Қазір адам ағзасы ішкі мүшелерінің жүйелі жұмысына тиер зиянды залал көп. «Бірінші байлық – денсаулық» дегенді естен шығармаған жөн. Жарқын өмір сүру үшін ең алдымен деннің саулығы қажет. Медицина саласының қызметкерлері дерттің шарықтауына жол бермей, ауруды ауыздықтау мақсатында білімін толықтырып, оған төтеп беруге даяр тұрады.
Қазалы теміржол ауруханасы халыққа бір ғасырдан астам уақыттан бері қалтқысыз қызмет етіп келеді. ХХ ғасырдың басында Қазалы уезінде халыққа медициналық қызмет көрсету мақсатында амбулатория ретінде ашылған. Онда ең әуелі фельдшер және акушер болған. Ұлы Отан соғысы кезінде теміржол ауруханасы госпитальға айналған. Түрлі жарақатпен түскен сарбаздарға ем жасаған.
Бүгінде теміржол ауруханасы Қазалы аумағында тіркелген халыққа және Арал, Қармақшы аудандарында тұратын теміржолшыларға, олардың отбасыларына, теміржолшы зейнеткерлерге көпсалалы мамандандырылған, алғашқы медико-санитарлық, консультациялық-диагностикалық медициналық көмек көрсетеді.
Жалпы аурухана кешені үш қабатты ғимаратта орналасқан, 150 кереуетке есептелген. Құрылымында консультациялық-диагностикалық қызмет көрсету үшін бір ауысымда 350-400 адамды қабылдауға арналған теміржол емханасы жұмыс істеп тұр.
Мұнда ересектер мен балаларға көрсетілетін амбулаториялық-емханалық, шұғыл алғашқы, ересектер мен балаларға көрсетілетін стационарды алмастыратын, мамандықтар бойынша консультациялық-диагностикалық және стационарлық-медициналық көмектер, анестезиология және реаниматология, нефрология, жалпы терапия, жалпы хирургия, акушерлік және гинекология, невропатология, оториноларингология, эндокринология, педиатрия, жалпы дәрігерлік тәжірибе, кардиология, гастроэнтерология, дерматовенерология, стоматология (терапевтік, ортопедиялық, хирургиялық), офтальмология, травматология және ортопедия, аллергология, пульмонология, онкология, рентгенология, нейрохирургия, медициналық реабилитология, дәстүрлі медицина, урология, трансфузиология, психиатрия, наркология, гематология, ревматология, фтизиатрия, физиотерапия, емдік денешынықтыру, массаж, эксперттік медициналық көмек көрсетіледі.
Сондай-ақ ауруханада балалар мен ересектер арасында нысаналы мақсаттағы топта «В», «С» гепатитіне, әйелдер арасында жатыр обырына, ересектер арасында тік және тоқ ішек обырларына колоноскоптық әдісімен тексеру, ерлер арасында қуық безі, асқазан, өңеш, бауыр обырына, қан айналым жүйесі ауруларына, су қараңғылыққа, қант диабетіне тексеру жүргізіледі.
Қазалы теміржол ауруханасының басты мақсаты – тіркелімдегі тұрғындарға, теміржолшыларға және олардың отбасыларына сапалы емдеу-профилактикалық медициналық көмек көрсету. Сондықтан емделуге жатқызу үрдісі реттеліп, емделушілердің қолжетімді медициналық көмек алу құқығы қамтамасыз етілген. Жоспарлы емдеу кезінде ауруханаға жатқызбай, бас тарту жағдайлары жоқ. Ауруханаға науқастар көрсетілімдері бойынша жоспарлы түрде, Портал бюросы арқылы қабылданады және тәуліктік стационарға жедел түрде түскен науқастар, оның ішінде трасса бойында болған жарақаттар, пойыздан түсіріп алған науқастар емделеді. Қалған науқастар күндізгі ауруханада қаралады.
