1 Мамыр әлемнің алпыстан астам мемлекетінде әртүрлі мазмұнда тойланады. Ал 1996 жылы елімізде Қазақстан халқының бірлігі күні деп жарияланғаны белгілі. Содан бері ол бейбітшілік пен келісім, бірлік пен достық секілді құндылықтар дәріптелетін маңызды мерекелердің біріне айналды.
Бүгінде ашық аспан, бейбіт өмір құшағында жүз отыздан астам этнос өкілдері береке мен тыныштықта, бейбітшілік пен ынтымақта өмір сүріп жатыр. Жалпыұлттық бірлік пен татулықты нығайту жолында адал қызмет етіп жүрген қуатты құрылым – Қазақстан халқы Ассамблеясы. Өзінің отыз жылдығында ол қоғамдық келісімнің бірегей инфрақұрылымын қалыптастырған, қуатты тармақтары бар институтқа айналды.
Қазақстан халқы Ассамблеясының ХХХІV сессиясында сөйлеген сөзінде Мемлекет басшысы Қасым-Жомарт Тоқаев қазақ жерінде тұрып жатқан барлық этнос өкілдері өздерінің тілін, мәдениеті мен салт-дәстүрін жан-жақты дамыта алатынын, оған қажетті барлық жағдай жасалғанын атап өтті.
– Қазақстанда адамды ұлтына, тіліне, дініне қарай кемсіту ешқашан болған емес, болмайды да. Барша азаматқа бірдей мүмкіндік берілген. Бұл – нағыз әділдік, әділетті мемлекеттің ажырамас бөлігі. Тағы да айтарым: елдің бірлігі мен татулығы ең негізгі құндылықтарымыздың қатарында тұр. Бұл – мемлекеттік саясаттың басты тұғыры. Болашақта да солай болмақ. Осы стратегияның арқасында түрлі этнос өкілдері бір шаңырақтың астында бір үйдің баласындай тату-тәтті өмір сүріп жатыр. Бұл – мағынасы терең нақты жетістік. Отаншылдық, азаматшылдық, өзара сенім мен жауапкершілік – Қазақстан халқының жалпыұлттық бірегей болмысын айқындайтын құндылықтар, – деді Президент.
Сыр өңірінде 30-дан астам этнос өкілдері тұрады. Олар облыстың экономика, мәдениет, спорт, білім, ғылым салаларының дамуына атсалысып, еліміздің өркендеуіне үлес қосып жүр. Ал биыл Қызылордада жаңа «Достық үйі» салынып, жыл соңына дейін ел игілігіне табысталмақ. Бұл Ассамблеяның мерейлі жылына арналған Сыр өңірінің тартуы болмақ.
Назерке САНИЯЗОВА,
«Сыр бойы»
