Алматыдағы оқиғаға қатысты төрт күдіктінің екеуі ұсталып, екеуі әлі іздестіріліп жатыр, деп хабарлайды ktk.kz.
Телеарнаның хабарлауынша оқиға бір азаматтың жалға көлік алғанынан басталған. Daewoo Nexia көлігін жалға алған ер адам 2 күндік ақшасын кешіктіріпті. Жалға беруші адам оны тауып алып, Наурызбай ауданында ұрып-соғып, 2 телефонын тартып алған. Кейін 14 мың теңгені 40 мың қып қайтарасың деп талап қойған. Ақшаны алу үшін келісілген жерге көлікті жалға бергендер 4 адам боп келген. Олар сол жерде 2 полиция қызметкеріне пышақ жарақатын салған.
Қазір ҚР ҚК-нің «Билік өкілін қорлау» бабына сәйкес, құқық қорғау органдары қызметкерлерінің өміріне қауіп төндіргені үшін қылмыстық іс қозғалды. Сотқа дейінгі тергеу жүргізіліп жатыр. «Жарақат алған тәртіп сақшылары №7 қалалық клиникалық ауруханаға бірден жеткізіліп, ота жасалды. Қазіргі кезде олардың өміріне қауіп төніп тұрған жоқ, жағдайы бірқалыпты», – дейді полициядағылар.
>>> Біздің Facebook, Instagram парақшаларымыз бен Telegram каналымызға жазылыңыз! <<<
