Астана қаласында өткен Қызылорда облысы тауарөндірушілерінің ауыл шаруашылығы жәрмеңкесі елордалықтар арасында ерекше қызығушылық туғызды. Арқа төріндегі айтулы шараға Сыр өңірінің брендіне айналған күріш, ет өнімдері, балық пен ас тұзы, қауын-қарбыз, ұлттық сусындар секілді 50-ден астам өнім түрлері жеткізілген болатын.
– Жәрмеңкеге Қызылорда қаласы мен барлық ауданнан тауар өндірушілер, «Байқоңыр ӘКК» акционерлік қоғамының өкілдері белсене атсалысты. Аймақтағы 100-ге жуық тауарөндірушілер өз өнімдерін 80 көлікпен елордаға алып барды. Олардың жалпы құны – 270 млн теңгеге жуық. Нәтижесінде астаналық тұрғындарға 600 тоннадан астам өнім ұсынылды, 300 тонна күріш, 80 тонна көкөніс пен жеміс-жидек, 180 тонна бақша өнімдері, сондай-ақ ас тұзы, сүт және кондитер өнімдері тұтынушыларға сатылды, – деді облыстық ауыл шаруашылығы және жер қатынастары басқармасының басшысы Талғат Дүйсебаев.
Жәрмеңкеде тұрғындардың Сыр өнімдеріне сұраныс өте жоғары екені байқалды. Өнім бағасы базардағыдан 15-20 пайызға арзан болды.
– Өткен жылдарда көпшіліктің күріш, балық және өзге де өнімдерге сұранысы зор екенін аңғардық. Сондықтан биыл осы өнімдерді молайтуға мән бердік. Жеткізілген ауыл шаруашылығы тауарларының барлығы тұтынушысын тапты, – деп толықтырды басқарма басшысы.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
