Қазақ қашанда отбасының бүтіндігін елдің тұтастығымен сабақтастырып, шаңырақтың шаттығын ұлттың бақытына балаған. Әке өнегесі мен ана мейірімі тоғысқан, үлкенге құрмет, кішіге ізет салтанат құрған отбасы – қоғамның ең берік тірегі. Осындай асыл құндылықтарды дәріптеген «Мерейлі отбасы – 2026» ұлттық байқауының облыстық кезеңі қорытындыланып, Сыр өңірінің өнегелі әулеттері құрмет төрінен көрінді.
«Құзыреттілік орталығында» өткен салтанатты шараға облыс әкімі Мұрат Ергешбаев, облыстық мәслихат төрағасы Мұрат Тлеумбетов, зиялы қауым өкілдері, қоғамдық ұйымдардың белсенділері мен байқауға қатысушы отбасылар жиналды.
Жылы жүздесуге, ізгі тілекке толы басқосуда отбасы құндылығының қоғам өміріндегі орны айрықша айтылды. Аймақ басшысы жиналғандарды байқаудың қорытындысымен құттықтап, отбасы қоғамның алтын діңгегі, ұлт руханиятының берік тұғыры екенін атап өтті. Президент Қасым-Жомарт Тоқаевтың отбасы институтының қоғамдағы орнына қатысты пікіріне тоқталды. Мемлекет тұтастығы берік отбасы мен саналы ұрпақ тәрбиесінен бастау алатынын айта келе, ата-ананың жауапкершілігін арттыру, балалардың құқықтары мен мүдделерін қорғау баршаға ортақ міндет екенін атап өтті. Сондай-ақ отбасының мәртебесін көтеру, ата-ананың бала тәрбиесіндегі жауапкершілігін арттыру, өскелең ұрпақтың құқықтары мен мүдделерін қорғаудың маңызына тоқталды.
Байқаудың биылғы облыстық кезеңінде 220 отбасының арасынан 16-сы үздік деп танылды. Бұл – бір шаңырақтың ғана емес, отбасы тәрбиесін ұрпақтан ұрпаққа жалғаған тұтас әулеттің мерейін асыратын мәртебе. Қазылар алқасының шешімімен «Мерейлі отбасы» ұлттық байқауы облыстық кезеңінің бас жүлдесін Арал ауданынан келген Құтмамбетовтер отбасы иеленді. Әулеттің ақсақалы Хангене Құтмамбетов саналы ғұмырын ауыл шаруашылығы саласына арнап, ұзақ жыл бойы адал еңбегімен елге қызмет еткен. Бүгінде ол – сегіз баладан тараған 30 немере мен 45 шөберенің қызығын көріп отырған үлкен әулеттің ардақты қариясы. Жұбайы Үрімжан Нұрдәулетова бар ғұмырын бала тәрбиесіне арнаған ардақты ана. Ұрпағын еңбекқорлыққа, бірлік пен үлкенді сыйлауға баулыған Құтмамбетовтер шаңырағында отбасы сабақтастығы мен ұлттық тәрбиеге айрықша мән беріледі. Әулет мүшелері атадан қалған өнегені жалғап, берекелі тірлік пен татулықты басты құндылық санайды.
І орын Шиелі ауданынан Бәкіровтер отбасына бұйырды.
‒ Қазір 92 жастамын. Жеті ұл, бес қыз тәрбиелеп өсірдім. Бүгінде 44 немере, 95 шөбере сүйіп отырмын. Аллаға шүкір, ұрпағым өсіп-өніп, әрқайсысы өз орнын тауып келеді. Мен үшін ең үлкен мерей де, ең үлкен байлық та – осы. Балаларым мен немере-шөберелерімнің тәрбиелі, бір-біріне қамқор болып өскеніне қуанамын. Осындай үлкен әулеттің ортасында отырғанымды үлкен бақыт деп санаймын, – деді Әбен Бәкіров.
