Халқымыз «атадан мал қалғанша, тал қалсын» деген даналықтың парқын ұрпағының бойына сіңірген. Баба аманатына адалдық танытып, сауапты әрекет жасап жүргендер баршылық. Сондай жанның бірі, Байқоңыр тұрғыны Қаласбай Көптілеуов қажырлы еңбегінің арқасында қала жұртының құрметіне бөленді.
Ол бірнеше жылда көпқабатты үйдің қаңырап тұрған ауласын нағыз жасыл оазиске айналдырған. Барлық көкөніс пен жеміс сырттан келетін, жақын маңда бау-бақша бірлестіктеріне орын жоқ Байқоңыр үшін бұл өте маңызды.
Көктемде Қаласбай Көптілеуовтің бағында өрік пен шие гүлдегенде жас жұбайлар кортеждері келеді. Гүлденген жеміс ағаштарының саясында қарттардың батасын алып, неке қию жақсы дәстүрге айналған. Жазда Қаласбай ата өрік жеуге келген көрші аула балаларын бағбандыққа баулып, табиғатты қорғауға үйретеді.
– Бағбандық – өмірдегі ең сүйікті ісім. Бала кезімнен жақсы көретінмін. Бұл – жанға рахат сыйлайтын жұмыс, – дейді Қаласбай Көптілеуов.
Ол отбасымен Қазалы қаласынан Байқоңырға көшіп барған кезде ауласын көгалдандыра бастаған.
– Шаршы метрлеп асықпай жұмыс істедім, тырыстым. Қаланы жасылдандырып, көріктендіре түссем деген талабым зор болды, – дейді ол.
Бағбан ол үшін жұртқа үлгі көрсетудің өзі жеткілікті деп санайды. Қаласбай Көптілеуовтің ауласындағы жеміс ағаштары мен жабайы жүзім үйдің қасбетін бесінші қабатқа дейін шырмай өскен. Мұны көрген өзге аула тұрғындары да ауласын осылай безендіруді қалаған екен. Бағбан оларға көшеттерімен де, кеңестерімен де қолдау білдіріп, көмегін аяған жоқ.
– Көшет үшін ақша алмаймын, өйткені олар сауапты іс жасағысы келеді. Ал жасыл желек – жер шарының өкпесі. Өскінге күтім, бір жағынан жанға жағымды жұмыс, әрі қоршаған ортаға пайда. Сұрағандарға көшетті қажетіне сай беремін, отырғызуға көмектесіп, күтім жасауға керек кеңестер айтамын. Өз көшеттерім отырғызылған аулаларға жиі барып, қарап тұрамын, – дейді ол.
Қаласбай ағаның басқа аулаларға отырғызған ағаштарына барлық тұрғындар бірлесіп күтім жасайды. Қаланың көрікті орындарының біріне айналған бағбанның ауласын әкімшілік басшысы қоршап берген. Бірде оған Константин Бусыгинге дейін қалалық әкімшілікті басқарған Анатолий Петренконың өзі келген. Жұртқа үлгі болар жұмыстары үшін «Мичурин» деп атаған екен.
Байқоңыр әкімшілігінің мемлекеттік органдармен және қоғамдық бірлестіктермен жұмыс бөлімінің бастығы Виктор Новиков Қаласбай Көптілеуовті қала тұрғындарының барлығы құрметтейтінін айтады.
– Мен ол кісімен 12 жылдан бері көрші тұрамын. Жақын таныған адам Қаласбай Көптілеуовтің бойынан мейірім мен адалдық сияқты қасиеттерді байқайды. Ол көмек сұраған жанға шын жүректен қол ұшын созуға даяр жан. Қандай мәселеге кезіксе де бейжай қарамай, жауапты мекемелерге барып жағдайды түсіндіреді. Ұсынысын айтады. Өз күшімен де тұрғындар үшін көп нәрсе жасайды. Қаласбай Көптілеуов секілді жастарға үлгі етерлік жандар көп болса екен деген тілегіміз бар, – дейді ол.
Биболат СӘТЖАН,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
