Қаланың дамуын тілге тиек еткенде үлкен өзгерістер ойға оралады. Пандемияға қарамастан облыс орталығында құрылыс қарқыны бәсеңдеген жоқ. Экономиканың қай саласында да өрлеу бар. Әлеуметтік жүйеде де ізге түскен еңбек түлегенін көрсетіп отыр. Күн тәртібінде келе жатқан тұрғындардың өзекті мәселелері тек сөз жүзінде ғана емес, іс жүзінде бақылауға алынып, кезең-кезеңімен шешімін табуда. Нәтиже айтарлықтай. Қаладағы 408 көшенің жөндеуден өткені, апаттық үйде тұрған отбасылардың баспанамен қамтылуы, балаларға арналған ойын алаңдарының көптеп салынуы соған дәлел. Мұның барлығы Қызылорда қаласының әкімі Нұрлыбек Нәлібаевтың онлайн есепті кездесуінде қамтылды. Шараға облыс әкімі Гүлшара Әбдіқалықова желі арқылы қосылып, атқарылған жұмыс пен алдағы жоспарлар жайымен танысты.
Мәліметке сүйенсек, өткен жылдың басында қала бюджеті 69 млрд теңге көлемінде бекітілген. Жыл қорытындысымен 94 млрд теңгеге жетіп отыр. Өнеркәсіп өнімдерінің көлемі – 480 млрд теңге, осыған қарап негізгі капиталға салынған инвестицияның артқанын байқауға болады.
– Кәсіпкерлерді қолдау – көркеюді қолдау. Бұл салада маңызды бастамалар жүзеге асуда. Бүгінде облыста нақты жұмыс жасап тұрған кәсіпкерлік субъектілері бойынша Қызылорда қаласының үлесі 48 процентке жетті. «Индустриялық-инновациялық дамытудың 2020-2025» бағдарламасы аясында қалада жалпы құны 67 млрд 600 млн теңгені құрайтын 8 жоба іске асуда. Олар толық іске қосылғанда 1000-нан астам қызылордалық жұмыспен қамтылатын болады. «Бизнестің жол картасы» негізінде жалпы құны 6 млрд 500 млн теңгені құрайтын 161 жоба қаржыландырылып, 30 тұрғын 57 млн теңгеге қайтарымсыз мемлекеттік грант алды. Ел қуатты болмай, бақ тұрақты болмайды. «Қарапайым заттар экономикасын дамыту», «Нәтижелі жұмыспен қамтуды және жаппай кәсіпкерлікті дамыту» бағдарламалары бойынша да қарқын бар. Халықтың әл-ауқатын арттырып, экономиканы дамытуға бағытталған шаралар алдағы уақытта да жалғасады, – деді Нұрлыбек Машбекұлы.
Тұрғындарды баспанамен қамту мәселесі ерекше атап өтілді. Бұл ретте жыл көлемінде мыңнан аса қызылордалықтың баспана бақытына кенелгені айтылды. Қалада кейінгі жылдары жаңадан тұрғын аудандар бой көтеріп, 194 көпқабатты тұрғын үй пайдалануға берілген. Бүгінде 38 үйдің құрылысы жүргізілуде. Бұдан бөлек, Сырдария өзенінің сол жағалауынан апаттық үйлерде тұратын отбасылар үшін 50 пәтерлік тұрғын үй құрылысын жүргізуге қаржы қаралды. Қаланың инженерлік-коммуникациялық инфрақұрылымын дамыту да басты назарда. «Өңірлерді дамыту» бағдарламасы аясында өткен жылы 2 млрд 35 млн теңгеге 37 көпқабатты тұрғын үй қайта жаңғыртудан өткен.
– Жол-көлік инфрақұрылымын дамытуда жаңа жобалар жүзеге асты. Республикалық және жергілікті бюджеттен бөлінген қаржыға 408 көшеге ағымдағы, орташа және күрделі жөндеу жұмыстары жүргізілді. Бұдан бөлек, Ғ.Мұратбаев көшесіндегі көпір мен «Батыс Еуропа-Батыс Қытай» күре жолын жалғайтын ұзындығы 5 шақырымға созылған жол құрылысы жүргізіліп, пайдалануға берілді. Аталған магистральді автодәлізбен қосуға 640 млн теңгеге «Шіркейлі» каналы арқылы өтетін көпір салынып, қазіргі таңда ел игілігіне қызмет жасауда. 70 дана жаңа аялдама орнатылды, 68 көшеге тротуар салынды, – деді қала әкімі.
