Кейінгі уақытта халықтың жинақтаушы зейнетақы қорындағы қаржыға қатысты қызығушылығы артты. Президенттің пәрменімен оның бір бөлігін тұрғын үй жағдайын жақсартуға, емделуге және басқа шараларға пайдалануға болатыны жөніндегі хабар жер-жерде қауырт жағдай туғызды.
Зейнетақы қорындағы жинақты кім қанша мөлшерде пайдаланды? Қордың бүгінгі жағдайы қандай? Зейнетақы қорында нендей өзгеріс бар? Осы және басқа да сауалдарға жауап беруін өтініп біз бірыңғай жинақтаушы зейнетақы қоры облыстық филиалына қатынас жолдаған болатынбыз. Жауапта төмендегі мәселелер қамтылды.
2021 жылдың 1 сәуірінен бастап БЖЗҚ-дан ай сайынғы төлемді есептеуді жүзеге асыру Әдістемесі өзгерді.
БЖЗҚ-дан төленетін ай сайынғы зейнетақы төлемінің мөлшері Қазақстан Республикасы Үкіметінің 2013 жылғы 2 қазандағы № 1042 қаулысының ережелеріне сәйкес есептелген зейнетақы төлемдерінің жылдық сомасының он екіден бір бөлігі ретінде айқындалады. Бұл ретте БЖЗҚ-дан ай сайынғы зейнетақы төлемі ең төменгі күнкөріс деңгейінің 70% кем емес мөлшерде жүзеге асырылады. (Бұрын БЖЗҚ-дан ай сайынғы зейнетақы төлемі ең төменгі күнкөріс деңгейінің 54% кем емес мөлшерде жүзеге асырылған болатын).
Зейнетақы төлемдерінің мөлшерін есептеуді жүзеге асыру Әдістемесіне сәйкес 2021 жылдың 1 сәуірінен бастап зейнетақы төлемдерін жүзеге асырудың бірінші жылындағы зейнетақы төлемдерінің жылдық сомасы зейнетақы жинақтары сомасының зейнетақы жинақтары төлемдерінің мөлшерлемесіне көбейтіндісі ретінде есептелетін болады – 6,5 %.
Одан кейінгі жылдары ай сайынғы зейнетақы төлемінің мөлшері өткен жылғы ай сайынғы зейнетақы төлемінің мөлшерін зейнетақы төлемдерін индекстеу мөлшерлемесіне жыл сайын арттыру жолымен қайта есептелетін болады – 5%.
Мысал келтірейік:
ЗЖ сомасы = 6 000 000 теңге
Бірінші жылдағы зейнетақы төлемдерінің жылдық сомасы: 6 000 000*6,5%=390 000 теңге;
Бірінші жылдағы ай сайынғы зейнетақы төлемінің мөлшері: 390 000/12 ай =32 500 теңге;
Екінші жылға арналған ай сайынғы зейнетақы төлемінің мөлшері: 32 500+ 32 500*5%=34 125 теңге.
Бұдан басқа, зейнетақы төлемдерінің мөлшерін есептеуді жүзеге асыру Әдістемесінде белгілі бір санаттарға жататын, яғни мерзімсіз уақытқа белгіленген 1 немесе 2-топтағы мүгедектігі бар, сондай-ақ, жинақтары міндетті кәсіптік зейнетақы жарналары есебінен кемінде алпыс ай жинақталатын зиянды және қауіпті өндірістерде жұмыс істеген алушылар үшін түзетілетін арттыру коэффициенттері көзделген. Бұл ретте, жоғарыда көрсетілген шарттардың біреуін ғана емес, одан да көбін қанағаттандыратын тұлғалар үшін ең үлкен мәнге ие түзету коэффициенті қолданылады.
Айта кету керек, зейнетақы төлемдерінің мөлшерін есептеуді жүзеге асырудың аталған Әдістемесі 2021 жылдың 1 сәуірінен бастап туындаған қатынастарға қолданылады.
БЖЗҚ-дан зейнетақы төлемдерін алу құқығын 2018 жылғы 1 қаңтарға дейін іске асырған адамдарға зейнетақы төлемінің жыл сайынғы мөлшері ең төмен зейнетақының отыз еселенген мөлшерінен кем болмайды (2021 жылы 30 х 43 272= 1 298 160 теңге). Төлемдер бұрын таңдалған кесте бойынша жүзеге асырылады.
Зейнетақы төлемдерінің мөлшерін есептеуді жүзеге асырудың жаңа Әдістемесіне сәйкес, БЖЗҚ-дан зейнетақы төлемдерін алу құқығын 2018 жылғы 1 қаңтардан бастап 2021 жылғы 31 наурызға (қоса алғанда) дейін іске асырған адамдарға 2022 жылғы 1 қаңтардан бастап ай сайынғы зейнетақы төлемдері 5% мөлшеріндегі зейнетақы төлемдерін индекстеу мөлшерлемесіне ұлғайтылатын болады, ол кейіннен жыл сайын индекстеліп отырады.
Осылайша зейнетақы төлемдерінің мөлшерін есептеуді жүзеге асырудың жаңа Әдістемесі алушылардың еңбек жағдайлары мен денсаулығының ерекшеліктерін ескереді, сондай-ақ, БЖЗҚ-дан берілетін жыл сайынғы төлемдер мөлшерін ұлғайтуға ықпал ететін болады.
Естеріңізге сала кетейік, БЖЗҚ-дан зейнетақы төлемдері жеке зейнетақы шотындағы зейнетақы жинақтары таусылғанға дейін жүзеге асырылады.
Түсіндірме бере кетейік. Қазақстандағы зейнетақы жинақ қорының барлық түрі бойынша жиналған қаржы 12,3 трлн теңге құрайды. Оның ішінде Қызылорда облысының үлесі 384 млрд теңгеге жуық. Соңғы салыстырулар бойынша жағдайдың біршама оңды сипат ала бастағанын байқадық. Қызылорда облысы бойынша барлық салымшылардың саны 413 мың адамға жуықтайды. Бұл, демек, облыс халқының тең жарымының зейнетақы қорындағы есебі бар деген ұғымды білдіреді. Қорыта айтқанда, қазір халықтың көпшілігі зейнетақы қорына қаржы жинаудың тиімді екенін түсіне бастаған сыңайлы. Әлбетте, мұны жақсылықтың белгісі ретінде бағалауға болады.
Жинақтаушы зейнетақы қорына жолданған сұраудың бірінде салым қаржысының облыста жүзеге асыру барысы сұралған еді. Облыс бойынша осы кезеңде барлығы 6 мыңға жуық өтініш түсіпті. Сұрау бойынша 4046 адамның өтініші қанағаттандырылып, оларға тиісті қаржы берілген. Ол шамамен 15,3 млрд теңгені құрайды. Қорыта айтқанда, бірыңғай жинақтаушы зейнетақы қорындағы осыншама қаржы негізінен тұрғындардың тұрғын үй жағдайын жақсартуға пайдаланылды.
Жолдасбек АҚСАҚАЛОВ,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
