Жалағаш ауданына қарасты «Таң» ауылы – өзіне тән тіршілік қалыбы қалыптасқан, заман талабынан қалыс қалмай, өркениет көшіне ілескен елді мекен. Бірлігі бекем ауылға бақ дарып, береке тұрақтаған. Халқымызда «Ауылын көріп, азаматын таны» деген сөз бар. Ауылдың тумасы, бүгінгі буын ұрпақтың алдында ағалық міндетін абыроймен алып жүрген азамат, айтары бар ардагер, Білім беру ісінің озық қызметкері Темірбек Есжановтың да елдің әлеуетін көтеруде еңбегі зор.
Соғыстан кейінгі қиын кезеңде өмірге келген Темірбек бала болып қызық қуған жоқ, ертерек есейді. Бозбала шағында әскер қатарына алынып, одан әрі екінші дүниежүзілік соғыста ерлігімен танылған әкесі Әубәкір балаларын барынша төзімділікке баулып, тәртіпке үйретті. Алғашқыда ата-анасына қолғабыс ете жүріп, ат шылбырын ұстаған Темірбек те шаруашылық жайын жастайынан жадына түйіп өсті. Айталық, 1966 жылы №34 «Иіркөл» орта мектебін бітіріп, «Коммунизм» кеңшарында жұмысшы, 1967 жылдан бастап жаңадан құрылған «Таң» кеңшарында механизатор болып еңбек жолын бастады.
Алдына қойған мақсаты айқын жас жігіт жоғары білім алып, жүрегі қалаған мамандықты меңгеруді бір сәт ойынан шығарған емес. Осылайша ауылда еңбек ете жүріп, Н.Гоголь атындағы Қызылорда педагогикалық институтының «Филология» факультетіне түсіп, оқу орнын «Музыка және әдебиет пәні мұғалімі» мамандығы бойынша 1971 жылы бітіріп шықты.
Айта кетейік, Темірбек ағамыз 1970 жылы Қазалы ауданы «Құмжиек» ауылының тумасы Зияда Оразымбетовамен тағдырын тоғыстырып, шаңырақ көтерді. Алғашқы ұстаздық жолы туған ауылындағы №118 «Таң» орта мектебінде басталды. Дәлірек айтсақ, 1975-1980 жылдар аралығында осы мектеп директорының тәрбие жұмыстары, одан кейін оқу ісі жөніндегі орынбасары, 1980-1983 жылдары Мырзабай ахун ауылындағы №122 орта мектеп директорының оқу ісі жөніндегі орынбасары қызметін атқарып, білім саласында мол тәжірибе жинақтады.
Ұстаздық дейтін ұлы міндетті атқаруда олар қатар жүріп қызмет етті. Нақтырақ айтсақ, М.Мәметова атындағы педагогикалық училищені 1971 жылы бітірген Зияда Дәниқызы «Таң» ауылындағы балабақшада тәрбиеші болып еңбек жолын бастап, №118 «Таң» орта мектебінде мұғалім, одан кейін балабақша әдіскері болды. Ал 1980-1983 жылдары қазіргі Мырзабай ахун ауылындағы балабақшада меңгерушілік қызмет атқарды. 1981-1983 жылдары «1 Май» ауылдық кеңесінен депутат болып сайланып, халық қалаулысы атанды.
Отбасында алты бала тәрбиелеп өсіріп, «Күміс алқа» иегері атанды, 18 немере сүйіп отыр.
Сексенінші жылдардың бас кезінде Темірбек Әубәкірұлының еңбек жолы жаңа арнаға бұрылды. 1983-1987 жылдары «Таң» кеңшары кәсіподақ комитетінің төрағасы, 1987-1992 жылдар аралығында ауылдық кеңес атқару комитетінің төрағасы, 1992-1995 жылдары кеңшар директоры қызметін абыроймен атқарды. Өндірістен қол үзбей жүріп, Қызылорда ауыл шаруашылығы техникумын және идеология кадрларын дайындайтын университеттің «Философия» бөлімін бітіріп, білімін жетілдірді. Осы жылдары жұбайы Зияда Дәниқызы «Таң» кеңшарындағы жаңа типті балабақшаның әдіскері қызметіне келіп, 1998 жылы құрметті еңбек демалысына шықты.
Ал Темірбек Есжанов 1996-2011 жылдары аймақтың оқу-ағарту саласындағы қызметін қайта жалғастырып, Қызылорда қаласы білім бөлімінің қызметкері, қаладағы №235 және №173 орта мектептерінде директордың оқу ісі жөніндегі орынбасары қызметін атқарды. Білім саласында бірге қызмет еткен әріптестерінің айтуынша, әсіресе, тәрбие бағытындағы жұмыстарда тың бастамаларды жүзеге асырып, өзіндік қолтаңбасын қалдырған.
Жан дүниесі шығармашылыққа жақын, ел аузынан естіген құнды деректерін, одан бөлек, өзінің өмірден жиған-тергенін қағаз бетіне түсіріп, көпке ұсынып жүретін Темірбек Әубәкірұлы құрметті еңбек демалысына шыққаннан кейін де қолынан қаламын тастамай, журналистік бағытта қызметін жалғастырды. Айталық, 2011-2013 жылдары «Ел тілегі» газетінде аға кеңесші, 2013-2019 жылдары осы газеттің бас редакторы болып, басылым арқылы қоғамдағы өзекті мәселелерге үн қосты. 2002 жылдан Қазақстан Журналистер одағының мүшесі. Тарихи-танымдық мақалалары мен әдеби шығармалары мерзімді баспасөз бетінде үздіксіз жарияланып келеді.
Жоғарыда айтып өткеніміздей, көңіл сүзгісінен өтіп, көкірегін толқытқан дүниелері бір-бір туындыға айналды. Бүгінде «Жақсыда жаттық жоқ», «Көз көрген», «Тағдырым», «Керуен», «Ақ толқын», «Бір нәзік сәуле», «Қызылжарма кешуі», «Ауылдан аттанған», «Толғауы тоқсан тіршілік», «Белесжан» атты бірнеше кітаптың авторы. Барлық кітаптары республикалық Кітап палатасына тіркелген.
Еңбегі еленіп, «Қазақстан Республикасының білім беру ісінің озық қызметкері» төсбелгісімен, «Астанаға 10 жыл», «Қызылорда қаласына 200 жыл» мерекелік медальдарымен марапатталған. Сонымен қатар, үш мәрте жергілікті кеңес депутаты болып сайланды. «Қызылорда облысының құрметті ардагері» атанды.
Бұл күнде ағалық жастан ақсақалдық белеске аяқ басқан Темірбек ағамыз 77-ші көктемін қарсы алып отырса, зайыбы Зияда Дәниқызы 75 жасқа келді. Сондай-ақ өмір өзенінде қатар жүзген қос ұстаздың шаңырақ көтергеніне 55 жыл толып отыр.
«Әке көрген оқ жонар, шеше көрген тон пішер» деп атамыз қазақ айтпақшы, олардан тәлім алған ұл-қыздары қоғамға қалтқысыз қызмет етіп жүр. Иә, отбасы құндылығы жайлы жалпылама айта бергенше, осындай шаңырақ иелерінің шаттығын еселеп, мәртебесін көтеріп қойғанымыз мақұл болар дедік.
Ғазиза ӘБІЛДА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
