«БЖЗҚ» акционерлік қоғамы Қызылорда облыстық филиалының баспасөз қызметі хабарлағандай, «БЖЗҚ барлық салымшыларға қолжетімді» атты ашық есік күні өтті. Бір ерекшелігі, шараға бұл жолы салымшылармен бірге жоғары сынып оқушылары мен студенттер арнайы шақырылды. Филиал директоры Арнұр Құрманғали атап өткендей, қор өскелең ұрпақтың арасында қаржылық сауаттылық пен зейнетақыны жоспарлау дағдыларын қалыптастыруға ерекше мән береді.– Бүгінде зейнеткерлер зейнетақысының негізгі бөлігін мемлекеттік бюджеттен алатын болса, қазіргі оқушылар мен студенттердің зейнетақы көлемі келешекте негізінен олардың өздерінің аударған жинақтарына байланысты болады. Сондықтан оларды мектеп табалдырығынан бастап зейнетақыны жоспарлауға үйретуіміз керек, – дейді филиал жетекшісі.
Шараға қатысушылар қор қызметтеріне қалай жүгінуге болатындығымен және кеңес алу жолдарымен танысты.
Зейнетақы қызметтерінің қолжетімділігі – Бірыңғай зейнетақы жинақтаушы қорының басым бағыттарының бірі. Бүгінде Қор қызметтері еліміздің барлық тұрғындарына дерлік қолжетімді. Нақты кезеңде республиканың бүкіл аймақтарында 216 дербес қызмет көрсету орталығы жұмыс істейді. Көшпелі қызмет тиімді ұйымдастырылып, мүмкіндігі шектеулі азаматтарға мобильді агенттер қызмет көрсетеді. Саланы жетілдіру үшін барлық өңірлік филиалдарда терминалдар, 10 қалада ақпараттық дүңгіршектер орнатылған. Сонымен қатар көптеген қызмет түрлері enpf.kz сайты, egov.kz электрондық үкімет сайты және биыл іске қосылған telegram-бот арқылы да қолжетімді. Салымшыларға кеңес беру үшін 1418 нөмірі бойынша байланыс орталығы жұмыс істейді. Толғандырған сұрақтарды аталған Қор төрайымының блогына немесе әлеуметтік желілердегі парақшаларға жолдауға болады.
– Қор қызметтерінің 80 пайызы қазір қашықтықтан электрондық түрде қолжетімді. Осының арқасында кеңсеге келіп, кезек күтпей-ақ, интернет арқылы немесе ұялы телефондардың кез келген операциялық жүйесіне бейімделген ENPF ұялы қосымшасы арқылы қызмет алуға болады. Бұл салымшылар мен алымшылардың уақытын үнемдеуге мүмкіндік береді,– деп атап өтті филиал директоры.
Қор өкілдерінің айтуынша, электрондық тәсілмен міндетті және ерікті зейнетақы жарналарын есептеу жөніндегі жеке зейнетақы шоттарын ашуға, жеке зейнетақы шотының жай-күйі туралы хабарлама алуға, деректемелерді немесе ЖЗШ жай-күйі туралы ақпарат алу тәсілін өзгертуге және т.б. қызметтер алуға болады. Сондай-ақ, Қор сайтында болашақ жинақтар мен төлемдердің шамалас мөлшерін есептеуге арналған зейнетақы калькуляторы бар.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