– Ауыз толтыра айтатын ауқымды жұмысымыздың бірі – 2016 жылдың 15 ақпаннан бастап, облыстық денсаулық сақтау басқармасының бұйрығына сәйкес, аурухананың төсек қоры шеңберінде 24 төсектік нейроинсульттік орталық ашылды. Сол жылдан бері 10 төсек ерте оңалту бөлімі жұмыс жасауда. Көп ұзатпай қосымша 10 төсек кеш оңалту бөлімі іске қосылды. Мұнда дәрігер реабилитолог, невропатолог, травматолог, кардиолог, педиатр, психолог, логопед, массажист, емдік-денешынықтыру мамандары инсульт алған және басқа науқастарға медициналық қызмет көрсетуде. Оңалту бөлімдері қажетті медициналық жабдықтармен толық қамтылған, – дейді теміржол ауруханасының бас дәрігері Айгүл Жанарыстанқызы.
Бас дәрігердің мәліметіне сүйенсек, 1994 жылдың тамыз айында Қазалы теміржол ауруханасының басшысы болып Құбыл Ршымбетов тағайындалған. Ол жаңа типтік аурухана құрылысының толық аяқталуына және қажетті медицина саласындағы заманауи озық үлгідегі құрылғылармен жабдықтауға тікелей септігін тигізді.
Хирургиялық, паллиативтік, гинекологиялық, терапиялық, неврологиялық, нейроинсульттік, реабилитация, балалар, реанимация, ақылы қызмет бөлімі, күндізгі стационар бар.
Сонымен қатар параклиникалық бөлімдер – клиникодиагностикалық, бактериологиялық, биохимиялық, серологиялық, иммуно-ферменттік зертхана жұмыс істеп тұр. Функционалдық диагностика жүргізіледі. Оған рентгенологиялық, рентгеноскопиялық зерттеулер, маммография, рентген, компьютерлік томография, радиоизотоптық диагностика (МРТ), «С-дуга» рентгенодиагностикалық аппарат, доплерография, барокамера, УДТ-диагностика, эхо-энцефаллоскопиялық, фиброгастроскопиялық, эхоэнцефаллографиялық, доплерографиялық зерттеулер енеді.
Бұған қоса физиотерапиялық бөлім қызметінде емдік-денешынықтыру, соққылы толқын терапиясы, үгу столы, мойын массажын жасау аппараты, парафин, емдік массаж, емдік тұзды және 10 түрлі дәрілік ванна, кедр саунасы, суасты массажы, джакузи, мануалдық емдеу, Су-Джок емдеу, барокамера халықтың денсаулығын түзетуге бағытталған.
Жаңа ғасырға аяқ басқан жылдары УЗИ, плазмаферез, лазер аппараттары, гастрофиброскоп, барокамера, маммография, ультрадыбысты доплерограф, электрокардиограф «ЭК-3Т-01-«Р-Д»» «Россия», анықтаушы процессор, ВС-3000 автомат гематологиялық анализатор, ИФА аппараты, ВА-88 жартылай автоматты биохимиялық анализатор, эндовидеолапаротомия, офтальмоскоп әкелінді. Кейін компьютерлік томография және «С-дуга» рентген аппаратына қол жеткізілді. Екі жыл бұрын қосымша залалсыздандыру бөліміне стерилизатор, ресейлік ауа стерилизаторы алынды. Гинекология бөліміне видеокальпоскоп СЗ, жоғары жиілікті электрохирургиялық аппарат «Фотек», дәріханаға медициналық электрлік аквадистиллятор қосылды. Емхана бөліміне «Жеңіс» рентген флюорографиялық сандық аппараты, NeuViz 16 қайта қолданылатын КT сканерлеу жүйесі, CR AG рентген және маммографиялық бейнелерін диагностикалауға, мұрағаттауға арналған цифрлық аппарат, TPS-IIM стоматологиялық термиялық инжекциялық қондырғы, рентгендік жалпақ панельді сандық детектор, ауа компрессоры Ajax 220k 50 л, термопринтері бар отоакустикалық эмиссияны тіркеудің портативті құрылғысы, Ajax AJ11 стоматологиялық қондырғысы қойылды. Келушілерді тіркейтін қабылдау бөліміне 12 арналы электрокардиограф, электрлік аквадистиллятор берілді.
Сонымен бірге жансақтау бөліміне 9 функционалды кереует, физиотерапиялық бөлімге дененің жоғарғы және төменгі бөліктеріне арналған екі-екіден жаттығу құрылғысы мен велотренажер алынды. Хирургия бөлімінде ота жасауға септігі мол ішкі резервті пайдаланып анестезиологиялық жұмыс станциясы «Fabius Tiro ASBL-0063» диагностикалық аппараттары көмек көрсету үшін сумен емдейтін бөлім ашылды.
