Облыстық қоғамдық кеңестің кезекті отырысы өтті. Онда ересектер мен кәмелетке толмаған балалар арасында орын алған құқық бұзушылық фактілерінің туындау себептері және оның алдын алу шаралары туралы мәселелер қаралды.
Алғашқы жартыжылдықтың қорытындысын баян еткен облыстық ішкі істер департаментінің жергілікті полиция қызметі басшысының міндетін атқарушы Е.Жәукеев аймақ көлемінде құқық бұзушылықтарды сауықтыру, қылмыстардың алдын алу мақсатында түрлі профилактикалық іс-шаралар өткізілгенін айтты. Нәтиже жаман емес, жыл басынан бері қылмыстылық деңгейі 12,3 процентке, оның ішінде аса ауыр қылмыстар 21,4 процентке, онша емес және орташа ауыр санаттағы қылмыстар 11,4 процентке төмендеген. Ал, кәмелетке толмағандар жасаған қылмыс 20,6 процентті құрайды. Бұл өткен жылмен салыстырғанда төмендегенін көрсетеді.
Бүгінде қаланың ішкі тәртібін сақтау мақсатында полиция қызметкерлері үш ауысымда 119 бағытқа бөлініп қызмет атқарады. Алайда, тікелей қызмет көрсету барысында біршама кедергілер кездесетін көрінеді.
– Аптаның жұма, сенбі, жексенбі және мейрам күндері көпшілік көңіл көтеру орындарында құқық бұзушылықтың саны артуына орай ол жерлерде қоғамдық тәртіпті қамтамасыз ету үшін қосымша кезекшіліктер ұйымдастыруға мәжбүр боламыз. Себебі, клубтар мен кафелердің халыққа қызмет көрсету уақытының шектеусіз болуы және олардың иелерінің ішкі тәртіпке бейжай қарауы салдарынан есепті мерзімде тағы 44 қылмыс орын алды, – деді полиция полковнигі Е.Жәукеев.
Бұдан бөлек, рейд жұмыстары кезінде түнгі уақытта заңды өкілдерінсіз жүрген екі мыңнан астам жасөспірім ұсталған. Бұл ретте, олардың ата-аналары әкімшілік жауапкершілікке тартылған. Сондай-ақ, бала тәрбиесімен айналыспағандары үшін 29 ата-ана да «Әкімшілік кодекстің» 127-бабымен жауапкершілікке тартылса, үлкендердің тәрбиесіне көнбейтін, білім алудан қасақана жалтаратын, өз бетімен жүріп-тұрғысы келетін 5 жасөспірім девиантты мінез-құлықты балаларға арналған мектеп-интернатқа орналастырылған. Осы ретте сөз алған облыстық білім басқармасы басшысының орынбасары Ж.Шынтасов қылмыстылықпен тіркелген 44 жасөспірімнің 38-і есепке алынып, олармен білім беру ұйымдарының психологтары жеке жұмыс жасап келетінін жеткізді.
– Аталған фактілер бойынша білім беру ұйымдарында оқитын жасөспірімдер психологтардың бақылауына алынып, ұдайы түсіндірме жұмыстары жүргізілуде. Жыл басында “Кәмелетке толмағандар мен жастар арасындағы құқық бұзушылық профилактикасының кешенді жол картасы” қабылданды. Соған орай алдағы уақытта барлық білім беру ұйымдары бейнекамералармен қамтамасыз етіліп, балалардың қауіпсіздігі толық бақылауда болады, – деді Ж.Шынтасов.
Ал, облыстық жастар саясаты мәселелері басқармасының басшысы Қ.Жанұзақов облыс бойынша NEET санатындағы жастармен жұмыс жүргізудің арнайы жоспары бекітіліп, алдағы бір айда олардың нақты дерекқорын жасақтап, әрбір жаспен жекелей жұмыс жасайтындығын тілге тиек етті.
Жиынға қатысушылар тарапынан ұсыныстар айтылды. Олардың қатарында білім беру ұйымдарында мектеп медиациясын енгізу, қаладағы тәртіп бұзушылықтың көп бөлігі кафелер мен сыраханалар төңірегінде орын алуына байланысты олардың түнгі уақыттағы жұмыс уақытын қысқарту жолдарын қарастыру, қаладағы камералар санын арттыру, шет аймақтарға көптеп орналастыру, ювеналды полицияға автокөлік беру мәселелері бар. Бұлардың барлығы кеңес мүшелері арасында талқыланып, бірауыздан қолдау тапты.
Басқосуда, мұнан бөлек, Байқоңыр қаласында тұратын ҚР азаматтарының әлеуметтік жағдайы және оларды қолдау мәселелері сөз болды. Оның ішінде Ресей Федерациясына қарасты мекемелерде жұмыс істеп, зейнетке шыққан ел азаматтарының ресейлік жинақтаушы зейнетақы қорындағы қаржыларын алудағы орын алған проблемалар мен оның шешу жолдары, экологиялық апат аймағы тұрғындарының зейнеткерлік жасы кеңінен қаралды. Бұл туралы Қазақстан Республикасы Президентінің “Байқоңыр” кешеніндегі арнаулы өкілінің қызметін қамтамасыз ету басқармасының басшысы Ж.Абатов егжей-тегжейлі баяндап берді.
Жиын соңында баяндамашыларға қоғамдық кеңес төрағасы Бақытжан Сайлыбаев пен кеңес мүшелері тарапынан сұрақтар қойылып, нақты жауаптар алынды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
