Президент Қасым-Жомарт Тоқаев халыққа арнаған Жолдауында «Жастардың бойындағы патриотизм – болашаққа деген шынайы ұмтылыс. Бұл – қоғам санасындағы өзгерістің айқын көрінісі. Мен олардың күш-жігеріне, дарыны мен біліміне сенемін» деген болатын. Осылайша жастарға ғылым-білім жолында жан-жақты қолдау көрсетілетінін атап өтті. Жас ұрпақтың патриотизмді қабылдау ерекшелігіне де тоқталды. Президенттің айтуынша, жастар елді сүюді жаңа іс бастау, халыққа пайдасы тиетін жаңалық ашумен байланыстырады. Олар Қазақстанды өркениетті, дамыған мемлекет ретінде көргісі келіп, заманауи технологияларды меңгеруге ұмтылуда.
Жалпы елімізде жастар саясаты мемлекеттік саясаттың маңызды құрамдас бөлігі болып саналады. Бұл саясат жастардың әлеуетін арттыруға, олардың білім алуына, кәсіби және жеке даму мүмкіндіктерін кеңейтуге бағытталған. Жастар – қоғамның ең белсенді әрі болашағы зор бөлігі болғандықтан, оларды қолдау елдің тұрақты дамуы үшін маңызды.
Өңірде жастар саясаты белсенді жүргізіледі. Соның ішінде Арал ауданы жастары да жетістікке жетіп келеді. Жалпы ауданда тұрғын саны 78829 болса, оның 25743-і 14-35 жас аралығында. Бұл – аудан халқының 31,2 пайызын жастар құрайды деген сөз.
Жастар саясатын жүзеге асыру мақсатында жыл басынан бері белгіленген 12 бағыт бойынша 187 іс-шара ұйымдастырылып, оған 11 564-тен астам жас қамтылды. Бұл туралы аудандық қоғамдық даму бөлімі, «Жастар ресурстық орталығы» коммуналдық мемлекеттік мекемесінің директоры Берік Сұлтаниязов кеңінен айтып берді.
– Жастар орталығы облыс әкімінің қолдауымен салынған, жаңа «Руханият орталығына» көшіп, өз жұмысын жаңа форматта ұйымдастыруды бастады. Онда жастарға арналған ашық алаң, шығармашылық орта және қоғаммен байланыс орталығы қызмет атқаруда. Жаңа ғимаратқа қоныс аударғаннан кейін жұмыс нақты жүйеленіп, барлық бағыт бойынша механизмдер енгізілді. Айтар болсақ, «Жас маман» жобасы бойынша 21 кездесу, «Дін және жастар» (24 кездесу), «Еріктілер мектебі» (23 мәдени-көпшілік шара), «Жастар қоғам назарында» 28 рейд жұмысы, «Мен спортты таңдаймын» 16 спорттық, «Жас кеңесші» 14 іс-шара, «Ашық есік» акциясы және кәсібін жаңадан бастаған жас кәсіпкерлермен «Jas kasipker» жобасы бойынша 29 бейнеролик түсіріліп, тиісті шаралар ұйымдастырылды, – дейді ол.
Орталық директорының айтуынша, жастар әркез белсенді, аудандағы барлық іс-шараға қатысып, қалыс қалған емес. Олар жан-жақты әрі ізденімпаз. Қайырымдылық, қоғамдық жұмыстар мен көпшілік-мәдени жиындарға үлес қосуда.
Жұмыспен қамтуда жүйелі іс бар
Биыл «Мансап» орталығына аудан бойынша жұмыс іздеуші ретінде 6 914 адам тіркелген. Оның 1463-і – жастар (21,5 пайыз). Жыл басынан бері 443 жас тұрақты жұмысқа орналасса, жастар тәжірибесінен өтуге 380 жолдама берілген. Сондай-ақ 236 жас қоғамдық, 15 адам әлеуметтік жұмыстарға тартылған.
Биылғы «Жасыл ел» еңбек жасағында маусымдық жұмыс жасаған жастар саны 110-ды құрады (Арал қаласы – 70, Сексеуіл кенті – 20, Жақсықылыш кенті – 20). Жастардың еңбек жасақтары тазалық іс-шараларына белсенді қатысуда. Мұндағы мақсат – жастардың демалыс уақытында бос жатпай, еңбек етіп, жалақы табуы ғана емес, өскелең ұрпақтың патриоттық тәрбие алуы. Осы орайда жасақ жастары экологиялық білімді арттыру және қоршаған ортаның ластануына жол бермеу, айналаны қоқыстан тазартып, салауатты өмір салты мен ерік-жігерді шыңдау, еңбекке баулу шараларына белсене атсалысуда.
Ал жыл басында NEET санатындағы жастар саны 360 болса, қазір «Мансап» орталығымен бірлесіп жүргізілген өзектендіру жұмыстарының нәтижесінде 107 жасты құрады. NEET санатындағы жастарға арналған 13 рет бос жұмыс орындары жәрмеңкесі өткізілді. Оның ішінде 8 бала күтімінде, 7 студент, 29 өзін-өзі жұмыспен қамтыған, 6 мекенжай бойынша көшіп кеткен, 9 тұрақты жұмысқа орналасқан, 42 жұмыссыз және 5 басқа қалада уақытша тұратын жастар бар.