Компьютерлік томография аппаратымен Арал, Қазалы және Қармақшы аудандарының халқына қызмет көрсетіледі. Оның ішінде ауруханаға бекітілген стационарлық науқастар, мүгедектер, зейнеткерлер, жасөспірімдер, «Батыр ана» орденімен, «Алтын алқа», «Күміс алқа» белгілерімен марапатталған әйелдер және медициналық ұйымдардың жолдамасы бойынша пациенттер тегін өткізіледі.
Тұрғындарға сапалы медициналық қызметті уақытылы көрсету мақсатында 4-категориялы шақыртуларға аурухана қабылдау бөлімінен арнайы бригада жедел жәрдем ашылды. Қызмет көрсетуге 2 автокөлік бөлінді. Амбулаториялық деңгейде уақытылы медициналық қызмет көрсетуге үйге шақырту мен белгілі дертімен диспансерлік тіркеуде тұрғандарды аралау үшін 4 автокөлік бар.
Реанимация бөліміне кіші ота залдарына екі үлкен орталықтандырылған оттегі қосылды. Қосымша жабдықтарымен екі функционалдық кереует алынды. Рентген аппаратқа оцифровщик аппараты қосылды. Жаңа типті стоматологиялық құрылғы пайдалануға берілді. Аурухананың барлық бөлімдерінің үй-жайларына ішкі-сыртқы ағымдағы жөндеу жұмыстары уақытылы жүргізіліп отырады.
Бұдан бөлек зертхана бөлімінен қосымша серологиялық зерттеуге маман оқытылып, лицензия алынды. Барлық қажетті медициналық аппараттармен жабдықталды. Атап айтқанда, жартылай автоматты коагулометр ТС-4000, автоматты биохимиялық анализатор, химиялық сорғыш шкафы, бинокулярлы микроскоп, центрифуга, вакцина сақтайтын мұздатқыштар іске қосылды.
Ұжым құрамының ізденімпаздығы мен жылы қарым-қатынасының арқасында қаншама науқастың беті бері қарап, олардың алғысына бөленуде. Дегенмен бүгінгідей алмағайып уақытта ауру басқа кейіпте түрленіп, ағзаға нұқсан келтіруде. Осындайда оның алдын алу бағытында заманауи жабдықтарға тапсырыс беру жағдайдың жылдам шешілуіне жол ашады. Өйтпесе жанға батқан дертті дөп басып нақты диагноз қою қиынның-қиыны. Қазалы теміржол ауруханасы ақ халаттылардың ісі іркіліссіз жүруіне және медициналық зерттеу барысында септігін тигізетін бірқатар су жаңа құрылғымен жабдықталып, арнайы зерттеу орталығы ашылды.
Жақында бас ми ангиографиясы іске қосылып, тұрғындарға алғашқы ота жасалды.
– Бас ми ангиографиясының негізгі көрсеткіштеріне аневризма жатады, бұл патология қауіпті. Себебі ол инсульт тудыруы мүмкін. Келесісі – ангиома. Оны зерттеу тамырдың плексусымен және губка қуыстарымен ерекшеленетін тамырлы ісіктерді анықтауға мүмкіндік береді. Ишемиялық инсульт артерия бітеліп қалған кезде қан ұйығышын 95 пайыздан астам еріту қажеттілігін анықтау мақсатында жүргізіледі. Геморрагиялық инсульт диагностика кезінде мамандар қан кету көзін анықтайды. Гематома ангиография бас тамырларының ангиографы гематоманың мөлшерін және оның орналасқан жерін анықтау үшін жасалады, – дейді Қазалы теміржол ауруханасы бас дәрігерінің емдеу ісі жөніндегі орынбасары Асқар Ахмедов.
Асқар Сәдуақасұлының айтуынша, ми ісігі зерттеу барысында ісіктің мөлшері мен оның сипатын анықтауға болады. Бас миының жарақаты зерттеу осындай алған жарақаттың салдарын анықтауға мүмкіндік береді. Тамырлы ақаулар диагностика патологияның орнын және қан кету көзін анықтайды.
