Кеше облыс әкімінің жұмыс сапары түстен кейін Қармақшы ауданы мен Байқоңыр қаласында жалғасты. Өңір басшысы әуелі Төретам кентіндегі №22 35/10 кВ қосалқы станциясын кеңейту және қайта құрылымдау жобасымен танысып, аудандық білім бөліміне қарасты №277 мектеп-лицейде болды.
Сонымен қатар, Байқоңыр қаласындағы 50 пәтерлік 5 тұрғын үй назарға алынып, «Нұрлы жер» бағдарламасы аясында қалада көппәтерлі тұрғын үйлер құрылысын жалғастыру бойынша жұмыстар пысықталды. Бүгінгі күні жалпы құны 3,2 млрд теңге құрайтын, мемлекеттік сараптаманың оң қорытындысын алған тағы 5 тұрғын үйдің жоба-сметалық құжаттамасы дайын көрінеді. Құрылысқа қаражат бөлу мақсатында ҚР Индустрия және инфрақұрылымдық даму министрлігіне бюджеттік өтінім де ұсынылған. Тұрғын үйлердің құрылысына 5 гектар жер бөлінген.
Сондай-ақ, Байқоңыр қаласындағы көпбейінді ауруханада болған облыс басшысына бас дәрігер Жандос Әділхан медициналық көмек көрсету жұмыстарын баян етті. Аурухана фойесінде жаңадан жұмысқа қабылданған дәрігерлермен пікірлесу болды.
Облыс әкімі сапар барысында Байқоңырдағы Мәңгілік алау және интернационалист жауынгерлерге арналған ескерткішке гүл шоғын қойып, саябақты абаттандыру жұмысының нәтижесін де көрді.
Мұнан кейін Жосалы кентіне келген облыс басшысы индустриялық аймақта орналасқан «Мир-2001» ЖШС-ның бетон бұйымдарын шығару цехының жұмысымен танысты. Одан кейін «Жосалы 220/35/10 кВ» қосалқы станциясына және газ реттегіш пунктке аялдады.
Қармақшыда бүгінге дейін тартылуы тиіс 163 шақырым газ құбырының 133 шақырымы жүргізілген. Жобада қаралған 6 газ реттегіш пункттің 3-і салынған.
– Былтыр Жосалы кентін газдандыру жұмыстарын бастағанбыз. Қазіргі таңда бөлінген 3 млрд 200 млн теңге қаржының 1 млрд 700 млн теңгесін игердік. Қалған қаржы тамыз айына дейін толық жұмсалатын болады. Барлық материалдар жеткілікті, бұйырса, қыркүйек айында газ аудан орталығына келеді, – деді облыстық энергетика және тұрғын үй-коммуналдық шаруашылығы басқармасының басшысы Медет Усаин.
Сонымен қатар басқарма басшысы аудандық электр тарату торабы мекемесінің станциясына жүргізіліп жатқан құрылыс жұмысын да айтып өтті. «Жосалы 220/35/10 кВ» қосалқы станциясында 1969 жылы пайдалануға берілгеннен бері қайта жаңғырту жұмыстары жүргізілмеген. Былтыр министрліктен қолдау тауып, 1 млрд 600 мың теңге қаржысы бөлінген нысанның барлық жабдықтары түгелдей жаңартылмақ. Станция жұмысы қыркүйек айында толық бітеді.
Айта кетейік, бүгін облыс әкімінің жұмыс сапары Қармақшы ауданында әрі қарай жалғасады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
