Достық үйінде «Сыр елі – достық мекені» республикалық ассамблея жастары форумының пленарлық мәжілісі өтті. Оған облыс әкімі, облыстық ҚХА төрағасы Нұрлыбек Нәлібаев, Парламент Сенатының депутаты Нұрия Ниязова, «Ассамблея жастары» республикалық қоғамдық бірлестігінің төрағасы Тимур Жұмырбаев, Ғылым және білім министрлігінің Жоғары және жоғары оқу орнынан кейінгі білім комитеті төрағасының орынбасары Ақерке Абылайхан қатысты. Шарада Қазақстан халқы ассамблеясының 30 жылдығы мен жастар тақырыбы кеңінен талқыланды.
Пленарлық отырыста облыс әкімі екі күнге жоспарланған форум жұмысына сәттілік тілеп, Қазақстан халқы ассамблеясының 30 жылдық мерекесімен құттықтады.
– «Сыр елі – жыр елі, ұлт руханияты мен мәдениетінің алтын діңгегі. Сыр – Алаштың анасы, астаналар мекені, адамзаттың айға ұшар арманын орындаған қасиетті жер. Киелі топырақта Түркі жұртының абызы Қорқыт бабадан бастап, ел тарихынан ойып орын алатын қаншама тарихи тұлғалар, қайраткерлер, мәдениет майталмандары мен әдебиет өкілдері дүниеге келген.
Мұнан кейін аймақ басшысы Президент пен Үкіметтің қолдауымен өңірде қолға алынған байыпты бастамалар мен жасампаз жобаларға тоқталды. Сонымен қатар аймақтың әлеуметтік-экономикалық дамуында оң тенденция қалыптасқанын атап өтті.
– Биылғы ассамблеяның мерейлі жылы аясында баршамыз үшін қуанышты жаңалық – Қызылорда қаласында құны 3 млрд 800 млн теңгені құрайтын жаңа «Достық үйі» салынуда. Бұл – аймағымыздың бірлігі мен ынтымағын нығайтуға атсалысып келе жатқан этномәдени бірлестіктер үшін барлық қажеттіліктермен қамтамасыз етілген заманауи ғимарат болады. Тағы бір ерекше жаңалығымыз, алдағы 1 мамыр – Қазақстан халқының бірлігі мерекесі күні облыс орталығынан құны 11 млрд теңгені құрайтын «Шығармашылық академиясы» ашылады.
Дәл осы күні Қызылорда қаласынан құны 6 млрд 300 млн теңгеге қайта жаңғыртудан өткен заманауи демалыс паркі ел игілігіне пайдалануға беріледі, – деді облыс әкімі.
Парламент Сенатының депутаты Нұрия Ниязова бүгінде жастар ассамблеясы ауқымды жобаларды жүзеге асырып келетінін айтты.
– Бұл жобалар Қазақстан халқы ассамблеясының кадрлық резервін қалыптастыруға, халықаралық қатынастар мен қоғамдық-саяси жұмыс саласында көшбасшылар дайындауға бағытталған. Жастар ұйымының белсенді дамып келе жатқан волонтерлік әлеуеті туралы айтпай кетуге болмайды. Төтенше жағдай кезінде олар бір кісідей жұмыла білді, – дей келе, ассамблеяның 30 жылда қол жеткізген табысын тізбектеді. Қазір ассамблея кеңесші-консультативтік органнан Конституциялық институтқа айналғанын және Парламенттік өкілдік құқығына ие болғанын атап өтті. Парламентте ұлттық бірлікті нығайту және қоғамдық келісім мәселелерімен айналысатын жаңа депутаттық бірлестік құрылғанына және оның ерекшелігіне тоқталды.
Форум отырысында Ғылым және білім министрлігінің Жоғары және жоғары оқу орнынан кейінгі білім комитеті төрағасының орынбасары Ақерке Абылайхан, «Ассамблея жастары» республикалық қоғамдық бірлестігінің төрағасы Тимур Жұмырбаев еліміздің әлеуметтік-экономикалық дамуына жастардың қосатын үлесі зор екеніне тоқталып, оларға табыс тіледі.
*
Жалпы екі күнге жоспарланған республикалық форумға еліміздің әр өңірінен 100-ден астам белсенді қатысуда. Делегация өкілдері түске дейін «Достық үйінде» этномәдени бірлестіктердің төрағалары ұсынған ұлттық дәмнен ауыз тиіп үлкендердің ақ батасын алды. Шараның ашылу салтанатына облыстық қоғамдық даму басқармасының басшысы Руслан Қаюпов қатысып, жастарды жігерлендірді.
Форумның алғашқы күнінде Қорқыт ата атындағы Қызылорда университетінің «Kyzylorda Hub» коворкинг орталығында «Жасанды интеллект: оның мүмкіндіктері мен әлеуеті» тақырыбында бірінші секция жұмысы өтті. Секция жұмысына Ғылым және білім министрлігінің Жоғары және жоғары оқу орнынан кейінгі білім комитеті төрағасының орынбасары Ақерке Абылайхан қатысып, ҚХА 30 жылдығымен құттықтап, министрлік тарапынан жастарды қолдауға бағытталған жұмыстарға тоқталды. Сонымен қатар, Қорқыт ата атындағы Қызылорда университеті жанынан «Студенттік Ассамблея» орталығы ашылып, оның төрағалығына өңірлік «Ассамблея жастарының» белсендісі Исмаил Махадинов тағайындалды.
«Болашақ» университетіндегі секциялық отырыс тақырыбы жұмысшы мамандықтардың маңыздылығын арттыруға, жастардың кәсіптік бағдарын айқындауға арналды. Шараға әр өңірден келген жұмысшы мамандық иелері мен студенттер қатысып, университеттің инфрақұрылымымен, арнайы кабинеттермен, жылыжай жұмысымен танысты. «Жастар ресурстық орталығында» жалғасқан секциялық отырыста достық пен ынтымақты нығайту жолдары талқыланды.
Мұнан соң «Жасыл болашаққа жастармен бірге!» ұранымен Қорқыт Ата атындағы Қызылорда университетінің ботаникалық бағында ағаш отырғызу акциясына ұласты.
Пленарлық отырыстан соң форум қатысушылары үшін Қызылорда қаласының ел астанасы болғанына 100 жыл толуына орай экскурсия ұйымдастырылды. Айта кету керек, 8 сәуір күні «Қорқыт ата» мемориалды кешені мен «Байқоңыр» ғарыш айлағына да арнайы экскурсия жалғасады. Онда жастар ҚХА-ның 30 жылдығының эмблемасы бейнеленген тудың ғарышқа ұшырылғанына куә болады.
Айсәуле ҚАРАПАЕВА,
«Сыр бойы».
Суретті түсірген
Нұрболат НҰРЖАУБАЙ
