Қазақстан Республикасы Құрылтай сайлауы күні Қызылорда облысындағы 386 учаскеде 2720 комиссия мүшесі қызмет атқарды. Өңірде 500 591 дауыс беруші тізімге енгізілген. Қызылорда қаласында 132 учаске бар.
Азаматтардың учаскесін анықтауға арналған 4 онлайн сервис, уақытша тіркеу қызметімен айналысатын 5 учаске жұмыс істеді. Қимыл-қозғалысы қиын мүгедектігі бар азаматтарды тасымалдау үшін 67 инватакси, 45 сурдоаудармашы ымдау тілі қызметін көрсетті.
Сайлаушылар дауыс беру учаскесін нақтылау үшін Call-орталыққа (109) және «Өзіңді сайлаушылар тізімінен тексер» сервисіне (saylau.orda.gov.kz/ru) жүгінді. Әр азамат жеке сәйкестендіру нөмірін теріп, қай сайлау учаскесінде тіркелгенін және сол учаскесінің қай мекенжайда орналасқанын картадан онлайн көрді.
Сонымен қатар, telegram-бот (saylaukzo_Bot) және «Smart Qyzylorda» мобильді қосымшасы арқылы тексеру мүмкіндігі қарастырылды.
Облыс әкімі Мұрат Ергешбаев «Құзыреттілік орталығындағы» №222 сайлау учаскесіне барып, Қазақстан Республикасы Құрылтай депутаттарының сайлауында дауыс берді. Тұрғындармен кездесіп, пікірлерін тыңдады.
– Жыл басында Сыр бойында өткен Ұлттық құрылтайдың қорытынды бесінші отырысында Президентіміз еліміздің алдағы стратегиялық бағытын айқындап, конституциялық реформаларды ұсынған болатын. Жалпыхалықтық референдум арқылы қабылданған жаңа Конституциямыз аса ауқымды қоғамдық-саяси үдерістерге жол ашып, мемлекеттік басқару жүйесін жаңғыртуға мүмкіндік берді.
Бүгін өтіп жатқан Құрылтай депутаттарының сайлауы – Әділетті әрі Қуатты Қазақстанның жаңа бағдарын айқындайтын тарихи оқиға. Жаңа Құрылтай Парламенттік жүйенің тарихи сабақтастығын сақтап, егемен еліміздің жарқын болашағына қызмет етеді. Сыр жұртшылығы еліміздің ертеңіне бейжай қарамай, бүгінгі сайлауға да белсенді қатысады деп сенемін, – деді Мұрат Нәлқожаұлы.
Сайлау учаскелерінде ұлттық ойындар, тақырыптық көрмелер ұйымдастырылып, өнерпаздар әннен шашу шашты.
Құрылтай сайлауына дауыс берудің алғашқы екі сағаттағы, яғни сағат 10:00-де жарияланған алдын ала деректері бойынша Қызылорда облысы көш басында тұрды. Сағат 12:00, 14:00, 16:00-дегі көрсеткіште де бірінші орында болды. Ал 18:00-де үздік үштікті қорытындылады.
Дауыс беру аяқталған сағат 20:00-дегі алдын ала мәліметтер бойынша Қызылорда облысы тұрғындарының 90,75 %-ы дауыс беріп, республикада үшінші орынға шықты.
