Облыста жемқорлықты жоюдың озық механизмдерін қолдана отырып, қолайлы инвестициялық ахуал қалыптастыруға бағытталған «Protecting business and investmens» жобасы қарқынды жүзеге асуда. Жуырда аталған жоба аясында құзырлы мемлекеттік органдардың басшылары кездесу өткізді. Оған ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаменті басшысы Абзал Мұхимов қатысып, бизнесті қорғау, оған қолайлы жағдай жасау ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің басым бағыттарының бірі екенін айтты.
– Жоба «Kazakh invest» Ұлттық компаниясы» акционерлік қоғамымен, тиісті министрліктермен және жергілікті атқарушы органдармен бірлесіп жүзеге асырылуда. Бастаманың басым бағыты – кәсіпкерлердің құқығын қорғау, бизнес үдерісті оңтайландыру, қоғамдық бақылау орнату және инвесторлардың сыбайлас жемқорлыққа қарсы құқықтық сауаттылығын арттыру. Осы мақсатта департамент пен Ұлттық бюро департаменті қызметкерлерінен тұратын жедел топ құрылды. Жедел топ «Kazakh invest» АҚ филиалындағы үйлестірушімен тікелей байланыста болады. Сондай-ақ, 3 шілдеден бастап облыстық кәсіпкерлерге қызмет көрсету орталығы жанынан инвесторларды сыбайлас жемқорлыққа қарсы сүйемелдейтін фронт офис жұмысын бастады. Фронт офисте әрбір инвестор сыбайлас жемқорлыққа қарсы тәуекелдерден қорғану шараларымен қамтылады, – деді А.Сансызбайұлы.
Жиын барысында өңірлік кәсіпкерлерге қызмет көрсету орталығының директоры Қамар Бекетова биыл «Жаппай кәсіпкерлікті қолдау жылы» ретінде жарияланғанын, осыған сәйкес орталықтың «бір терезе қағидаты» аясында қызмет көрсететінін жеткізді. Сонымен қатар аймақтағы инвестициялық жобаларды жүзеге асыру кезіндегі проблемалық мәселелерге тоқталды. Оның айтуынша, Шиелі ауданындағы цемент зауыты құрылысын жүргізіп отырған инвестор-компания «China Triumph International Engineering» ЖШС арқылы құрылыс жұмыстарына қажетті шетелдік мамандарды шақырту үшін көші-қон полициясы органдарына өткізілген құжаттар мерзімінде қаралмаған, осыған байланысты тиісті рұқсат беру құжаттарының рәсімделуі кешеуілдеуде. Жиын барысында бұл мәселе бойынша көші-қон қызметіне бірқатар ұсыныс берілді. Спикерлер кез келген отандық және шетелдік инвесторлардың құқығы қорғалатынын, әкімшілік кедергілердің болмауына тұрақты түрде мониторинг жүргізілетінін айтты. Кездесу соңында 3 инвестициялық жобаны жемқорлыққа қарсы сүйемелдеу туралы келісімдерге қол қойылды.
Мөлдір ҚАЛЫМБЕТ,
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
