Сырдария ауданында Айдарлы деген ауыл бар. Сол ауылдың жастары ел дегенде елеңдеп, қолынан келер іс болса бірігіп, бір-бірін қоштап, білек сыбанып кірісе кетуге дайын тұрады. Ізгі ниетпен жасалған жұмыстың үлкен-кішісі болмайды. Бірақ олардың осы кезге дейін атқарған еңбегі елеулі.
Бірде Айдарлының кіреберіс қақпасын жаңартса, бірде мешіт жанына 150 орындық шатыр орнатып, енді бірі ауылдастардың жұмыспен қамтылуына қарайласып, тұрғын үйден қиналғандардың баспаналы болуына атсалысып жүр. Мұны жай ғана еңбекқорлық дей алмаймыз.
Жеті жұрттың қамын жеп, туған ауыл дегенде тосылмай қызмет қылатын азаматтардың түпкі мақсаты белгілі. Күш-жігерін, жастық жалынын отбасына ғана емес, өскен ортасына да арнау, егер дәулет бітсе, қарғадай басып емес, сұңқарша шашып жеуге ұмтылады. Елге деген құрметті іспен дәлелдейтін, ағайынға жанашыр азаматтар туралы Елбасы – Тұңғыш Президент Нұрсұлтан Әбішұлы Назарбаев «Болашаққа бағдар: рухани жаңғыру» атты бағдарламасында ерекше атап өтіп, басқа аймақтарға көшіп кетсе де, туған жерін ұмытпай, оған қамқорлық жасағысы келетін кәсіпкер, шенеунік, зиялы қауым өкілдері мен жастарды ұйымдастырып, қолдау керегін айтқан болатын.
Айдарлыда арман қуып ауылдан алыстап кеткен, бірақ туған жердің ағашы мен ауасын да басқадан бөлек көретін аға буын қай кезде де қарап қалған емес. Сол ниеттің арқасында, ауылдың ажарын арттырып, еңсесін биіктеткен кіре беріс қақпа орнатылып, Сәдуақас молда мешітінің жанында 150 орындық шатыр салыныпты. Бұл 1970-2000 жылдар аралығында Айдарлыда мектеп бітірген түлектердің өзара татулығының белгісі. Мұндай жанашырлық жастарға да жігер беретіні белгілі. Өткен жылы Рамазан айында жастар ораза ұстаған ауылдастарына күн сайын ауызашар жасап, игілікті істі үрдіс қылған.
Жақсы істі жарысып жасайтын ауылдастардың жұмысы облыс әкімінің де назарында. Сырдария ауданына жұмыс сапары барысында аймақ басшысы Айдарлыдағы жастардың бастамалары басқаларға да үлгі болу керегін баса айтты.
Көпбалалы, тұрмысы төмен отбасынан бөлек мүмкіндігі шектеулі азаматқа да баспананың кілтін табыстаған жастардың бірлігі «бәрекелді» дегізбей қоймайды. Олардың басын қосып, көш бастаған Алмат Жүсіпбековке деген алқалаған ағайынның да, аудан басшыларының да алғысы ерек, сенімі бөлек болып тұр.
«Ынта болса адамда, қиын іс жоқ ғаламда» деп есептейтін айдарлылық жастар жұмыссыздық мәселесін де өздері шешіп алыпты. Өткен жылы Ақбостай жерінің 70 гектарына жүгері егу ісін қолға алған Досхан Болатұлы ауылдағы 7 жас жігітті жұмыспен қамтыған. «Айдарлы жастар» бригадасының бригадирі де ауыл тұрғыны – Әбдіғани Әбсадиаров.
Ал биыл «Айдарлы» шаруа қожалығының демеушілігімен жастар бригадасындағы 10 жігіт «Батпақкөлде» жұмыс істеуде. 3 гектар аумаққа картоп, 5 гектарға қауын, 15 гектарға жоңышқа еккен олардың жұмысы қазір қауырт.
– Ауыл жастарының ұйымшылдығы елдің берекесін арттырып, қуанышын еселеді. Жастар өз қаржысы есебінен 8 наурыз –халықаралық әйелдер мерекесі қарсаңында 8 отбасыны азық-түлікпен қамтамасыз етсе, 2 жас батыр анаға арнайы сыйларын ұсынды. Биыл еріктілер екі жалғызбасты ананың үй аумағын темір шарбақпен қоршап, 3 қарт кісінің ауласын тазартты. Төтенше жағдай кезінде де қарап қалмай, көмекке зәру 26 отбасыға азық-түлік таратып, 2 мың дана маска үлестірді. Сонымен қатар, ауыл маңындағы блок-бекетке жолаушылар температурасын өлшейтін термометр құрылғысын тарту еттік, – деді ауылдық әкімдіктің жастар ісі жөніндегі маманы Өмірзақ Есболатов.
Бұл – Мағжан Жұмабаевтың «Мен жанбасам лапылдап, сен жанбасаң лапылдап» деп басталатын өлең жолдарындай жастық жігерін жанып жүріп елге болысқан бүгінгі буынның жетістігі.
Жаңақорған ауданындағы «Жаңарған Жаңақорған жастары» ұйымы да елдің аузында. Жүзден астам ерікті жасты біріктірген ұйым баспанаға қол жеткізуді армандаған, тұрмысы төмен бірнеше отбасыға асарлатып үй салып берді. 2018 жылы бір отбасыға 4 бөлмелі үй тұрғызса, былтыр бір шаңырақтың қоныс тойын тойлауына себепкер болды. Ал, осы айда жалдамалы пәтерде тұрып келген Біжікеевтер отбасына баспана кілтін табыстап, қуанышқа бөледі.
Иә, бұдан 4 жыл бұрын жұртқа жақсылық жасасақ деген ниетпен ай сайын мұқтаж отбасыларға азық-түлік апарып тұруды әдетке айналдырған Жаңақорған жастары жыл өткен сайын адамдарды қуантудың сан түрлі жолы барын дәлелдеп келеді.
Танымал айтыскер ақын Ақмарал Леубаева бастамашы болған «Анаға хат», «Әкеге хат» жобаларын Жаңақорғанда жалғастырды. Бала тілегі мен алғаусыз көңілін ата-анаға жеткізген жобада жеңімпаздарға кәсіпкерлер демеушілігімен бағалы сыйлықтар табыс етілді. Олар аудан орталығынан әлеуметтік дүкен ашудан бөлек, бизнес бастағысы келген жандарға керекті құралдарын да сатып алып береді. Сондай-ақ, «Ауылдан – Олимпиадаға» дейін жобасы аясында өңірден шыққан спортшылар мен жастардың кездесуін ұйымдастырған. Ал, Арыстағы төтенше жағдайдан соң сол жақтағы ағайынға 12 тонна азық-түлік пен киім-кешек, 2 миллион теңге табыс етті.
Осылайша мұғалімнен бастап кәсіпкерге дейінгі әртүрлі сала мамандарын біріктірген «Жаңарған Жаңақорған жастары» елдің материалдық қана емес, руханият тұрғысында да қажетін өтеп келеді.
Ең бастысы, мұндай жастар ізгі ниет пен тату тірлік адамдардың жылдар бойғы арманын орындауға қауқарлы екенін көрсетіп жүр. Айтпақшы, ерікті жастардың жақсы істері өзге де аудандарда жалғасуда.
Айдана ЖҰМАДИНОВА,
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
