Кеше Ә.Тәжібаев атындағы облыстық әмбебап ғылыми кітапханасында «Book cafe» және «coworking» орталығы ашылды. Оған «Нұр Отан» партиясының облыстық филиалы, кәсіпкерлік палатасының өкілдері, «Жас Отан» жастар қанатының белсенділері мен кітапхана оқырмандары қатысты.
Шарада «Нұр Отан» партиясы облыстық филиалы төрағасының бірінші орынбасары Ибадулла Құттықожаев сөз алып, «Book cafe» және «coworking» орталығының жастар үшін маңызы зор екенін айтып, сәттілік тіледі.
Мұнан кейін жиналған қонақтар орталықтардың жұмысымен танысып шықты.
«coworking» орталығы – әлеуметтік маңызы бар бастамаларды, жобаларды бірлесе жұмыс жүргізуге арналған орын. Онда жастар үшін тиімді әрі қолжетімді. Орталық төрт аймаққа бөлінген. Олар іскерлік қатынас, бейресми кездесулер, демалыс және жеке жұмыстарға арналған алаң. Алғаш болып орталықта «Шыңғыс» тренинг орталығының директоры Ш.Үмбетаев «Zhas project» жобасының жеңімпаздарына арнап дәріс жүргізуде екен. Тренингте жас кәсіпкерлерге өз кәсібін қалай дамытуға болатыны жайлы кеңінен түсіндіріліп жатыр. Жалпы, орталықтың бағыты айқын. Түрлі семинар-тренингтерден өзге де жұмыстар жасауға болады. Интернет желісі бар. Жастар өз жобаларын, идеяларын талқылай алады. Іскерлік кездесулер, пікірталас алаңын ұйымдастырады. Сонымен қатар жұмыс жасауға арналған барлық құрал-жабдықтармен қамтылған. Демалыс аймағында жастардың бос уақытын тиімді өткізу үшін шахмат, үстел теннисін ойнайды. Бастысы заманауи орталықта кез келген білікті де талапты жастарға мол мүмкіндік жасалған.
Одан әрі жиналғандар «Book cafe» жұмысын көрді. Орталықта бір топ жастар жазушы Немат Келімбетовтің «Үміт үзгім келмейді» кітабын талқылап жатыр екен. Жалпы, бұл білім алуға, жұмыс жасауға, демалуға, көңілді кештерге арналған алаң. Онда пікір алмасуға, қарым-қатынас орнатуға мүмкіндік мол. «Book cafe»-де жастар кітап оқумен қатар кофе, шәй ішіп, мәдени демалуға да болады.
Шара соңында биылғы жылдың 15 мамыр мен 7 тамыз аралығында «Жастар таңдайды» атты жоба аясында ұйымдастырылған видеороликтер байқауының қорытындысы жарияланып, жеңімпаздар анықталды. Үздіктерге бағалы сыйлықтар табыс етілді.
Айта кетейік, облыстық кітапханада оқырмандар үшін барлық жағдай қарастырылған. Бұған дейін ІТ парк ашылып, жұмысын бастаған еді. Онда робототехникаға құмар жастар өз жұмыстарын жетілдіреді. Сонымен қатар кітапханада түрлі үйірмелер жұмыс жасайды. Жаңадан ашылып отырған «Book cafe» және «coworking» орталығы да алдағы уақытта жастардың игілігі үшін қызмет ете бермек.
Сара АДАЙБАЕВА,
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
