Өңірлік коммуникациялар қызметінде «Қызылорда облысы кәсіподақтар орталығы» аумақтық кәсіподақтар бірлестігінің төрағасы Серік Сермағанбетовтің қатысуымен брифинг өтті. Бірлестік төрағасы І жартыжылдықта атқарған жұмыстар жайын мәлімдеді.
Қазіргі күні облыстың аумақтық кәсіподақтар бірлестігі 11 салалық кәсіподақта 1020 ұжымды біріктірсе, оның 83 проценті мемлекеттік бюджеттен қаржыландырылатын мекемелер. Өткен жылы 2 салалық кәсіподақ ұйымы – «Senim» денсаулық сақтау жүйесі жұмыскерлерінің салалық кәсіподағы мен «YNTYMAQ» орта және кіші бизнес жұмыскерлерінің қазақстандық салалық кәсіподағы республикалық қоғамдық бірлестіктерінің облыстық филиалы құрылып, өз жұмыстарын бастап кеткен. Есепті мерзімде жұмыс күшінің саны – 347,9 мың адамды құраса, жұмыспен қамтылғаны – 331,4 мың адам. Жұмыссыздық деңгейі 4,8 процентті көрсетіп отыр. Жұмыспен қамтылған халық санына шаққанда кәсіподақ мүшелерінің үлесі осы жылдың 6 айында 28,4 процентке жеткен.
– Қазіргі уақытта 6005 мекеме мен кәсіпорынның ұжымдық шарттары тіркелуде. Облыс көлемінде 863 мекемеде төменгі жалақы көбейтілді. Түсіндірме жұмыстарының нәтижесінде мемлекеттік бюджеттен қаржыландырылмайтын нақты 16 кәсіпорында жалақы өсіру мәселесі құпталып, ұжымдық шартқа өзгерістер мен толықтырулар енгізілді. Бұл жұмыс онан әрі жалғасын табады. Аймақта кәсіподақ ұйымы бар мекемелер мен кәсіпорындардағы еңбек қауіпсіздігі және еңбекті қорғау бойынша 628 өндірістік кеңес құрылды. Онда 658 техникалық инспектор қоғамдық жұмыс жасайды. Өндірістік кеңес құру жұмысын одан әрі жандандыру мақсатында «Қауіпсіз еңбек» акциясы жарияланды. Акция аясында салалық кәсіподақтар мен әлеуметтік әріптестердің қатысуымен жұмыс тобы аудандарда, елді мекендерде қоғамдық бақылау жүргізетін болады, – деді Серік Сағитжанұлы.
Құрылғанына бір жыл болған «Senim» денсаулық сақтау жүйесі жұмыскерлерінің салалық кәсіподағы да бүгінде түрлі шаралардың жүзеге асуына ұйтқы болуда. Мәселен, жастар жылына орай 7 маманға қайтарымсыз 500 мың теңгеден бір жолдық көмек көрсетсе, «7-20-25» бағдарламасы арқылы тұрғын үй алу үшін 2 маманға 1 млн теңгеден, 4 маманға 1 млн 500 мың теңгеден алғашқы жарнапұл төлемдерін берген. Бұл туралы “Senim” денсаулық сақтау жүйесі жұмыскерлерінің салалық кәсіподағы облыстық филиалының төрағасы Асылхан Абылайұлы тілге тиек етті.
– Біздің бірлестіктің алдында бірқатар жоспарлар тұр. Соның бірі жуырда екі дәрігеріміз Жапония еліне барып, біліктіліктерін жетілдіреді. Сонымен қатар, алдағы уақытта ұйым мүшесі болып табылатын науқас балалары бар сала қызметкерлері мен орта буын өкілдеріне көмек беруді қолға алмақпыз, – деді ол.
Баяндамашылардың айтуынша, көптеген мекемелерде еңбек шарты жасалмайды, тіпті, жұмыс берушілер кәсіподақ ұйымын құруға қызығушылық танытпайтын көрінеді. Осы ретте, әрбір жұмыскер өз құқығын білсе дейді сала мамандары.
– Кез келген мекеме алдымен еңбек шартын жасауы тиіс, оны жұмысқа тұрып жатқан азамат та талап етуі керек. Өкінішке орай, еңбек шартын жасауға, жұмысшылар құқығын қорғайтын кәсіподақ ұйымын құруға мекеме басшылары селқос қарайды. Бұл дұрыс емес. Егер жұмыс беруші мен жұмыскердің арасындағы келісім-шарт толық орындалса, қоғамда еңбек дауы туындамас емес еді, – деді қазақстандық салалық білім және ғылым қызметкерлері кәсіподағының облыстық төрайымы Райкүл Байназарова.
Жиын соңында БАҚ өкілдері тарапынан бірқатар сұрақтар қойылып, тұшымды жауаптар алынды.
Мейрамгүл ДАУЫЛБАЙҚЫЗЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