Сонымен қатар аяқ-қол тамырларының ангиографиялық көрсеткіштеріне атеросклеротикалық ауруды анықтау жатады. Зерттеу барысында мамандар қан тамырларының тарылу дәрежесін анықтайды. Диабеттік аяқ синдромын нақтылауда процедура тамырлардың зақымдану дәрежесін анықтай алады. Артерияның тарылуына әкелетін қабырға қан ұйығыштарын анықтау мүмкіндігі бар. Жүргізіліп жатқан дәрілік терапияның немесе хирургиялық араласудың тиімділігін бағалайды. Диагностика емдеу нәтижелерін бағалауға, қан тамырларының қабырғаларында шөгінділердің азайғанын, тамырдың қалыпқа келгенін бақылайды. Жарақат алған жерлерді іздейді. Тамырлардың зақымданған жерін іздеу мен зерттеу, олардың деформацияларын анықтауға мүмкіндік береді.
Аталған аппарат алынғалы отызға жуық ота жасалып, науқастардың денсаулығы түзелуде.
Қазір жүрек ауруымен сырқаттанушылар саны көбеюіне байланысты жиырма орындық терапия бөлімінің он кереуеті жаңадан ашылған кардиология бөліміне берілді. Осы күні мұнда сырқатқа шалдыққандар жүйелі ем алуда.
– Жүрек пен қан тамырларының құрылысы, қызметі және ауруларының пайда болу себептері мен дамуы, белгілері және оларды анықтау, емдеу әдістері мен олардан алдын ала сақтану жолдары туралы ғылым – медицинаның бір саласы.
Жүрек аймағындағы ауырсыну, оның жұмысындағы үзілістер, қан қысымының жоғарылауы, тез шаршау – бұл ауруханаға баруға басты себеп. Өйткені кез келген аурудың, әсіресе жүрек-қан тамырлары жүйесінің адам өміріне қауіп төндіретін асқынуларын күткеннен гөрі ерте кезеңде алдын алу немесе емдеу оңай екені ешкімге құпия емес.
Бөлімшені 15 адамнан асатын мамандар тобы құрайды. Тәжірибелі, мұқият және мейірімді қызметкерлер көмекке келуге әрқашан дайын. Жоғары мамандандырылған қызметкерлер тобы үйлесімді жұмыс атқарады. Пациенттер белсенді өмір салтына тез оралуы үшін жаңа технологияларды қолданып және жеке ерекшеліктерін ескеріп, оңалту бағдарламаларын әзірлеуге мүмкіндік береді, – дейді теміржол ауруханасының бас дәрігері.
Қазалы теміржол ауруханасының басшысы Құбыл Ршымбетов халықтың денсаулығын түзеу мақсатында тағы бір жабдыққа қол жеткізді. Оның айтуынша, Wandong Medical компаниясы жаңашыл өнімді сұйық гелийсіз аса өткізгіш магнитті-резонансты «i_Vision 1.5T Plus» томографияны ойлап шығарды. Ол – жоғары тиімді криогенді ортаны, аса жоғары вакуумды, экстремалды адиабатикалық технологияны және басқа да озық технологияларды қамтитын еркін салқындатылатын криогенді өткізгіш платформаны революциялық зерттеу және әзірлеу.
Мамандардың айтуынша, магнит ішінде сұйық гелийдің болуын талап етпейді. Бұл гелийсіз аса өткізгіш магниттік-резонанстық томография туралы арманды жүзеге асыра отырып, өте төмен температурадағы тұрақты және біртекті ортаны қамтамасыз етеді. Сұйық гелийсіз аса өткізгіш магнитті-резонанстық томография пациенттер мен медициналық мекемелерге айтарлықтай артықшылықтар әкеледі. Болашақ медициналық визуализация үшін кең ауқымды қолдануды қамтамасыз етеді.
Атап айтқанда, төмен шығындар сұйық гелийдің жоғалуының болмауы, бұл бүкіл өмірлік цикл ішінде пайдалану шығыстарын төмендетеді. Жаңа аппаратта сұйық гелий қолданылмайтынымен магниттік резонанс саласында жаңа дәуір ашады. Бұл жағдайда квенч-құбырды монтаждаудың, гелий қорын толықтырудың және оның булануына қауіптенудің қажеті жоқ.
