Құрылтай сайлауы Сырдария ауданы тұрғындарының маңызы жоғары ортақ істегі ауызбірлігін көрсетті. Сайлау учаскелерінде дауыс беру талапқа сай жүргізіліп, қоғамдық тәртіп пен қауіпсіздік қамтамасыз етілді.
Сайлауға ауданның әр буын өкілі белсенді қатысты. Тереңөзек кентіндегі №155 сайлау учаскесіне 105 жастағы екінші дүниежүзілік соғыс ардагері Яхия Тасыров келіп, дауыс берді. Ғасырдан асқан қария ел өміріндегі маңызды саяси науқанға қатысып, азаматтық ұстанымын білдірді. Бүгінде Яхия Тасыров – Қызылорда облысындағы жалғыз соғыс ардагері. Бейбіт күннің қадірін терең түсінетін майдангер елдің тұрақтылығы мен болашағы үшін әр азаматтың таңдау жасағаны жөн екенін атап өтті.
Сырдария ауданындағы №157 сайлау учаскесінде тоғызқұмалақтан Қазақстан Республикасының еңбек сіңірген жаттықтырушысы Білімжан Елеусін дауыс берді. Ұлттық спортты дамытуға, халықаралық, республикалық жарыстардың чемпиондары мен жүлдегерлерін тәрбиелеуге үлес қосып жүрген тәжірибелі маман осылайша азаматтық міндетін орындады.
– Әр азаматтың дауысы маңызды. Бүгін өз таңдауымды жасап, азаматтық борышымды орындадым. Елдің болашағы жарқын болсын! – деді ол.
Сайлау күні жергілікті спортшылар да белсенділік танытты. «Қайсар» көгалдағы хоккей командасының мүшесі Асхат Ермағанбетов спортшылардың ел болашағына бейжай қарамайтынын атап өтті. Ал волейболдан құрама команда ойыншысы, аудандық спорт клубының жаттықтырушысы Ұлпан Дайрабаева Құрылтай сайлауында дауыс бергенін жеткізді.
Аға буын өкілдерінің сайлау учаскелеріне еркін жетуіне де жағдай жасалды. Ауданда автокөлік волонтерлері жасы үлкен тұрғындарды учаскелерге жеткізіп, дауыс беру процесіне қатысуына көмектесті. Бұл – жастардың үлкендерге деген құрметін және қоғамдық жауапкершілігін көрсететін игі бастамалардың бірі.
№156 сайлау учаскесінің төрағасы Қалихан Омаровтың айтуынша, дауыс беру барысы тұрақты әрі жоғары деңгейде ұйымдастырылған.
– Сайлау – ел өміріндегі маңызды әрі тарихи күндердің бірі. Кент тұрғындары сайлау учаскесіне келіп, азаматтық міндеттерін орындады. Дауыс беру тұрақты және жоғары деңгейде өтті. Құрылтай ел бірлігі мен қоғамдық ортақ мақсатты айқындайтын маңызды құрылым болғалы тұр, – деді ол.
Сайлау учаскелерінде тұрғындарға көтеріңкі көңіл-күй сыйлау мақсатында мәдени бағдарламалар да ұйымдастырылды. Аудан өнерпаздары ән шырқап, күй орындап, ұлттық өнерді насихаттады. Сонымен қатар кітап көрмелері қойылып, келушілерге рухани-танымдық әдебиеттер таныстырылды.
Осылайша Сырдария ауданында сайлау күні әр жастағы тұрғындардың азаматтық белсенділігімен ерекшеленді. Он сегізге толған жастардан бастап ардагерлерге дейін өз таңдауын жасап, ел болашағына қатысты маңызды саяси науқаннан қалыс қалған жоқ.
Назерке САНИЯЗОВА,
«Сыр бойы»
