Қазақстанда цифрландыру үрдісі басталғалы бері, әр сала, әр мекеме ақпараттық технология мүмкіндігін пайдалануға көшті. Айталық, мекен-жай, мүліктің бар-жоғы сынды анықтама алу үшін жол жүріп, кезек күтудің қажеті жоқ. Демек, уақыт жоғалтып, жүйке жұқартпайсыз.
Өткен жылдан бастап құқық қорғау органдары да электронды форматта іс жүргізуге кіріскен. Бұл туралы өңірлік коммуникациялар қызметінде өткен брифингте ҚР Бас прокуратурасы құқықтық статистика және арнайы есепке алу жөніндегі комитеті облыстық басқармасының бөлім бастығы Мәди Әбішев айтты.
Қазір құқықтық статистика органдары 4 мемлекеттік қызмет көрсетеді. Электронды қолтаңбаңыз болса, «электронды үкімет» www.egov.kz веб-порталы арқылы соттылық, әкімшілік құқықбұзушылық және мұрағаттық туралы анықтама аласыз. Бұл қызмет түрлері тегін беріледі, тек ресми құжаттарды апостильдеу үшін ғана мемлекеттік баж 0,5 айлық есептік көрсеткішті құрайды. Сондай-ақ, «соттылықтың бар болуы немесе жоқ екендігі туралы анықтаманы беру» мемлекеттік қызметтің түрі толықтай автоматтандырылған.
–Сотталмағаны туралы анықтама Қылмыстық кодекстің 79-бабының талабына сәйкес, соттылықтың жойылу есебімен беріледі. Қылмыстық қудалау қысқартылған, соттылық мерзімдері өткен немесе алынған азаматтарға қатысты «соттылығы жоқ» деген анықтама беріледі. Қызмет көрсету 10 минут уақыт алады. Егер қосымша тексеру қажет болса, 3 жұмыс күніне созылады, – деді Мәди Қанатұлы.
Мұндай қызметті тіпті порталдың мобильді түрі бойынша смартфондар арқылы алу да қарастырылған.
Бүгінде әкімшілік құқықбұзушылықтар туралы мәліметтер тек қана «электронды үкімет» веб-порталы арқылы электронды түрде берілсе, мұрағаттық анықтама алу де жеңілдетілген. Мұндайда «Азаматтарға арналған үкімет» мемлекеттік корпорациясы және веб-портал көмегін пайдаланасыз.
Бүгінде «Цифрлық Қазақстан» бағдарламасының аясында Бас прокуратура бірқатар ақпараттық жүйелерді іске асыруды қолға алған. Соның бірі – «электронды қылмыстық іс жүйесі» құқықбұзушылық тіркелгеннен сот үкімі шыққанға дейін сот процесінің барлық кезеңдерін цифрлауға мүмкіндік береді. Өткен жылдан бастап теріс қылықтар және онша ауыр емес қылмыстар бойынша тергеу әрекеттері, биыл орташа ауырлықтағы қылмыстарды тергеу электронды форматта жүргізілуде. Ал 2021 жылдың соңына дейін қылмыстардың барлық санаттары бойынша тергеу амалдарын жүргізуді автоматтандыру жоспарланған.
Сонымен қатар, кәсіпкерлік субъектілеріне тексерулерді азайту және ашықтыққа қол жеткізу үшін барлық мемлекеттік органдарда ТСОБТ ақпараттық жүйесі қолданысқа енгізілген. Өткен жылдан бастап тексерулер электронды түрде тіркеле бастаған. Тексеру тіркелгеннен кейін кәсіпкердің ұялы телефонына «Сізге тексерумен келеді» мәтіні бойынша Push-хабарлама келеді. Ал кәсіпкер «Qamqor» мобильді қосымшасының көмегімен тексеруге кім қашан келетінін және тексеру парағының талаптарымен таныса алады.
Айдана ЖҰМАДИНОВА.
>>> Біздің Facebook, Instagram парақшаларымыз бен Telegram каналымызға жазылыңыз! <<<