Wandong Medical компаниясының «i_Vision 1.5T Plus» гелийсіз магнитті резонансты томографы (МРТ) – заманауи диагностикалық құрылғы. Ол дәстүрлі МРТ жүйелерінде қолданылатын сұйық гелийге тәуелділікті азайту немесе толығымен жою арқылы маңызды артықшылықтарды ұсынады.
Wandong Medical «i_Vision 1.5T Plus» жүйесі гелийсіз дизайн («Free-cool» криогендік платформа) артықшылығымен сипатталады. Бұл жүйенің ең басты ерекшелігі – ішінде сұйық гелийді қажет етпей, тұрақты және біркелкі төмен температура ортасын қамтамасыз етеді. Ол гелийдің қайнап кетуінен (quench) немесе электр қуатының үзілуінен туындауы мүмкін проблемаларды болдырмайды. Сондай-ақ пайдалану шығындарын айтарлықтай төмендетеді. Өйткені гелийді толтыру қажет емес.
Тағы бір жаңадан алынған австриялық 3D, 4D УЗИ аппаратының мүмкіндігін түсіндірген Наурызбек Сырымбаев:
– Эксперт класты УЗИ аппаратымен акушерлік, гинекологиялық, урологиялық, кардиологиялық зерттеулер жасаймыз. УЗИ диагностикасы – ауруды ерте анықтаудың озық тәсілі. Осы аппарат жүкті әйелдердегі ұрық және сәби денсаулығының даму кезіндегі ақауларын алдын ала анықтауға мүмкіндік береді. Бала қозғалысы мен ішкі бітімі және ағзаларын анық көре аламыз. Сонымен бірге ересектердің ішкі ағза мүшелерін 20 минутта қарап, зерттеу нәтижесін қолға береміз, – дейді Қазалы теміржол емханасының І санатты узист дәрігері.
Оңтүстік Корея және австриялық заманауи құрылғының мүмкіндігі өте жоғары. Астана, Алматы, Қызылорда қалаларында арнайы білімін жетілдірген мамандар жаңа жабдық арқылы жүйке, тірек-қимыл жүйесі, омыртқаның және жұлынның туа біткен патологияларын көре алады. Осылайша науқастарға дәл диагноз қойылып, емдеу шаралары жүргізіледі.
Емханаға ЛОР комбайн «XU1Smart» құрылғысы алынып, 2-санатты дәрігер отоларинголог Қуаныш Тақтаболатұлы қызмет көрсетуде. Жансақтау бөліміне өкпені жасанды желдету аппараты «VG70 BeiJing Aeonmed Cj Ltd» алынды.
Ауруханада тәуліктік мониторинг кешені «ЭКГ Валента» жабдығы іске қосылды. Залалсыздандыру бөліміне сутегі асқын тотығының төмен температуралы плазмалық стерилизаторы 50 литр, ауа компрессоры (медициналық құралдарды ауамен кептіру) аппараты алынды.
Бауыр фиброзының дәрежесін инвазивті емес анықтауға арналған «FibroScan 530 Compacr Фиброскан» (бауырды тексеру) аппараты жұмысын бастады. Мамандар білімін жетілдірген. Қарапайым сөзбен айтқанда, фиброскан аппараты тек қана бауырдың негізгі қызметінің жұмыс жасауын, қатаюын және қаншалықты май басқанын анықтайды.
Үш өлшемді оптикалық когерентті томографияға арналған құрал, операциялық микроскоп ОМ-9 жиынтығы, оптикалық биометр OA-2000 моделі, TOMEY GmbH, офтальмологиялық хирургиялық жүйе Centurion Vision System аппараттарға қол жеткізілді. 2023 жылдан офтальмологиялық ота жасалуда. Отаны бірінші квалификациялық санаты бар дәрігер офтальмолог Берік Жадырасын жүзеге асыруда. Маман білімін жетілдірген, офтальмологиялық қызметке лицензия бар. Былтыр дәрігер офтальмолог Мұрат Байқадамовпен бірігіп Берік Балдақұлы алғаш рет көзге «Факоэмульсификация катаракты с имплантацией» диагнозымен ота жасалды.
Өткен жылы емхана бөлімінде жаңадан new Oriental 1000nc медициналық рентгендік-радиографиялық құрылғы іске қосылды.
Айнұр ҚАЗМАҒАМБЕТОВА
