Коронавирус инфекциясымен күресте белсенділік танытқан қызылордалықтарға «Халық алғысы» медалі табысталды. Оларды облыс әкімі Гүлшара Әбдіқалықова марапаттады.
Аймақ басшысы қиын-қыстау кезеңде халық саулығы үшін басын тәуекелге тігіп, қажыр көрсеткен жандардың еңбегін жоғары бағалады.
– Бұл медаль – халықтың ыстық ықыласы мен шын құрметіне ие болған азаматтарға тағайындалатын арнайы марапат. Індетпен күресте адам өмірінің сақшысы болған дәрігер, тәулік бойы қоғамдық тәртіптің сақталуын қадағалаған полицей, облыс орталығы мен ауыл-ауылды аралап, жұқпалы кесел ошағын залалсыздандыруға қатысқан әскерилер, қайырымдылық шараларын толассыз жүргізіп, ауруханаларды қажетті медициналық бұйымдармен, құралдармен қамтамасыз еткен кәсіпкерлер, қаржысыз көмек қолын созған еріктілер, індет ошақтарынан жылдам ақпарат таратқан журналистердің еңбегі ерен, – деді облыс әкімі.
Мемлекет басшысының Жарлығына сәйкес 100-ден астам адам медальға лайық деп танылды. Соның бірқатарын аймақ басшысы табыс етіп, алғыс білдірді.
«Халық алғысын» алғандардың бірі – облыстық жұқпалы аурулар ауруханасының бөлім меңгерушісі Болат Асанбаев.
– Пандемия кезінде күн-түн демей, үй көрмей жұмыс істеуге тура келді. Көптеген қиындық туындап, оны шешуге араластық. Дегенмен, қазір жағдай біршама тұрақталды. Бүгінгі марапат – қатерлі індетті ауыздықтауға аянбай үлес қосқан азаматтардың еңбегіне берілген лайықты баға деп білемін, – дейді ол.
Бұған дейін 8 марапат иесі 2020 жылғы 23 маусымда Президенттің қатысуымен өткен «Biz Birgemiz» онлайн-форумы аясында марапатталды.
Жиында облыс әкімі «COVID-19» вирусымен уақытпен санаспай күрескен азаматтарды «бейбіт күннің батырлары» дей келе, халықты денсаулыққа жете мән беріп, сақтық шараларын сақтауға шақырды.
Назерке Саниязова,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
