Бүгінгі қоғамның талабы уақыттың керуеніне ілесіп, күн сайын жаңа сипат алуда. Бұқараның талап-тілектері билікке ғана емес халық қалаулыларына да бұрылып, нәтижелі істер жүзеге асырылуда.
«Nur Otan» партиясынан мәслихат депутаты болып сайланғалы көптеген сұрақтар мен өтініштерді қабылдап, аймақ тұрғындары көтерген өзекті проблемалардың шешілуіне азаматтық үлесімді қосып келеміз. Бұл бағытта жерлестердің қуаттауы жаңа талпыныстарға жетелеуде.
Жуырда өткен облыстық мәслихаттың тұрақты комиссия отырысында көптің көкейтесті мәселелері таразыланды. Комиссияға төрағалық етіп, күн тәртібіндегі бес мәселені әріптестермен бірге сараладық. Ол Президент Жолдауының жүзеге асырылуы мен өңірдегі жастар саясаты саласындағы іс-шаралардың мерзімді орындалуы тұрғысында өрбіді.
Облыстық ішкі саясат басқармасы басшысының міндетін атқарушы Еркін Әбішев жастар саясаты бойынша хабарлама жасап, мемлекеттік сатып алу негізінде өткізілетін іс-шараларға тоқталды. Депутаттар тарапынан ұсыныстар беріліп, жастар жобаларын жүзеге асыруды ең өзекті мәселелер ортаға салынды. Жастарды еңбекке баулу, зияткер ұлт қалыптастыру тұрғысында өңірде атқарылған жұмыстар мен алдағы жоспарлар сөз етілді.
Үкіметтің «Қазақстандағы жастарды қолдау жөніндегі 2021-2025 жылдарға арналған кешенді жоспарына» сәйкес бұл бағыттағы жаңа бастамалардың қолға алынғаны айтылды.
Аталған құжат ауқымды 10 бағытты қамтиды. Өңірге қатысты негізгі тармақтары «Қызылорда облысы бойынша «Жастар – Отанға» бағдарламасын іске асырудың 2025 жылға дейінгі жол картасына» енгізіледі.
Бұған қоса, Е.Әбішевтің тұрақты комиссияның алдағы отырыстарының күн тәртібіне өңірдегі жастарды тұрғын үймен қамту, «Орда» аймақтық тұрғын үй бағдарламасын қайта жаңғырту мәселесін енгізуге қатысты ұсынысы мақұлданды.
Келесі мәселе аймақтағы ономастика төңірегінде қозғалды. Көшелер мен мекемелерге кісі есімін беру дәстүрге айналған. Осы тақырыпқа үн қосқан облыстық мәслихат депутаты Сәрсенкүл Бихожа өз ұсынысын жеткізді.
Депутаттың пайымынша, көшелерге кісі есімін берумен қатар «Тәуелсіздіктің 30 жылдығы» секілді атауларға да мән беру қажет. Сонымен қатар, облыстық ономастикалық комиссияның құрамына облыстық мәслихат депутаттарын енгізу жөнінде ұсыныс айтылды.
Аталған мәселелерден бөлек күн тәртібінде бірқатар мемлекеттік мекемелердің нормативтік-құқықтық құжаттарына өзгерістер мен толықтырулар енгізілді.
Гүлнар ЕСҚАЛИЕВА,
облыстық мәслихаттағы «Nur Otan» партиясы депутаттық фракциясының мүшесі, әлеуметтік және мәдени мәселелер жөніндегі тұрақты комиссияның төрағасы
>>> Біздің Facebook, Instagram парақшаларымыз бен Telegram каналымызға жазылыңыз! <<<