Сонымен қатар, облыс әкімінің тапсырмасына сәйкес, NEET санатындағы және маргинал жастармен жұмыс жасау бойынша Арал ауданына 1585 жастың тізімі ұсынылды. Олар тұрғылықты мекенжайы бойынша кент және ауылдық округтерге бөлініп, жеке адрестік жұмыстар жүргізілді.
Нәтижесінде 1472 жастың жағдайы зерделеніп, қазіргі уақытта 113 жастың деректері анықталуда. Нақты айтар болсақ, 26 тұрақты жұмыстағы, 203 жұмыссыз, 253 өзін-өзі жұмыспен қамтыған және жалдамалы жұмыста, 44 уақытша жұмыспен қамтылған, 192 студент, 458 мүмкіндігі шектеулі, 12 үй шаруасында, 43 бала күтімінде, 5 әскерде, 2 шетелде жұмыста, 8 оқушы, 17 өзге өңірдегі, 5 істі болған, 64 мекенжайы қате жас пен 35 жастан асып кеткендер 137-ні құрады.
Кәсіпке бет бұрғандар
Жыл басынан бері аудан бойынша 4984 шағын және орта кәсіпкерлік субъектісі тіркелген. Оның ішінде 1903 кәсіпкерлік субъектісі жастарға тиесілі. Жас кәсіпкерлерді қаржылық қолдау мақсатында мемлекеттік бағдарламалар мен қаржы ұйымдары арқылы 31 жоба қаржыландырылды. Бұдан бөлек, жаңа бизнес идеяларды жүзеге асыруға арналған мемлекеттік грант аясында жоба қорғаған 62 жас қайтарымсыз грант иеленді. Іскер жастар бизнес-жоспарын әзірлеп, сәтті қорғап, мемлекеттен қаржылай қолдауға ие болды. Жас болса да ісі өрге басқандар ұмтылысымен көпке үлгі. Олар табыс тауып ғана қоймай, өзі секілді қаншама жасты жұмыспен қамтып отыр.
«Мүмкіндіктер керуені» жобасы аясында жыл көлемінде кент және елді мекен жастарымен кездесу өткізілген. Онда мемлекеттік бағдарламалар, тұрғын үй кезегіне тіркелу бойынша және кәсіп жасауға ниетті жастарға сала мамандары тарапынан кеңестер беріліп, түсіндірме жұмыстары жүргізілді.
«Арал ауданы бойынша жастар саясатын жүзеге асыру» әлеуметтік жобасына 3 млн теңге қаржы бөлінді. Жастардың бос уақытын тиімді өткізу мақсатында спорттық және мәдени- көпшілік іс-шаралар тұрақты ұйымдастырылуда.
Атап айтар болсақ, еркін күрестен аудандық турнир, ауыл жастары арасында қол күрес және гір тасын көтеру спорттық сайыстары, отбасылық эстафеталық сайыс, «AILAQ ACOUSTIC» жанды дауыста ән шырқау кеші, «Жайдарман» лигасы, «Айбын» әскери-патриоттық сайысы, «Жұмысшы мамандықтар» жылына орай, «Үздік көрме» байқауы, «Кітап оқы, жас дос!» кітапқұмарлар басқосуы, тарихи-өлкетану мұражайларына экскурсия ұйымдастырылды.
Бұдан бөлек жастар арасында құқықбұзушылықтың алдын алу мақсатында құрылған мобильді топ тарапынан 32 түнгі рейд жұмыстары тұрақты жүргізіліп, әлі де жалғасуда. Сондай-ақ әскери қызметтен жалтарып жүрген азаматтарды анықтау үшін бірлескен шаралар атқарылуда.
Жастар ресурстық орталығының жанынан құрылған «Жас Толқын» еріктілер тобы аудандағы ардагерлерге, мұқтаж жандарға көмек көрсетуде, қайырымдылық шараларында, сенбіліктерде белсенділік танытып келеді. Осылайша айналасына қамқорлық таныту олардың басты дағдысына айналған. Үлкеннен алғыс алып, көпшіліктің ықыласына бөленген еріктілер тобы игі жұмыстарын жалғастыра бермек.
«Taza Qazaqstan» республикалық тазалық акциясында ерікті жастардың қатысуымен 1500 түп ағаш отырғызылды. Атап айтар болсақ, «Рәміздер алаңына», ауған-тәжік соғысының ардагерлеріне арналған ескерткіш, қала аумағының кіреберісіне ағаш егіліп, күтіп-баптау жұмысын тыңғылықты атқарып келеді. Осы орайда тазалық пен қоршаған орта мәдениетін дәріптеуге үлес қосқан еріктілердің еңбегі ерекше екенін атап өткен жөн. Олар бұл іс өздеріне артылған үлкен жүк және оны жауапкершілікпен атқара беретіндерін айтады.
Жастар саясатының жүзеге асырылу барысы, олардың жетістіктері мен атқарылған жұмыстар жөнінде әлеуметтік желіге 346 пост және 123 бейнеролик жарияланса, жергілікті баспасөз беттерінде 11 материал жарық көрді. Жалпы еліміздің ертеңі – жастар дейтін болсақ, әрине жастар саясаты күн тәртібінен түспейтін мәселе екені анық. Осы ретте, аудан әкімдігі тарапынан жұмыс жүйелі түрде ұйымдастырылып, алдағы міндет айқындала түскенін айтуға болады.
Сара АДАЙБАЕВА,
«Сыр бойы»