Бұқаралық спортты дамытудың алғышарттарының бірі – спорттық ғимараттарға қолжетімділік. Бұл тұрғыда қалада өткен жылы Бірқазан елді мекені, Ақсуат, Ақжарма, Қосшыңырау ауылдық округтерінде дене шынықтыру алаңдарына спорттық алаңдар салынып, пайдалануға берілген. «Жұмыспен қамтудың Жол картасы» аясында 4 облыстық спорт мектебі жөндеуден өтіп, «Локомотив» стадионының футбол алаңына қайта жаңғырту жұмыстары мен байдарка есу базасының құрылысы жүргізілді. Ең бастысы, көппәтерлі тұрғын үй аулаларына 3 стритбол және 45 ойын алаңы салынған. Бұл шаралар бұқаралық спортқа деген бетбұрысты күшейтіп, сергек жандардың қатарын көбейтері анық.
Алдағы жоспар да айқын. Биыл көгалдағы хоккей алаңы, Тасбөгет кентінде денешынықтыру-сауықтыру кешендері салынады. Әлеуметтік қызметтер көрсету орталығы, полиция бөлімшесінің әкімшілік ғимараты қайта жаңғыртудан өтеді. Қосшыңырау, Талсуат ауылдық округтерінің инженерлік инфрақұрылымын дамыту да назарда. Қала әкімі Ғ.Мұратбаев-Бейбарыс сұлтан көшелерінде орналасқан көпірлер аралығында 2 шақырымды құрайтын сол жағалаудағы магистраль жалғасының құрылысы басталып, жыл аяғына дейін пайдалануға берілетінін хабарлады.
– Бейбарыс сұлтан көшесіндегі көпірден Эдельвейс саяжайы арқылы Тұңғыш Президент саябағына дейінгі аралықты қамтитын жолды салуға 395 млн теңге бөлініп, жұмыс жуық арада басталады. Тәуелсіздік даңғылының жалғасы саналатын 95 процент жұмыстары біткен Қызылжарма каналына дейінгі магистральді аяқтауға 294 млн теңге бөлінді. Бұл жол сәуір айында пайдалануға беріледі. Сонымен қатар облыстық «Жастар ресурстық орталығынан» бастау алатын жалпы ұзындығы 3,4 шақырымды құрайтын жолды Шіркейлі каналына баратын негізгі көшемен байланыстыруға облыстық бюджеттен 1,5 млрд теңге бөлініп, құрылысы осы жылы аяқталады. Сол жағалаудағы бас көше мен «Батыс Еуропа-Батыс Қытай» автодәлізін байланыстыратын құны 4 млрд 274 млн теңге болатын көлік айрығының құрылысын «Базис» корпорациясы бастады, – деп сабақтады қала әкімі.
Сондай-ақ, әлемді шарпыған пандемия кезінде бір жағадан бас, бір жеңнен қол шығарған барлық қала тұрғындарына, дәрігерлерге, жомарт жүректі азаматтарға, кәсіпкерлерге қала әкімдігі атынан шынайы ризашылығын білдірді.
Есепті жиын тікелей эфирден көрсетілді, мұнда тұрғындардың сауалы ескерусіз қалмады. Еркін форматта өткен онлайн кездесуде жан-жақты, ашық пікірлер қамтылды. Мәселен, Зәуре Өмірзақова есімді Титов қыстағының тұрғыны көшені жарықтандыруға қатысты, «Шанхай» шағын ауданының тұрғыны Кенжегүл Махамбетова Ғарышкер көшесінің жөндеуден өтуіне қатысты ұсынысын айтты. «Бәйтерек» шағын ауданының тұрғыны, көпбалалы ана Гүлзира Сүлейменова ерекше қажеттілігі бар балаларға балабақша ашу мәселесін қозғады. Қала әкімі барлық қойылған сауал мен көтерілген мәселелердің назардан тыс қалмайтынын жеткізді.
Кездесуді облыс әкімі Гүлшара Әбдіқалықова қорытындылап, ауқымды істерге оң баға берді.
Мөлдір СНАДИНОВА,
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
