Кеше «Сырдария» жазғы тынығу лагерінің ашылу салтанаты өтті. Оған қала әкімі Нұрлыбек Нәлібаев қатысып, балаларды мерекемен құттықтады.– Жадыраған жаздың алғашқы күнінде тойланатын бұл мереке елімізде жыл сайын ерекше аталып өтеді. Қалада жаңа демалыс орындары мен саябақтар, спорттық ойын алаңдары, түрлі үйірмелер ашылып, бүлдіршіндеріміздің жазғы мезгілдегі демалысын қызықты әрі пайдалы етіп өткізулеріне аса мән берілуде. «Сырдария» жазғы тынығу лагерінде биылғы маусымда қала мектептерінен 500 оқушыға тегін жолдама беріледі. Мұнда биыл Елбасының «Болашаққа бағдар: рухани жаңғыру» мақаласына сәйкес, қазақтың ұлттық ойындарын, салт-дәстүрін насихаттайтын түрлі үйірмелер мен балалар үшін арнайы этноауыл жұмыс жасайтын болады, – деді Н.Нәлібаев.
Шаһар басшысы лагерьді аралап, тыныс-тіршілігімен танысты. Жазғы сауықтыру лагерьлеріне бірінші кезекте ата-анасының қамқорлығынсыз қалған, аз қамтылған және көпбалалы отбасы балалары мен құқық бұзушылықпен есепке алынған оқушылар қамтылады.
Айта кетейік, биыл Оқушылар сарайында балалардың жазғы демалысын тиімді ұйымдастыру мақсатында 1 маусым-14 шілде аралығында үш ауысым бойынша «Zhazgy Time» танымдық-шығармашылық мектебі жұмыс жасайтын болады. Онда танграм, робот техникасы, спорттық туризм, хореография, палитра, планетарий, шығармашылық зертхана, тілдік мектеп (қазақ, орыс, ағылшын), концерттер, конкурстар, интеллектуалды ойындар, тренингтер, кинозал болады. Оған 300 бала қамтылады деп жоспарлануда.
Шынар БЕКБАН,
«Сыр бойы».
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
