Қазақстанда жыл сайын маусым айының екінші жексенбісінде Мал шаруашылығы қызметкерлері күні атап өтіледі.
Бұл сала отандық агроөнеркәсіп кешенінің негізгі қозғаушы күштерінің бірі болып саналады және АӨК-тің жалпы өнім көлемінің 39 пайыздан астамын қамтамасыз етеді.
Ұлттық статистика бюросының биылғы жылдың алғашқы төрт айындағы деректері барлық бағыт бойынша мал басының тұрақты өсімін көрсетеді. Атап айтқанда, ірі қара мал саны өткен жылдың сәйкес кезеңімен салыстырғанда 3,4 пайызға артып, 9 млн 774,5 мың бастан асты. Қой мен ешкі саны 1,6 пайызға өсіп, 25,7 миллион басқа жетті, оның ішінде 23,4 миллионы – қой. Ең жоғары өсім жылқы шаруашылығында тіркеліп, көрсеткіш бірден 7,1 пайызға өсіп, 5,1 миллион бастан асты.
Осы кезеңде барлық санаттағы ет өндірісі 338,2 мың тоннаны құрап, өткен жылмен салыстырғанда 3,4 пайызға артты. Оның ішінде сиыр еті – 112,9 мың тонна, қой еті – 34,7 мың тонна, жылқы еті – 41,2 мың тонна және құс еті – 126,7 мың тонна өндірілді.
Сүт өндірісі де оң динамика көрсетіп, 3,1 пайызға өсіп, 986,8 мың тоннаны құрады (2025 жылы – 957,2 мың тонна). Жұмыртқа өндірісі 8,6 пайызға артып, 1 млрд 519,8 млн данаға жетті (2025 жылы – 1 млрд 399,2 млн дана).
Саланың тұрақты дамуын қаржылық көрсеткіштер де дәлелдейді. Биылғы жылдың алғашқы төрт айында еліміздегі мал шаруашылығының жалпы өнім көлемі 1 триллион 158 миллиард теңгеден асып, нақты көлем индексі 103,5 пайызды құрады.
Мал шаруашылығы қазақстандық ауылдардың әлеуметтік тұрақтылығын қамтамасыз етіп, ондаған мың ауыл тұрғыны үшін тұрақты жұмыспен қамту көзі болып отыр. Бұл сала Мемлекет басшысы атап өткен «Еңбек адамы» құндылығы мен адал еңбек қағидатының нақты көрінісі саналады. Фермалар мен жайылымдарда күн сайын атқарылатын аграршылар еңбегі еліміздің азық-түлік қауіпсіздігінің берік негізін қалыптастырады.
