ЖАТ АҒЫМДАРДАН САҚТАНУ ЖОЛДАРЫН ТҮСІНДІРДІ

301

0

Деструктивті діни ағымдардың жетегінде кетіп, арбауына түсетіндердің дені жастар. Сондықтан олардың жат ағымдардың теріс идеологияларына қарсы иммунитетін қалыптастыру қажет. Осы мақсатта Дін мәселелерін зерттеу орталығы мамандары жастармен жиі кездесіп, түсіндірме жұмыстарын жүргізіп келеді.

Дәл осындай шара бүгін «Нұр Отан» партиясының Қызылорда облыстық филиалының мәжіліс залында өтті. Жиында орталық мамандары мен облыстық ақпараттық түсіндіру тобының мүшелері жастарға қазақ халқының әдет-ғұрыптары жайлы әңгімелеп, деструктивті діни  ағымдардың қоғамға қауіптілігін түсіндірді.

«Әсіредіншілдер ұлттық құндылықтарды жоққа шығарып, қазақ халқының салт-дәстүрін жойғысы келеді. Негізінен қазақ халқы қандай ырымды болмасын діни негізге немесе табиғи құбылыстарға қарап шығарған. Түп-төркініне үңілсек үлкен мән жатыр. Ал, түзу діни бағытты ұстанғандар қазақи құндылықтарды жоққа шығармайды. Сондықтан имандылыққа бет бұрған жастар жат ағымдарды осындай әрекеттері арқылы ажыратып,сақтануына болады» – дейді кездесуде АТТ мүшесі Сәкен Алдашбаев.
Кездесуде орталықтың бөлім басшысы Самат Памбетов жастарға имандылық жолын интернеттен іздемеу қажеттігін түсіндірді. Ғаламтордан діни сауатын ашқысы келгендердің ақыры адасуға апаратынын жеткізіп, мешіт имамдарынан дәріс алудың абзал екендігін айтты.

Ерқанат СӘРСЕНБАЙ,
Қызылорда облыстық ішкі саясат басқармасының
Дін мәселелерін зерттеу орталығының маманы

 


>>> Біздің Facebook, Instagram парақшаларымыз бен Telegram каналымызға жазылыңыз! <<<