Үлкен спортта табысқа тек талант емес, төзім, тәртіп пен тынымсыз еңбек жеткізеді. Қызылордалық самбошы Шынар Абатованың спорттағы жолы да осындай табандылық пен үздіксіз ізденістен өрілген. Оның әрбір жүлдесінің артында ұзақ дайындық, үлкен мақсат және спортқа деген адалдық жатыр.
Шынар – ересектер арасындағы Әлем чемпионатының қола жүлдегері, жастар арасындағы Азия чемпионы. Ол самбомен қатар дзюдо және қазақ күресімен де айналысып, бірнеше бағытта шеберлігін шыңдап жүр. Алайда спортшы үшін медаль мен атақтан бұрын мінез бен тәртіп маңызды.
Оның спорттағы алғашқы ұстазы – Жанар Дүйсекенова. Бапкер шәкіртіне күрестің әдіс-тәсілдерін ғана емес, адамдық қасиетті де үйреткен.
– Жанар апайым мені спорт әлеміне баулыды. «Сенің алдымен адам болғаның керек» деген сөзі санамда мәңгі қалды. Үлкенді сыйлауды, тәртіпті, өзіңді ұстай білуді сол кісіден үйрендім. Спорттағы маңызды жетістіктерімнің бірі – 2024 жылы Астанада өткен ересектер арасындағы Әлем чемпионатындағы қола медаль, – дейді Шынар. ‒ Ал 2022 жылы Ливанда өткен жастар арасындағы Азия чемпионатында жеңімпаз атандым. Бұл жетістіктердің әрқайсысының орны бөлек. Әсіресе Әлем чемпионатының жүлдесі мен үшін ерекше. Оның артында көпжылдық еңбек, күнделікті ауыр жаттығу, жарақаттар мен қиындықтарды еңсеру жолы жатыр. Сыр өңірінің және Қазақстанның көк Туын халықаралық аренада таныту – мен үшін үлкен мақтаныш.
Спортшының сөзінше, мұндай нәтижеге жетудің артында қатаң күн тәртібі бар. Шынардың жұмыс күні таңғы 7:00-де басталады. Жүгіру мен дене қыздырудан кейін сағат 10:00-де негізгі жаттығуға кіріседі. Физикалық дайындық, кроссфит, ауырлықпен жұмыс, техника мен тактиканы жетілдіруге бірнеше сағат бөлінеді. Түстен кейін аз уақыт тынығып, кешкі жаттығуда татамидегі спаррингке, қателіктерді түзетуге және төзімділікті арттыруға көңіл бөледі. Дегенмен үлкен спорттың жолы тек жеңістерден тұрмайды. Шынардың да ауыр жарақат алып, қатарынан сәтсіздікке ұшыраған кездері болған.
– Бәрін тастап кеткім келген сәттер болды. Әсіресе жарақат алған кезде адам физикалық тұрғыдан ғана емес, эмоционалдық жағынан да қатты қиналады. Ұзақ уақыт жаттығудан шет қалу, бұрынғы қалпыңа қашан оралатыныңды білмеу, қайта татамиге шыққанда жарақат қайталанып кете ме деген қорқыныш та болады. Кейде өзіңе деген сенім азайып, көп ойға берілетін кездер кездеседі. Осындай кездерде ата-анам, отбасым мен бапкерлерім үнемі жанымнан табылып, қолдау көрсетті. Олардың сенімі маған күш беріп, спортқа қайта оралуыма себеп болды. Біртіндеп жаттығуды бастап, бұрынғы қалпыма келіп, татамиге қайта шыққан сәтте ерекше сезім болды. Қиындықтың бәрін еңсеруге болатынын тағы бір рет түсіндім, – дейді ол.
Шынар ұлттық құрамамен бірге жаттығуын жалғастырып, алдағы жарыстарға дайындалуда. Негізгі мақсаттарының бірі – ел чемпионатында топ жару. Жас спортшыларға айтар кеңесі де қарапайым: дарыннан бұрын еңбек пен тәртіпке сену.
Оның спорттағы жолы әлі талай белеске ұласары анық. Әлем чемпионатының қоласы мен Азия чемпионатының алтыны – жылдар бойғы еңбектің нәтижесі ғана емес, алдағы үлкен мақсаттарға бастайтын баспалдақ. Өйткені спортта әр жеңіс жаңа жауапкершілік жүктесе, әр жеңіліс адамды шыңдап, өз мүмкіндігін қайта бағалауға үйретеді.
Бағлан АМАНЖОЛ,
«Сыр бойы»
