қонақүйлер, базарлар, бизнес орталықтары, зергерлік бұйымдар, элиталы жерлер, теміржол жолдары және басқа да стратегиялық маңызды нысандар мемлекетке қайтарылды.
Ол жалпы қайтарылатын болжамды сома туралы айта отырып, арнайы жоспарланған көрсеткіш пен шектеулердің жоқ екенін айтты.
«Біз заңсыз алынғанның және тәркіленгеннің бәрін қайтарамыз», – деп түйіндеді ол.
2023 жылдың 3 қазанында Ғабит Садырбеков Қазақстан Бас прокурорының орынбасары болып тағайындалды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