ІІ орын Қазалы ауданынан келген Досхожаевтар отбасына бұйырды. Әулеттің тірегі Әли Ақмырзаұлы мен Салия Мәдәлиқызы 42 жылдан астам уақыт бойы өмірдің ыстығы мен суығын бірге өткеріп, бір шаңырақ астында төрт ұл мен тоғыз қызды тәрбиелеп өсірген. 13 перзентке ана болып, ұрпақ тәрбиесіне өлшеусіз еңбек сіңірген Салия Мәдәлиқызы «Күміс алқа» және «Алтын алқа» төсбелгілерімен марапатталған. Бүгінде тамыры тереңге жайылған Досхожаевтар әулеті үлкенге құрмет, кішіге ізет, еңбекке адалдық пен отбасы алдындағы жауапкершілікті берік ұстанып, осы құндылықтарды кейінгі буынға аманат етіп келеді.
Ал ІІІ орын қызылордалық Бимұратовтар отбасына берілді. Әулеттің ақ жаулықты анасы Үбіжарова Ұлмекен – Ұлы Отан соғысы жылдарында тылда еңбек еткен ардагер, «Батыр ана» атанған аяулы жан. Саналы ғұмырын отбасы мен ұрпақ тәрбиесіне арнаған ол бүгінде үлкен әулеттің берекесін ұйыстырып отырған қадірлі ана. Бимұратовтар шаңырағында үлкенге құрмет, кішіге ізет, еңбексүйгіштік пен отбасылық бірлік секілді құндылықтар ұрпақтан ұрпаққа жалғасып келеді.
Сонымен бірге әр шаңырақтың өзіндік болмысын, еңбегі мен тәлімін айшықтайтын арнайы номинациялар табысталды. «Ұлағатты отбасы» аталымына аралдық Жұмағалиевтер, «Берекелі отбасы» аталымына қазалылық Шахмарановтар ие болды. Қармақшы ауданынан Тортаевтар отбасы «Бәйтерек отбасы», Қиясовтар отбасы «Кемел отбасы» аталымымен марапатталды. Жалағаштық Түлековтерге «Жігерлі отбасы», Ахметовтерге «Ынтымақты отбасы» атағы берілді. Сырдария ауданынан Бисеновтер отбасы «Еңбекқор отбасы», Бұрхановтар отбасы «Өнегелі отбасы» аталымын иеленді. Шиелілік Әбішовтер «Мәуелі отбасы», жаңақорғандық Ақылбековтер «Үлгілі отбасы», Әуелбековтер «Өнерлі отбасы» атанса, Қызылорда қаласынан қатысқан Бодановтар отбасына «Шуақты отбасы» номинациясы табысталды.
Жеңімпаздар мен жүлдегерлерге бағалы сыйлықтар мен қаржылай сертификаттар беріліп, салтанатты жиын мерекелік бағдарламаға ұласты.
Мерейі тасыған отбасы – мемлекеттің де мерейі. «Мерейлі отбасы» – жүлде үлестірумен шектелетін жарыс емес. Оның түпкі мұраты – әулеттің абыройын асырған әке мен ананың еңбегін елге таныту, берекелі тұрмыстың арқауындағы сыйластық пен жауапкершілікті жас ұрпаққа үлгі ету. Қазақтың «Отан – отбасынан басталады» деген бір ауыз сөзінде үлкен тағылым жатыр. Өйткені елге деген сүйіспеншілік те, еңбекке деген құрмет те, адамға деген мейірім де ең алдымен қарашаңырақтың табалдырығынан бастау алады. Берекесі мен бірлігі жарасқан Құтмамбетовтер, Бәкіровтер, Досхожаевтар, Бимұратовтар және өзге де өнегелі әулеттердің бүгінгі жетістігі – соның айқын көрінісі. Шаңырағы биік, керегесі кең, ұрпағы ұлағатты отбасылар көбейген сайын елдің де еңсесі биіктей бермек. Себебі отбасының мерейі – Отанның мерейі.
Бағлан АМАНЖОЛ,
«Сыр бойы»
